AKP កំពង់ឆ្នាំង ថ្ងៃទី១៣ ខែមេសា ឆ្នាំ២០២៦--លោកជំទាវ កែ ច័ន្ទមុនី អ្នកតំណាងរាស្រ្តមណ្ឌលកំពង់ឆ្នាំង និងឯកឧត្តម ស៊ុន សុវណ្ណារិទ្ធិ អភិបាលខេត្ត និងលោកជំទាវ ឯកឧត្តម ឡុច វណ្ណារ៉ា សមាជិកក្រុមប្រឹក្សាខេត្ត និងក្រុមការងារ នៅថ្ងៃទី១៣ ខែមេសា ឆ្នាំ២០២៦នេះ បានអញ្ជើញចុះជួបសំណេះសំណាល និងពិសាអាហារសាមគ្គីជាមួយបងប្អូនប្រជាពលរដ្ឋចំនួន២ឃុំ ក្នុងស្រុកកំពង់លែង ខេត្តកំពង់ឆ្នាំង ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៦៩ ឈានចូល២៥៧០ ខាងមុខនេះ។

មានប្រសាសន៍សំណេះសំណាលក្នុងឱកាសនោះ លោកជំទាវ កែ ច័ន្ទមុនី និងឯកឧត្តម ស៊ុន សុវណ្ណារិទ្ធិ បានថ្លែងថា ការចុះជួប និងរួមអាហារសាមគ្គីពេលនេះគឺជាការគិតគូរ និងបង្កើតនូវការសាមគ្គីភាពកាន់តែគៀកជិត និងចង់ដឹងពីទុក្ខកង្វល់របស់បងប្អូនក្នុងមូលដ្ឋានដែលបានជួបប្រទះកន្លងមក ដើម្បីធ្វើការដោះស្រាយជូនបងប្អូនទាន់ពេលវេលា។

ឆ្លៀតក្នុងពេលនោះ លោកជំទាវក៏បានពាំនាំនូវការផ្តាំផ្ញើការសាកសួរសុខទុក្ខពីសំណាក់ថ្នាក់ដឹកនាំប្រមុខរាជរដ្ឋាភិបាល ពិសេសសម្តេចមហាបវរធិបតី ហ៊ុន ម៉ាណែត នាយករដ្ធមន្រ្តី នៃព្រះរាជាណាចក្រកម្ពុជា តែងតែគិតគូរបងប្អូនគ្រប់កាល:ទេស:។

លោកជំទាវ និងឯកឧត្តមអភិបាលខេត្តបានជូនពរចំពោះបងប្អូនប្រជាពលរដ្ធទាំងអស់ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ ព្រះនាម «រាក្យសាទេវី» តាមបីបាច់ថែរក្សាបងប្អូន អោយបានសេចក្តីសុខសប្បាយគ្រប់ពេលវេលា។ ឆ្លៀតក្នុងឱកាសឯកឧត្តមអភិបាលខេត្តបានផ្តល់ជូននូវឯកសណ្ឋានដល់ប្រជាការពារទាំង២ឃុំ និងផ្តល់ភេសជ្ជ:មួយចំនួនផងដែរ៕

ដោយ AKP