AKP ភ្នំពេញ ថ្ងៃទី១៣ ខែមេសា ឆ្នាំ២០២៦--ស្របពេលដែលពិធីបុណ្យចូលឆ្នាំថ្មីប្រពៃណីជាតិកាន់តែ ជិតឈានមកដល់នៅថ្ងៃស្អែកនេះ តំបន់ទេសចរណ៍ជាច្រើនក្នុងប្រទេសកម្ពុជាកំពុងមមាញឹកតុបតែងលម្អ រៀបចំទីតាំង និងត្រៀមរៀបចំកន្លែងសម្រាប់អង្គុយកម្សាន្តជូនដល់ភ្ញៀវទេសចរជាតិ និងអន្ដរជាតិ ព្រមទាំងបងប្អូនមកពីទីជិតឆ្ងាយចូលកម្សាន្តសប្បាយ។

ពិធីបុណ្យចូលឆ្នាំថ្មី ក៏កាន់តែរំកិលជិតឈានមកដល់នៅថ្ងៃស្អែកនេះហើយ ដែលសហគមន៍ខ្លះ បានត្រៀមលក្ខណៈកម្សាន្ត និងមានល្បែងប្រជាប្រិយនៅក្នុងតំបន់ទីតាំងរបស់ខ្លួន ដើម្បីទាក់ទាញទេសចរ ព្រមទាំងមានការលក់ដូរចំណីអាហារ ដែលជាឱកាសបង្កើនចំណូលសេដ្ឋកិច្ចមូលដ្ឋានយ៉ាងសំខាន់របស់ពួកគាត់។

សម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំ២០២៦នេះ ត្រូវនឹងឆ្នាំមមី អដ្ឋស័ក ពុទ្ធសករាជ ២៥៧០ ដែលនឹងឈានចូលមកដល់ និងដែលមានរយៈពេល៣ថ្ងៃ ពោលគឺចាប់ពីថ្ងៃទី១៤-១៥ និងទី១៦ ខែមេសា ឆ្នាំ២០២៦។

នៅទីតាំងទឹកធ្លាក់ថ្មក្រាល ស្ថិតនៅភូមិកោះក្ទម្ព ឃុំ ជៀប ស្រុកទឹកផុស ដែលមានចម្ងាយប្រមាណ ៥៧ គីឡូម៉ែត្រ ពីក្រុងកំពង់ឆ្នាំង ខេត្តកំពុងឆ្នាំង និងក៏នៅក្បែររាជធានីភ្នំពេញ កំពុងរង់ចាំភ្ញៀវទេសចរចូលទៅទស្សនាលំហែកាយ ក្នុងពិធីបុណ្យចូលឆ្នាំថ្មីខាងមុខ។ តំបន់ទេសចរណ៍ទឹកធ្លាក់មួយកន្លែងនេះ អ្នកទេសចរ អាច ស្រស់ស្រូបអាហារជុំគ្រួសារ ឬជួបជុំមិត្តភក្តិ នៅក្រោមម្លប់ឈើដ៏ត្រឈឹងត្រឈៃ កម្សាន្តជាមួយនូវទឹកធ្លាក់ដ៏សែនត្រជាក់ លាងជម្រះនូវភាពនឿយហត់ តប់ប្រមល់ ទុក្ខសោកទាំងឡាយឱ្យហូរទៅតាមទឹក និងនាំមកវិញនូវភាពស្រស់ស្រាយ សប្បាយចិត្តជំនួសវិញ។

លោក អ៊ឺត អូន ប្រធានសហគមន៍តំបន់ការពារធម្មជាតិភ្នំជើងលៀង ដែលស្ថិតនៅតំបន់ទឹកធ្លាក់ថ្មក្រាល បានប្រាប់ឱ្យដឹងថា បុណ្យចូលឆ្នាំប្រពៃណីខ្មែរក្នុងឆ្នាំនេះដែរ សហគមន៍ចាំស្វាគមន៍ភ្ញៀវទេសសចរចូលទៅកម្សាន្ត ហើយពេលនេះសហគមន៍កំពុងរៀបចំខ្លួនយ៉ាងល្អសម្រាប់ភ្ញៀវទេសចរមកពីគ្រប់ទិសទី។ លោកបានអះអាងថា ក្នុងមួយរដូវចូលឆ្នាំខ្មែរនេះ យ៉ាងហោចណាស់មានភ្ញៀវទេសចរចូលកម្សាន្តជាង៣ម៉ឹននាក់ ផងដែរ ដែលក្នុងនេះ ក៏មានភ្ញៀវទេសចរបរទេសប្រមាណ៣០ភាគរយ និងភ្ញៀវទេសចរក្នុងស្រុក ជាជនជាតិខ្មែរប្រមាណ៧០ភាគរយ។

ស្រដៀងគ្នានេះដែរ សហគមន៍ទេសចរណ៍ធម្មជាតិទឹកធ្លាក់ជីអាំង មានចម្ងាយពីទីរួមខេត្តមណ្ឌលគិរី៤៥គីឡូម៉ែត្រ ស្ថិតនៅភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី គឺតំបន់ទេសចរណ៍នៅភាគឦសានប្រទេសកម្ពុជាកំពុងត្រៀមខ្លួនយ៉ាងល្អ ដើម្បីរង់ចាំភ្ញៀវទេសចរចូលកម្សាន្តក្នុងពិធីបុណ្យចូលឆ្នាំប្រពៃណីខ្មែរខាងមុខ។

ប្រធានសហគមន៍តំបន់ទេសចរណ៍កន្លែងមួយនេះគឺ លោក សាគុណ ជូស បានបញ្ជាក់ប្រាប់ឱ្យដឹងផងដែរថាពេលនេះ ការសម្អាតអនាម័យ ការរៀបចំតុបតែង ពិសេសការរៀបចំទីកន្លែងកម្សាន្តសម្រាប់ភ្ញៀវនៅសហគមន៍ទេសចរណ៍ធម្មជាតិទឹកធ្លាក់ជីអាំងកំពុងដំណើរការយ៉ាងល្អ។ លោកប្រធានសហគមន៍បានបន្ដទៀតថា បុណ្យចូលឆ្នាំថ្មីក្នុងឆ្នាំនេះ មិនត្រឹមតែកម្សាន្តសម្រាប់តំបន់ទេសចរណ៍ទេ គឺនៅទីកន្លែងនេះក៏មានរបាំប្រពៃណីជនជាតិដើមភាគតិច អាហារប្រចាំមូលដ្ឋាន កន្លែងបោះតង់ កន្លែងអង្គុយកម្សាន្ត កន្លែងងូតទឹក និងពិសេសកន្លែងកម្សាន្តជាល្បែងប្រជាប្រិយក៏មានរង់ចាំភ្ញៀវទេសចរទីជិតឆ្ងាយដែរ។

បើយើងនិយាយពីតំបន់ទេសចរណ៍ក្នុងខេត្ដមណ្ឌលគិរីគឺតំបន់ដែលមានសក្ដានុពលទេសចរណ៍ធម្មជាតិ ជាពិសេសតំបន់សហគមន៍ជនជាតិដើមភាគតិចរស់នៅ ដែលបង្ហាញពីទំនៀមទម្លាប់ ប្រពៃណី និងការរស់នៅរហូតមកដល់ពេលបច្ចុប្បន្ននេះ។ ជាក់ស្ដែង តួយ៉ាងដូចជា តំបន់ទឹកធ្លាក់ឡែងកៅ គឺជាទីកន្លែងទឹកធ្លាក់ទេសចរណ៍មួយកន្លែងថ្មីរបស់បងប្អូនជនជាតិដើមភាគតិចពូនង(ព្នង) ខណៈពេលបច្ចុប្បន្ននេះ តំបន់ទឹកធ្លាក់ឡែងកៅគឺគោលដៅសំខាន់ថ្មី ដែលគេមិនអាចមើលរំលងបានសោះឡើយ។

អ្នកស្រី ច្រេង បេត ប្រធានសហគមន៍ទឹកធ្លាក់ឡែងកៅ បានប្រាប់ឱ្យដឹងថា ទឹកធ្លាក់ដែលមានប្រវត្តិផ្សាភ្ជាប់ព្រេងនិទាន និងមានភាពស្រស់ស្អាតពីធម្មជាតិអំណោយផលមួយនេះ បានទទួលប្រជាប្រិយយ៉ាងឆាប់រហ័ស។ អ្នកស្រីបានលើកឡើងថា តំបន់កម្សាន្តនៅទីកន្លែងនេះ មានបម្រើរបាំប្រពៃណីជនជាតិដើមភាគតិចពូនង ដោយភ្ញៀវទេសចរអាចមទស្សនាផ្ទះស្នាក់ និងពិសេសជាងនេះគឺមានទទួលសេវាធ្វើម្ហូបអាហារបែបជនជាតិដើមភាគតិច។ ក្រៅពីសេវ៉ាកម្មទាំងនេះ ប្រជាសហគមន៍ក៏មានទីតាំងបោះតង់ សេវានាំដើរកម្សាន្តព្រៃភ្នំ មើលទេសភាពដ៏ស្រស់ត្រកាល ស្តាប់ និងមើលសត្វព្រៃ ងូតទឹកជ្រោះកម្សាន្តសប្បាយ ជាដើម។

សូមជម្រាបជូនថា ទឹកធ្លាក់ ឡែងកៅ ដែលជាតំបន់កម្សាន្តកន្លែងថ្មីនេះ មានទឹកធ្លាក់ធម្មជាតិ ៣ជាន់ ដែលលាក់ខ្លួនក្នុងព្រៃក្រាស់ ដែលអ្នកទេសចរអាចលំហែកាយដោយបោះតង់ បរិភោគម្ហូបអាហារបែបជនជាតិ ទិញបន្លែផ្លែឈើធម្មជាតិ  និងការសម្តែងសិល្បៈប្រពៃណីបែបជនជាតិដើមភាគតិចពូនង។ ទីតាំងទឹកធា្លក់មួយកន្លែងនេះ មានចម្ងាយប្រមាណ១គីឡូម៉ែត្រ ពីផ្លូវជាតិលេខ៧៦ ឬហួសស្នាក់ការអូររាំង នៃដែនជម្រកសត្វព្រៃកែវសីមាជាង១គីឡូម៉ែត្រ។

ឥឡូវនេះ យើងងាកមកចាប់អារម្មណ៍នៅសហគមន៍តំបន់ការពារធម្មជាតិ ពាមក្រសោប ឯណោះវិញ គឺជាតំបន់ទេសចរណ៍ នៃសមុទ្របែបធម្មជាតិមួយស្ថិតនៅក្នុងភូមិ បាងកាយ៉ាក ឃុំពាមក្រសោប ស្រុកមណ្ឌលសីមា ខេត្ត កោះកុង ដែលតំបន់នេះ បានបង្ហាញការប្តេជ្ញាចិត្តពីការរង់ចាំភ្ញៀវទេសចរចូលកម្សាន្តក្នុងពិធីបុណ្យចូលឆ្នាំប្រពៃណីខ្មែរ រួចជាស្រេច។

សហគមន៍តំបន់ការពារធម្មជាតិពាមក្រសោបគឺជាតំបន់ទេសចរណ៍ដ៏សំខាន់ និង ទាក់ទាញបំផុតមួយរបស់ខេត្តកោះកុង ដែលទីកន្លែងនេះមានសក្តានុពលទាក់ទាញបំផុតក្នុងតំបន់នេះមានដូចជា ព្រៃកោងកាង ប្រព័ន្ធអេកូឡូស៊ី ជីវៈចម្រុះ គ្រប់ប្រភេទជាជម្រកសត្វក្នុងទឹក ទីកន្លែងចិញ្ចឹមគ្រំចំពុះទា សត្វផ្សោត ជាដើម។

លោក សៀក សាបុន ប្រធានសហគមន៍តំបន់ការពារធម្មជាតិពាមក្រសោប បានគូសបញ្ជាក់ថា សហគមន៍របស់លោកក្រៅពីទេសភាព នៃ តំបន់ទឹកដីសមុទ្រដ៏ស្អាតអស្ចារ្យហើយ នៅសម្បូរអាហារបែបសមុទ្ររង់ចាំឱ្យបរិភោគច្រើនមុខណាស់ ក្នុងនោះរាប់ទាំងគ្រំចំពុះទា ក្តាមថ្ម ក្តាមផ្គរលាន់ ក្តាមសេះ បង្គា មឹក និងម្ហូបសមុទ្រជាច្រើនទៀត កំពុងរង់ចាំភ្ញៀវទេសចរគ្រប់ពេលវេលា។

នៅមិនឆ្ងាយប៉ុន្មានពីតំបន់ការពារធម្មជាតិពាមក្រសោប ដែលស្ថិតនៅខេត្ដកោះកុងប៉ុន្មាននោះទេ យើងអាចត្រឡប់មកកម្សាន្ដនៅខេត្ដកំពង់ស្ពឺវិញម្ដង ដែលស្ថិតនៅសហគមន៍តំបន់ការពារធម្មជាតិចំបក់ ស្ថិតនៅក្បែរឧទ្យានជាតិគិរីរម្យ ដែលមានទេសភាពស្រស់ស្អាត ដើមឈើដុះអមសងខាងផ្លូវប្រដេញគ្នា និងមានអាកាសធាតុត្រជាក់គួរឱ្យចង់គយគន់។ 

លោក ទូច ម៉ន ប្រធានសហគមន៍តំបន់ការពារធម្មជាតិចំបក់ ស្ថិតនៅភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ ជាប់ដែនឧទ្យានជាតិគិរីរម្យបានប្រាប់ឱ្យដឹងដែរថា បុណ្យចូលឆ្នាំប្រពៃណីខ្មែរឆ្នាំ២០២៦នេះ សហគមន៍របស់លោកកំពុងមមាញឹកជាមួយសមាជិកសហគមន៍ និងសហការជាមួយអាជ្ញាធរមូលដ្ឋាន សម្រាប់រៀបចំល្បែងប្រជាប្រិយតាមវត្ត និងតំបន់មួយចំនួនទៀត ដើម្បីឱ្យពលរដ្ឋ ពិសេសភ្ញៀវទេសចរបានកម្សាន្តសប្បាយ។ លោកប្រធានសហគមន៍តំបន់ការពារធម្មជាតិចំបក់រូបនេះបានឱ្យដឹងទៀតថា បច្ចុប្បន្ន សហគមន៍មានសមាជិក សរុប៦៩៦គ្រួសារ និង ផ្ទៃដីរបស់សហគមន៍គ្រប់គ្រងរាល់ថ្ងៃគឺមាន ៣ ៣៨២ ហិចតា។ លោកបានអះអាងថា៖ នៅសហគមន៍ទឹកធ្លាក់ចំបក់គឺមានទឹកជ្រោះធម្មជាតិមានសម្រស់ទេសភាពស្អាត និងទាក់ទាញភ្ញៀវទេសចរជាច្រើន ដោយសារមានទេសភាពព្រៃព្រឹក្សា នៅតាមផ្លូវពោរពេញដោយព្រៃឬស្សីដ៏ក្រាស់ឃ្មឹក ដែលជាម្លប់ដ៏ត្រឈឹងត្រឈៃ ដែលកម្សាន្តមិនចេះនឿយណាយសោះឡើយ»។

សូមបញ្ជាក់ផងដែរថា សម្រាប់ក្រុមសហគមន៍តំបន់ទេសចរណ៍បង្ហាញការសាទរ និងត្រៀមលក្ខណៈស្វាគមន៍ភ្ញៀវទេសចរឱ្យបានច្រើនបំផុត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ដើម្បីជំរុញសេដ្ឋកិច្ចមូលដ្ឋានរបស់ពួកគាត់។ ការរៀបចំសង្រ្កាន្ត និងតំបន់ទេសចរណ៍ទូទាំងប្រទេស នឹងត្រូវពង្រឹងគុណភាព និងសុវត្ថិភាព ដើម្បីទាក់ទាញភ្ញៀវស្នាក់នៅរយៈពេលយូរថ្ងៃក្រោយពីទទួលបានជោគជ័យយ៉ាងខ្លាំងកាលពីឆ្នាំមុនៗកន្លងមក៕

ដោយ៖ មករា និង រិទ្ធី