AKP បន្ទាយមានជ័យ ថ្ងៃទី១៥ ខែមេសា ឆ្នាំ២០២៦-- មជ្ឈដ្ឋាននៃភាពស្រស់បំព្រង និងសំឡេងសើចក្អាកក្អាយ បានគ្របដណ្តប់ពេញផ្ទៃនៃជម្រកស្នាក់នៅបណ្ដោះអាសន្ន (ផ្ទះអតីតយុទ្ធជន) ក្នុងភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ ខណៈដែលបងប្អូនភៀសសឹកដែលកំពុងស្នាក់នៅទីនោះ បានរៀបចំពិធីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី ក្នុងបរិយាកាសយ៉ាងអធិកអធម និងពោរពេញដោយក្តីសង្ឃឹម។

នៅរសៀលថ្ងៃទី១៤ ខែមេសា ឆ្នាំ២០២៦ ដែលត្រូវនឹងថ្ងៃទីមួយនៃពិធីបុណ្យចូលឆ្នាំថ្មី ឯកឧត្ដម អ៊ុ រាត្រីអភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីក្នុងពិធីបើកកម្មវិធីចូលឆ្នាំនៅទីតាំងផ្ទាល់។ អមដំណើរដោយក្រុមសម្របសម្រួលនៃព្រះរាជាណាចក្រកម្ពុជា ឯកឧត្តមអភិបាលខេត្តក៏បានសម្របសម្រួលជូនក្រុមអ្នកសង្កេតការណ៍អាស៊ាន (AOT) ដើម្បីចុះសង្កេតការណ៍ ផ្ទៀងផ្ទាត់ និងស្វែងយល់ពីស្ថានភាពរស់នៅជាក់ស្តែងរបស់បងប្អូនភៀសសឹក។

មិនត្រឹមតែជាការបំពេញការងាររដ្ឋបាល ឯកឧត្តម អ៊ុ រាត្រី បានបង្ហាញនូវភាពស្និទ្ធស្នាលយ៉ាងខ្លាំង ដោយបានដឹកនាំក្រុមការងារ AOT ចូលរួមលេងល្បែងប្រជាប្រិយខ្មែរ រួមមានការវាយក្អមយ៉ាងសប្បាយរីករាយ។ បន្ទាប់មក ឯកឧត្តមបានដើរចុះតាមខ្នងផ្ទះនីមួយៗ ដើម្បីសួរសុខទុក្ខ និងសំណេះសំណាលជាមួយបងប្អូនប្រជាពលរដ្ឋដល់ទីលំនៅ បង្ហាញពីការយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់ពួកគាត់។

បរិយាកាសក្នុងថ្ងៃដំបូងនេះត្រូវបានគេកត់សម្គាល់ឃើញថាមានភាពអ៊ូអរខុសពីធម្មតា។ បងប្អូនភៀសសឹកបានជួបជុំគ្នាទទួលទានអាហារសាមគ្គី ដែលមានដូចជា នំបញ្ចុក គោដុត និងការ៉េមយ៉ាងឈ្ងុយឆ្ងាញ់ ដោយឥតគិតថ្លៃ។ ក្រៅពីរបាំ និងល្បែងប្រជាប្រិយ ក៏មានការសម្តែងសិល្បៈចម្រុះដូចជា ការប្រកួតកីឡាប្រដាល់សេរី ដើម្បីបង្កើនភាពរស់រវើក ការសម្តែងល្ខោនប្រាសាក់ ដែលជាទម្រង់សិល្បៈបុរាណ ចង្វាក់កន្រ្ទឹមស្គរដៃ ដែលធ្វើឱ្យមហាជនចូលរួមរាំកម្សាន្តយ៉ាងកុះករ។

ថ្លែងទាំងទឹកមុខញញឹមស្រស់ស្រាយ បងប្អូនប្រជាពលរដ្ឋដែលស្នាក់នៅបណ្តោះអាសន្នក្នុងភូមិស្លក្រាម បានសម្តែងនូវក្តីរំភើបឥតឧបមា។ ពួកគាត់បានលើកឡើងថា "ទោះបីជាពួកយើងស្ថិតក្នុងស្ថានភាពស្នាក់នៅបណ្តោះអាសន្នក៏ពិតមែន ប៉ុន្តែថ្ងៃនេះពួកយើងមានអារម្មណ៍ថាមានភាពកក់ក្តៅណាស់។ ការផ្តល់អាហារឥតគិតថ្លៃ និងការរៀបចំឱ្យមានល្បែងប្រជាប្រិយ ល្ខោន និងប្រដាល់បែបនេះ ធ្វើឱ្យពួកយើងភ្លេចអស់នូវទុក្ខកង្វល់ និងមានកម្លាំងចិត្តបន្តជីវភាពទៅមុខទៀត។"

ពលរដ្ឋម្នាក់ទៀតបានបន្ថែមថា ការវត្តមានរបស់ឯកឧត្តមអភិបាលខេត្ត និងក្រុមការងារអន្តរជាតិ គឺជាសក្ខីភាពបង្ហាញថា អាជ្ញាធរមិនដែលបោះបង់ពួកគាត់ចោលឡើយ ជាពិសេសក្នុងឱកាសបុណ្យទានដ៏សំខាន់បែបនេះ។

ការរៀបចំកម្មវិធីចូលឆ្នាំថ្មីនៅជំរំភៀសសឹកភូមិស្លក្រាមនេះ មិនត្រឹមតែជាការកម្សាន្តប៉ុណ្ណោះទេ ប៉ុន្តែវាគឺជាការផ្សារភ្ជាប់ទំនាក់ទំនងរវាងថ្នាក់ដឹកនាំ និងប្រជាជន ក៏ដូចជាការបង្ហាញទៅកាន់សហគមន៍អន្តរជាតិអំពីការគ្រប់គ្រង និងការយកចិត្តទុកដាក់លើផ្នែកមនុស្សធម៌របស់រដ្ឋបាលខេត្តបន្ទាយមានជ័យ ក្នុងស្ថានភាពដ៏លំបាកនានា៕

ដោយ ឈុន សារ៉ាត