AKP តាកែវ ថ្ងៃទី១៤ ខែមេសាឆ្នាំ២០២៦-- រដ្ឋបាលខេត្តតាកែវ បើកកិច្ចប្រជុំគណៈកម្មការនិងក្រុមការងារ ដើម្បីពិនិត្យនិងជំរុញការរៀបចំ ព្រឹត្តិការណ៍"តាកែវសង្ក្រាន្តឆ្នាំ២០២៦"។អញ្ជើញជាអធិបតីក្នុងកិច្ចប្រជុំនោះដោយ ឯកឧត្ដម វ៉ីសំណាង អភិបាលនៃគណៈអភិបាលខេត្តតាកែវ ព្រមទាំងមានការអញ្ជើញចូលរួមពីលោក លោកស្រីអភិបាលរងខេត្តតាកែវ ប្រធាន អនុប្រធានមន្ទីរអង្គភាពជុំវិញខេត្ត អភិបាល អភិបាលរងក្រុង-ស្រុក មន្ត្រីរាជការ និងកងកម្លាំងប្រដាប់អាវុធ ចូលរួមជាច្រើនរូបផងដែរ។កិច្ចប្រជុំនេះរៀបចំឡើងនៅសាលប្រជុំ ច្រកចេញចូលតែមួយរដ្ឋបាលខេត្តតាកែវ កាលពីព្រឹកថ្ងៃច័ន្ទ១១រោចខែចេត្រឆ្នាំម្សាញ់សប្ដស័កព.ស២៥៦៩ ត្រូវនឹងថ្ងៃទី13 ខែមេសា ឆ្នាំ2026។
     
មានប្រសាសន៍សំណេះសំណាលក្នុងពិធីនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានសម្ដែងនូវការកោតសរសើរយ៉ាងខ្លាំងចំពោះ អនុគណៈកម្មការនិងក្រុមការងារទាំងអស់ ដែលបានខិតខំប្រឹងប្រែងរៀបចំទីតាំងសួនច្បារមាត់បឹងតាកែវ ឱ្យក្លាយជាកន្លែងកម្សាន្តដ៏ស្រស់ត្រកាល និងមានសុវត្ថិភាពខ្ពស់បំផុត។
     
ឯកឧត្តម វ៉ី សំណាង បានមានប្រសាសន៍បន្តថា ព្រឹត្តិ្កការណ៍តាកែវសង្ក្រាន្តឆ្នាំនេះ យើងបានការរៀបចំជា "ភូមិមរតកវប្បធម៌ប្រវត្តិសាស្ត្រ" "ភូមិល្បែងប្រជាប្រិយ" និងតំបន់"តាកែវភូមិកំណើតខ្ញុំ" ដែលឆ្លុះបញ្ចាំងពីអត្តសញ្ញាណដ៏វិសេសវិសាលនៃដែនដីអរិយធម៌តាកែវ។ការសម្ដែងសិល្បៈចម្រុះទាំងបុរាណ  សម័យ និងប្រពៃណី ព្រមទាំងការបាញ់កាំជ្រួចអបអរសាទរឆ្នាំថ្មីដ៏ស្រស់ស្អាតនៅពេលរាត្រី ហើយក្នុងនោះអាជ្ញាធរបានត្រៀមកម្លាំងប្រចាំការការពារសន្តិសុខ របៀបរៀបរយ និងសម្រួលចរាចរណ៍យ៉ាងតឹងរ៉ឹង ដើម្បីធានាភាពកក់ក្ដៅជូនភ្ញៀវកម្សាន្ត។

     
ឯកឧត្តមអភិបាលខេត្ត បានមានប្រសាសន៍បន្ថែមថា ព្រឹត្តិការណ៍"តាកែវសង្ក្រាន្តឆ្នាំ2026" នឹងប្រព្រឹត្តទៅរយៈពេល បីថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦។អ្វីដែលកាន់តែប្លែកនិងអស្ចារ្យសម្រាប់ឆ្នាំនេះ គឺមានការដង្ហែរក្បួនព្យុហយាត្រាអមដោយ "ព្រ័ត្រយក្សប្រវែង៨០ម៉ែត្រ" និងការដាក់តាំងពិព័រណ៍ម្ហូបអាហារល្បីៗប្រចាំខេត្តតាកែវ សម្រាប់ឱ្យភ្ញៀវជាតិ និងអន្តរជាតិបានភ្លក់រសជាតិ និងស្វែងយល់ពីវប្បធម៌ខ្មែរ។

ឯកឧត្តម វ៉ី សំណាង បានអំពាវនាវដល់បងប្អូនប្រជាពលរដ្ឋ យុវជន យុវនារី និងភ្ញៀវទេសចរណ៍ទាំងអស់ អញ្ជើញមកចូលរួមលេងកម្សាន្តឱ្យបានច្រើនកុះករ ដើម្បីញ៉ាំងឱ្យបរិយាកាសបុណ្យចូលឆ្នាំថ្មី ឆ្នាំមមីអដ្ឋស័កព.ស២៥៧០ ក្នុងខេត្តតាកែវកាន់តែមានភាពអធិកអធម និងសប្បាយរីករាយក្រោមដំបូលនៃសុខសន្តិភាព៕
     
ដោយ អ៊ុច សៀង