AKP ព្រះវិហារ ថ្ងៃទី១៥ ខែមេសា ឆ្នាំ២០២៦​ --​ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ នៅរសៀលថ្ងៃទី១៣ ខែមេសា ឆ្នាំ២០២៦ បានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយដែលជាការជួយឧបត្ថម្ភពីគណៈកម្មាធិការប្រជាជនខេត្តហ្សាឡាយ នៃសាធារណរដ្ឋសង្គមនិយមវៀតណាម ចំនួន ១ ៥០០ឃីត ទៅចែកជូនដល់បងប្អូនប្រជាពលរដ្ឋភៀសសឹក ដែលកំពុងស្នាក់នៅបណ្ដោះអាសន្ននៅមណ្ឌលសុវត្ថិភាពវត្តឧត្តរគិរីទួលអណ្តែត និងវត្តពើងអង្កាម ក្នុងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០។

ថ្លែង​ក្នុងឱកាសនោះ ឯកឧត្តមអភិបាលខេត្ត បានថ្លែងអំណរគុណយ៉ាងជ្រាលជ្រៅចំពោះ គណៈកម្មាធិការប្រជាជនខេត្តហ្សាឡាយ ដែលតែងតែបង្ហាញនូវសមានចិត្តសាមគ្គីភាព និងជួយជ្រោមជ្រែងដល់ខេត្តព្រះវិហារ ជាពិសេសក្នុងគ្រាលំបាក សបញ្ជាក់ឱ្យឃើញពីកាយវិការមនុស្សធម៌ដ៏ថ្លៃថ្លា មិនអាចបំភ្លេចបាន និងបានរួមចំណែកយ៉ាងសំខាន់ក្នុងការសម្រាលទុក្ខលំបាករបស់បងប្អូនប្រជាពលរដ្ឋ។

​ជាមួយគ្នានេះ ឯកឧត្តម គីម រិទ្ធី បានលើកទឹកចិត្តដល់បងប្អូនប្រជាពលរដ្ឋនៅតាមមណ្ឌលនីមួយៗ ឱ្យរៀបចំពិធីទទួលទេវតាឆ្នាំថ្មី ដែលនឹងយាងចុះមកនៅថ្ងៃទី១៤នេះ ឱ្យបានអធិកអធម ដើម្បីបង្កបរិយាកាសសប្បាយរីករាយ និងរក្សាបាននូវទំនៀមទម្លាប់ប្រពៃណីជាតិ ទោះបីស្ថិតក្នុងស្ថានភាពស្នាក់នៅបណ្ដោះអាសន្នក៏ដោយ។ បន្ថែមពីនេះ ដើម្បីបង្កើនភាពរីករាយទ្វេដង ឯកឧត្តមអភិបាលខេត្ត ក៏បានឧបត្ថម្ភថវិកាផ្ទាល់ខ្លួន ជូនដល់ក្រុមការងារប្រចាំមណ្ឌល ដើម្បីចាត់ចែងរៀបចំជាតន្ត្រីបែបប្រពៃណី សម្រាប់ឱ្យបងប្អូនបានរាំលេងកម្សាន្តរយៈពេល ៣ថ្ងៃ ចាប់ពីថ្ងៃទី១៤ ដល់ទី១៦ ខែមេសា។

ក្នុងឱកាសនោះ ឯកឧត្តមអភិបាលខេត្ត ក៏បានប្រសិទ្ធពរជ័យសិរីសួស្ដីក្នុងឱកាសឆ្នាំថ្មី ជូនដល់បងប្អូនភៀសសឹកទាំងអស់ សូមឱ្យជួបតែសេចក្ដីសុខ សុភមង្គល។ ឯកឧត្តមក៏បានអំពាវនាវដល់សប្បុរសជននានា បន្តចូលរួមចំណែកជាមួយរដ្ឋបាលខេត្ត ក្នុងសកម្មភាពមនុស្សធម៌បែបនេះបន្តទៀត ដើម្បីជាកម្លាំងចិត្ត និងជាការចែករំលែកសេចក្តីស្រឡាញ់ជូនដល់បងប្អូនប្រជាពលរដ្ឋដែលកំពុងខ្វះខាត៕

ដោយ៖ រិទ្ធី ប្រភព៖ មន្ទីរព័ត៌មានខេត្តព្តះវិហារ