AKP ភ្នំពេញ ថ្ងៃទី១៧ ខែមេសា ឆ្នាំ២០២៦--ក្រុមព្រះខ័នស្វាយរៀងរបស់កម្ពុជាបានឡើងទៅកាន់វគ្គផ្តាច់ព្រ័ត្រ ជាលើកទី២ នៅក្នុងព្រឹត្តិការណ៍បាល់ទាត់ក្លឹបលំដាប់ទី៣ ប្រចាំទ្វីបអាស៊ី (AFC Challenge League) រដូវកាល ២០២៥-២០២៦ បន្ទាប់ពីបានយកឈ្នះក្រុម Manila Diggers FC របស់ប្រទេសហ្វីលីពីន ដោយលទ្ធផល ជើងទី២ ៣- ០ កាលពីយប់ថ្ងៃទី១៦ ខែមេសា ឆ្នាំ២០២៦នេះ នៅកីឡដ្ឋាន Rezal Memorial រដ្ឋធានីម៉ានីល ប្រទេសហ្វីលីពីន។

នេះជាជ័យជម្នះរបស់ព្រះខ័នរាជស្វាយរៀង ដែលរកបានលទ្ធផលដ៏ល្អ នៅក្នុងការប្រកួតក្រៅដី ដោយបានយកឈ្នះក្រុមម្ចាស់ផ្ទះ Manila Diggers FC ៣-០ បន្ទាប់ពីធ្វើបានត្រឹមលទ្ធផលស្មើគ្នា ជើងទី១ កាលពីថ្ងៃទី០៩ ខែមេសា ឆ្នាំ២០២៦ ដោយលទ្ធផល ១ទល់១ នៅពហុកីឡដ្ឋានជាតិមរតកតេជោ។

នៅក្នុងការប្រកួត ជើងទី២ យប់មិញនេះ គឺព្រះខ័នរាជស្វាយរៀងនាំមុខ២គ្រាប់  នៅវគ្គទី១ ដោយការតែតបញ្ចូលទីពីកីឡាករ ខ្សែការពារ សារ៉េត គ្រីយ៉ា និងរកបានដោយ កីឡាករ Peprah Kwame នៅនាទី៣៩។ ចូលវគ្គទី២ព្រះខ័នរាជស្វាយរៀងបន្តធ្វើបានល្អបន្ថែមទៀត ហើយកីឡាករ Peprah Kwame បន្ថែមគ្រាប់ទីពីររបស់ខ្លួនឱ្យព្រះខ័នរាជស្វាយរៀងនាំមុខ ៣ទល់០ លើក្រុម Manila Diggers នៅនាទីទី៦៨។ សរុបទាំងពីរជើងព្រះខ័នរាជឈ្នះ ៤ទល់នឹង១ ទាំងពីរជើង និងឡើងវគ្គផ្ដាច់ព្រ័ត្រជាលើកទី២ជាប់គ្នា។ វគ្គផ្ដាច់ព្រ័ត្រ ព្រះខ័នរាជស្វាយរៀង ត្រូវជួបក្រុមឈ្នះក្នុងតំបន់អាស៊ីខាងលិច អំឡុងខែឧសភា ឆ្នាំ២០២៦ ខាងមុខ៕

ដោយ ហេង ណាលីន (រូបភាព៖ ក្លឹបព្រះខ័នរាជស្វាយរៀង)