AKP ភ្នំពេញ ថ្ងៃទី១៤ ខែមេសា ឆ្នាំ២០២៦-- ក្នុងរយៈពេលជាង៣ខែដើមឆ្នាំ២០២៦នេះ ពោលគិតចាប់ពីថ្ងៃទី០១ ខែមករា រហូតដល់ថ្ងៃទី១០ ខែមេសា ឆ្នាំ២០២៦ មានករណីគ្រោះថ្នាក់ចរាចរណ៍នៅទូទាំងប្រទេសកើតឡើងចំនួន ៧១០ករណី បណ្តាលឱ្យមនុស្សស្លាប់ ៤៧២នាក់ និងបង្កឱ្យមានអ្នករងរបួសធ្ងន់ស្រាលរហូតដល់ ១.១១៤នាក់។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ។

បើតាមអ្នកនាំពាក្យរង មូលហេតុនាំឱ្យកើតមានសោកនាដកម្មលើដងផ្លូវទាំងនេះ គឺបណ្តាលពីការបើកបរលើសល្បឿនចំនួន ៤៦% មិនគោរពសិទ្ធិអាទិភាព ២១% មិនប្រកាន់ស្ដាំ ១២% បើកប្រជែងក្នុងស្ថានភាពគ្រោះថ្នាក់ ៨% បត់មិនប្រយ័ត្ន ៦% ស្រវឹង ៤% មិនគោរពសញ្ញាចរាចរណ៍ ២%។ល។ លោកបញ្ជាក់ថា រាជធានីភ្នំពេញមានគ្រោះថ្នាក់ចរាចរណ៍ច្រើនជាងគេ គឺចំនួន ២៣៣លើក ខេត្តកណ្ដាល ៥១លើក ព្រះសីហនុ ៤៩លើក កំពង់ស្ពឺ ៣១លើក និងខេត្តបន្ទាយមានជ័យ ៣០លើក។

ក្នុងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិនេះ លោក ទូច សុឃៈ បានអំពាវនាវយ៉ាងទទូចដល់បងប្អូនប្រជាពលរដ្ឋ អ្នកបើកបរ និងអ្នកប្រើប្រាស់ផ្លូវទាំងអស់ សូមបង្កើនការប្រុងប្រយ័ត្នឱ្យបានខ្ពស់ទ្វេដង និងត្រូវចូលរួមគោរពច្បាប់ចរាចរណ៍ឱ្យបានខ្ជាប់ខ្ជួនគ្រប់ពេលវេលា សូមបងប្អូនទាំងអស់ដែលជាអ្នកបញ្ជាយាន និងប្រើប្រាស់ផ្លូវគ្រប់ប្រភេទ កុំបើកបរលឿន ត្រូវគោរពសិទ្ធិអាទិភាព កុំបើកបរបញ្ច្រាសទិស ត្រូវប្រកាន់ស្ដាំ ឬកុំរំលោភចំណែកផ្លូវយានទិសដៅផ្ទុយ កុំប្រជែងក្នុងស្ថានភាពគ្រោះថ្នាក់ បត់ឆ្វេងស្ដាំត្រូវប្រើស៊ីញ៉ូ និងមើលមុខ មើលក្រោយ ហើយលើសពីនេះកុំបើកបរក្នុងស្ថានភាពស្រវឹងជាដាច់ខាត។

គួររម្លឹកថា ក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មីប្រពៃណីជាតិខ្មែរកាលពីឆ្នាំ២០២៥កន្លងទៅ គិតចាប់ពីថ្ងៃទី១៤ ដល់ថ្ងៃទី១៦ ខែមេសា មានគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន៣០ករណី បណ្ដាលឱ្យមនុស្សស្លាប់ចំនួន ២៦នាក់ និងរបួសធ្ងន់ស្រាលចំនួន ៤៧នាក់៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)