AKP ភ្នំពេញ ថ្ងៃទី១៥ ខែមេសា ឆ្នាំ២០២៦​ --សម្រាប់ថ្ងៃទី១ នៃពិធីបុណ្យចូលឆ្នាំថ្មីប្រពៃណីជាតិខ្មែរ បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្ដរជាតិ បានមកពីគ្រប់ទិសទី និងបានបង្ហាញនូវក្តីសប្បាយរីករាយចំពោះរៀបចំកម្មវិធីកម្សាន្ដសប្បាយ ក្នុងឱកាសបុណ្យចូលឆ្នាំថ្មី និងព្រឹត្ដិការណ៍ “នគរសង្ក្រាន្ដ” នៅក្នុងរាជធានីភ្នំពេញ។ ជាមួយគ្នានេះដែរ ចំពោះអាជីវករ និងអ្នកលក់ដូរវិញ បានបង្ហាញក្តីសប្យាយរីករាយ និងទឹកចិត្តត្រេកអរជាមួយនឹងការលក់ផលិតផលដាច់ដោយពួកគាត់អាចរកចំណូលក្នុងមួយរដូវបុណ្យចូលឆ្នាំថ្មីប្រពៃណីខ្មែរ។

សម្រាប់ព្រឹត្ដិការណ៍ “នគរសង្រ្កាន” ត្រូវបានសហភាពសហព័ន្ធយុវជនកម្ពុជា សហការជាមួយរដ្ឋបាលរាជធានីភ្នំពេញ រៀបចំឡើងនៅនៅរាជធានីភ្នំពេញ ដែលមានរយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦។ ក្នុងរយៈពល៦ថ្ងៃនេះ ក៏មានកម្មវិធី និងសកម្មភាពជាច្រើន សម្រាប់បងប្អូនប្រជាពលរដ្ឋដែលចង់ចូលរួមលេងកម្សាន្តក្នុងរាជធានីភ្នំពេញប្រកបដោយក្តីសប្បាយរីករាយ។

ព្រឹត្តិការណ៍ “នគរសង្ក្រាន្ត” ឆ្នាំ២០២៦ ត្រូវបានបង្កើតនូវកម្មវិធីជាច្រើនដ៏សម្បូរបែប ក្នុងនោះ មានដូចជាការលេងល្បែងប្រជាប្រិយ ការបង្ហាញសិល្បៈវប្បធម៌ ការសម្ដែងប្រពៃណីខ្មែរ តន្រ្តី ប្រកួតអុកចត្រង្គ ជាមរតកវប្បធម៌សិល្បៈអរូបីរបស់ខ្មែរ និងកម្មវិធីកម្សាន្តជាច្រើនផ្សេងទៀត ដើម្បីឱ្យប្រជាពលរដ្ឋក៏ដូចជាភ្ញៀ់វទេសចរជាតិ និងអន្ដរជាតិ ចូលរួមកម្សាន្តសប្បាយរីករាយក្នុងរយៈពេល៦ថ្ងៃនេះ។

ក្នុងព្រឹត្តិការណ៍ដ៏អស្ចារ្យនេះ ក៏មានការសម្តែងរបាំត្រុដិ នាព្រឹកថ្ងៃទី១៤ ខែមេសា ឆ្នាំ២០២៦ នៅរមណីយដ្ឋានប្រវត្តិសាស្ត្រវត្តភ្នំ ក្នុងរាជធានីភ្នំពេញ ខណៈលោក ឱក សិរីពិសិដ្ឋ ជាអ្នកសម្តែងរបាំត្រុដិមួយរូបបានបញ្ជាក់ប្រាប់ថា លោកសប្បាយចិត្តដែលបានចូលរួមសម្តែងសិល្បៈក្នុងពិធីបុណ្យចូលឆ្នាំប្រពៃណីខ្មែរនេះដែលបង្ហាញពីភាពអស្ចារ្យនៃប្រពៃណី វប្បធម៌ បង្កប់ទៅដោយជំនឿនៃដូចតាខ្មែរដ៏យូរលង់ណាស់មកហើយ។ អ្នកសម្ដែងរបាំត្រុដិរូបនេះ ក៏បានបង្ហាញមោទនភាពដែលបានចូលរួមសម្តែងសិល្បៈវប្បធម៌ខ្មែរ ហើយបានអះអាងថា៖ «ពិធីបុណ្យចូលឆ្នាំដែលរៀបចំនាពេលនេះពិតជាអស្ចារ្យ និង ធ្វើឱ្យពិភពលោកបានឃើញសិល្បៈវប្បធម៌ដ៏ខ្ពស់ត្រដែតរបស់ដូនតាខ្មែរដែលរក្សាបានតាំងតែពីបុរាណរហូតមកដល់បច្ចុប្បន្ន»។

កំពុងតែសំឡឹងមើលការសម្ដែងរបាំប្រជាប្រិយខ្មែរ និងបង្ហាញការគាំទ្រសិល្បៈ វប្បធម៌ខ្មែរផងនោះ អ្នកស្រី ឆាយ សារ៉េត រស់នៅខេត្តបាត់ដំបង ដែលបានដើរកម្សាន្ត នៅរមណីយដ្ឋានប្រវត្តិសាស្ត្រវត្តភ្នំ បានបញ្ជាក់ប្រាប់ថាទោះជាថ្ងៃទី១នៃពិធីបុណ្យចូលឆ្នាំ ហើយអ្នកស្រីទើបតែមកដល់ទីកម្សាន្តកន្លែងនេះពិតមែនឃើញថាមានភាពទាក់ទាញ និងរំភើបចិត្តខ្លាំងណាស់នៅពេលឃើញមនុស្សកុះករមកចូលរួមកម្សាន្តសប្បាយ។ ស្រ្តីវ័យ៤៨ឆ្នាំរូបនេះបានឱ្យដឹងបន្ថែមថា៖ ខ្ញុំ គ្រោងមកដើរកម្សាន្តនៅរាជធានីភ្នំពេញចំនួន១ថ្ងៃ ហើយបន្ទាប់ពីនោះនឹងបន្តទៅក្រុងព្រះសីហនុ ដើម្បីដើរកម្សាន្តបន្តទៀត។ ឆ្នាំនេះ ទោះអាកាសធាតុក្តៅបន្តិចពិតមែនតែខ្ញុំ និងគ្រួសារមិននឿយណាយដើរកម្សាន្តទេ ពីព្រោះថាពិធីបុណ្យចូលឆ្នាំប្រពៃណីខ្មែរសប្បាយរីករាយខ្លាំងណាស់»។

អ្នកស្រី ឆាយ សារ៉េត បានមើលឃើញថា ការរៀបចំកម្មវិធីនៅរាជធានីភ្នំពេញគឺមានភាពស្រស់ស្អាត និងមានការចូលរួមគាំទ្រពីបងប្អូនខ្មែរយើងច្រើន បើទោះបីជាយើងមានសង្រ្គាមឈ្លានពានពីសំណាក់ប្រទេសជិតខាងយ៉ាងណាក្ដី តែយើងនៅតែខ្លាំងពុំមានអ្វីត្រូវព្រួយបារម្ភសោះឡើយ។

ដោយញញឹមផង និងកំពុងតែរវល់ញាប់ដៃញាប់ជើងលក់គ្រឿងម្ជូរគ្រប់មុខ និងម្ហូបគ្រប់មុខ ជូនដល់ទិញដែលឈរនៅខាងមុខតូបតូចមួយនោះ អ្នកស្រី  សារិន រ៉ាវី បាននិយាយថា ជារៀងរាល់រដូវចូលឆ្នាំខ្មែរអ្នកស្រីតែងមកលក់របស់ហូបចុកមានដូចជា គ្រឿងម្ជូរគ្រប់មុខ និងរបស់របរបំពងផ្សេងៗ មិនដែលខកខាន។ អ្នកស្រីអះអាងថា ការលក់ឆ្នាំនេះដាច់ខ្លាំងណាស់ដោយអាចរកប្រាក់ចំណេញមកវិញខ្ទង់ចាប់ពីមួយលានរៀលឡើងទៅដល់ជិត៣លានរៀល។ ស្រ្តីរូបនេះបានប្រាប់ដែរថា៖ «ក្នុងពិធីបុណ្យទាន បើទោះរវល់លក់ដូរពិតមែន តែខ្ញុំ ក៏ចូលរួមសប្បាយរីករាយជាមួយពលរដ្ឋខ្មែរ ហើយខ្ញុំក៏ឆ្លៀតទៅវត្តមិនភ្លេចការធ្វើបុណ្យក្នុងឱកាសចូលឆ្នាំថ្មីនេះ ផងដែរ»។

ដោយឡែក អ្នកស្រី សុខ ធឿន មកពីស្រុកកោះធំ ខេត្តកណ្តាល ដែលកំពុងឈរលក់នំខ្មែរគ្រប់មុខ មានដូចជាអន្សមជ្រូក អន្សមចេក នំបត់ នំគម បាននិយាយប្រាប់ថា នំខ្មែរលក់ដាច់ខ្លាំង ទោះទើបតែលក់ថ្ងៃទី១ តែក៏ឃើញថាមានអតិថិជនចូលទិញបរិភោគបន្តបន្ទាប់ឥតសូវដាច់។ អ្នកស្រី សុខ ធឿន បានសម្ដែងនូវក្តីសប្បាយរីករាយ ដែលឃើញមនុស្សកុះករមកដើរកម្សាន្តក្នុងឱកាសបុណ្យចូលឆ្នាំថ្មីនេះ ហើយបើមើលពិធីដែលគេរៀបចំគឺអស្ចារ្យណាស់មានគ្រប់មុខ គ្រប់ប្រភេទដែលអត់ទ្រាំសរសើរពុំបានឡើយ។

ដោយចូលរួមសប្បាយរីករាយជាមួយបងប្អូនប្រជាពលរដ្ឋកម្ពុជា ក្នុងឱកាសបុណ្យចូលឆ្នាំថ្មីនេះ លោក វ៉ាឡូ ស្មីត ជនជាតិអេស្ប៉ាញ ដែលកំពុងដើរកម្សាន្តក្នុងព្រឹត្ដិការណ៍ “នគរសង្ក្រាន្ដ” នៅផ្សារទួលទំពូង រាជធានីភ្នំពេញ បានរៀបរាប់ប្រាប់ថា លោកបានមកកម្សាន្តនៅប្រទេសកម្ពុជារយៈពេល២ថ្ងៃ ទៅ៣ថ្ងៃមកនេះ ឃើញថាពិតជារីករាយ និងសប្បាយចិត្ត ដែលឃើញមានការរាក់ទាក់ពីជនជាតិកម្ពុជា។ លោកបានបញ្ជាក់ឱ្យដឹងថា តំបន់ទេសចរណ៍កម្ពុជាពិតជាអស្ចារ្យ និងប្លែកធ្វើឱ្យដើរកម្សាន្តមិនចេះនឿយហត់។ «សម្រាប់ពិធីបុណ្យចូលឆ្នាំប្រពៃណីខ្មែរដែលលោកមកដល់រាជធានីភ្នំពេញនាថ្ងៃនេះឃើញថាអធិកអធម ប្លែកភ្នែក ហើយបើមានពេលវេលាច្រើន ខ្ញុំចង់ដើរកម្សាន្តឱ្យបានគ្រប់ទិសទី»។ នេះគឺជាការបញ្ជាក់បន្ថែមរបស់លោក វ៉ាឡូ ស្មីត។

ក្នុងឱកាសអញ្ជើញជាអធិបតីភាព ក្នុងពិធីទទួលទេវតាឆ្នាំថ្មី ក្នុងព្រឹត្តិការណ៍ “នគរសង្ក្រាន្ត” ក្នុងឆ្នាំ២០២៦នេះ នៅរមណីដ្ឋានប្រវត្តិសាស្ត្រវត្តភ្នំ នាព្រឹកថ្ងៃទី១៤ ខែមេសា ឆ្នាំ២០២៦ ដែលជាថ្ងៃទី១ នៃថ្ងៃបុណ្យចូលឆ្នាំថ្មី ប្រពៃណីជាតិខ្មែរ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក) រួមជាមួយឯកឧត្តម  ឃួង ស្រេង អភិបាលរាជធានីភ្នំពេញ ក៏បានចូលរួម ដើម្បីអបអរសាទរឆ្នាំថ្មីនេះ ផងដែរ។

សូមបញ្ជាក់ថា ពិធីអបអរសាទរបុណ្យចូលឆ្នាំថ្មី ប្រពៃណីខ្មែរ ឆ្នាំមមី ឆ្នាំ២០២៦ និងការរៀបចំកម្មវិធីបង្ហាញទស្សនីយភាពតាមបែបវប្បធម៌ សិល្បៈ សាសនា ប្រមាណជាង២០ទស្សនីយភាពធំៗ នៅតាមទីតាំងធំៗរួមមាន៖ រមណីយដ្ឋានវប្បធម៌ ប្រវត្តិសាស្ត្រវត្តភ្នំ ភូមិវប្បធម៌នៅជិតផ្សាររាត្រី សួនច្បារវឌ្ឍនៈ អតីតសួនទីលានធិបតេយ្យ តំបន់ផ្លូវថ្មើរជើងចតុមុខជាដើម ខណៈនៅតំបន់ផ្លូវថ្មើរជើងចតុមុខ ដែលលាតសន្ធឹងចាប់ពីមុខផ្សាររាត្រី រហូតមកដល់មុខព្រះបរមរាជវាំង។

ក្រៅពីនេះ ក៏នៅមានទីតាំងតូច៣កន្លែងទៀត នៅមុខវត្តបុទុមវត្តី, បាសាក់លេន, ផ្លូវលេខ៣០៨ និងផ្លូវលេខ១៥៥ ជុំវិញផ្សារទួលទំពូង ក្នុងខណ្ឌចំការមន និងក៏មានការរៀបចំស្តង់តាំងបង្ហាញផលិតផលខ្មែរជាច្រើន អមដោយមានឆាកប្រគំតន្ត្រីតូចធំ ចំនួនបីកន្លែង ដើម្បីបង្កលក្ខណៈឱ្យតំបន់នេះ មានភាពសប្បាយរីករាយដល់ពលរដ្ឋ និងអ្នកទេសចរមកពីគ្រប់ទិសទី៕

ដោយ៖ មករា និង រិទ្ធី