AKP សៀមរាប ថ្ងៃទី១៣ ខែមេសា ឆ្នាំ២០២៦--ដើម្បីអបអរសាទពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ២៥៧០ ដែលនឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៤ រហូតដល់ថ្ងៃទី១៦ ខែមេសា ឆ្នាំ២០២៦ខាងមុខនេះ រដ្ឋបាលខេត្តសៀមរាប សហការជាមួយសហភាពសហព័ន្ឋយុវជនកម្ពុជាខេត្ត និងអង្គភាពមន្ទីរពាក់ព័ន្ឋ គ្រោងនឹងរៀបចំកម្មវិធីកម្សាន្តជាច្រើន នៅតាមដងស្ទឹងសៀមរាប និងនៅសួនមាត់ស្ទឹង ដើម្បីអញ្ជើញភ្ញៀវទេសចរជាតិ និងអន្តរជាតិ ឱ្យមកចូលរួមកម្សាន្ត និងឈ្វេងយល់ពីប្រពៃណីខ្មែរ ជាពិសេសជំរុញកំណើនសេដ្ឋកិច្ច និងលើកកម្ពស់វិស័យទេសចរណ៍ ផងដែរ។

ជាមួយគ្នានេះ នៅក្នុងចំណោមកម្មវិធីកម្សាន្តជាច្រើនដែលបានត្រៀមរួចជាស្រាចហើយនោះ រដ្ឋបាលខេត្តសៀមរាប ក៏ត្រៀមរៀបចំការប្រកួតអុំ ទូកផ្កាចារ ទូកនាគ និងទូកង នៅដងស្ទឹងសៀមរាប ដើម្បីជាការអបអរសាទបុណ្យចូលឆ្នាំថ្មីប្រពៃណីជាតិខ្មែរ និងទាក់ទាញភ្ញៀវទេសចរជាតិ និងអន្ដរជាតិឱ្យមកកម្សាន្ត នៅខេត្តសៀមរាបឱ្យបានកាន់តែច្រើនផងដែរ។

លោក ស៊ុន ចំណាន នាយកទីចាត់ការរដ្ឋបាលសាលាខេត្តសៀមរាបបានឱ្យដឹងថា ដោយមានការផ្តួចផ្តើមពីសំណាក់ឯកឧត្តម ប្រាក់ សោភ័ណ អភិបាលខេត្តសៀមរាប ក្នុងការចូលរួមពង្រឹងសមត្ថភាពកីឡាកអុំទូក និងឈានទៅរៀបចំការប្រកួតអន្តរជាតិក្នុងខេត្ត រដ្ឋបាលខេត្ត នឹងរៀបចំការប្រកួតអុំទូកផ្កាចារ ទូកនាគ និងទូកង ដែលមានរយៈពេល២ថ្ងៃ ថ្ងៃទី១៤-១៥ ខែមេសា ២០២៦ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ ដើម្បីទាក់ទាញភ្ញៀវទេសចរផង និងដើម្បីចូលរួមចំណែកលើកស្ទួយវិស័យកីឡាអុំទូកផង។ លោកបានបន្ដថា ការប្រគួតអុំទូកនេះធ្វើឡើងដោយ រដ្ឋបាលខេត្តសៀមរាបសហការជាមួយសហព័ន្ធកីឡាទូកកានូ និងរ៉ូអ៊ីងកម្ពុជា និងវិស័យឯកជន ដែលមានកីឡាករចំនួន ៤ក្រុម ស្មើនឹង ១២០នាក់ មកពី ស្រុកពួក ១ក្រុម និងក្រុងសៀមរាប ២ក្រុម។

លោកនាយកទីចាត់ការរដ្ឋបាលសាលាខេត្តបានលើកឡើងថា នេះជាលើកទី១ហើយ ដែលខេត្តសៀមរាបមានការរៀបចំការប្រកួតអុំ ទូកផ្កាចារ ទូកនាគ និងទូកង នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នៅតាមដងស្ទឹងសៀមរាប។ លោកបានបញ្ជាក់បន្ថែមថា ការប្រគួតនេះ និងចាប់ផ្តើមពីម៉ោង១រហូតដល់ម៉ោង៤រសៀល នាថ្ងៃទី១៤ និងថ្ងៃទី១៥ ខែមេសា ឆ្នាំ២០២៦។ បន្ទាប់ពីការប្រគួតទូកចប់ កម្មវិធីកម្សាន្តផ្សេងៗក៏នឹងដំណើរការបន្តបន្ទាប់។
លោក ស៊ុន ចំណាន បានរំពឹងថា ការប្រកួតអុំ ទូកផ្កាចារ ទូកនាគ និងទូក ង នេះ នឹងក្លាយជាផ្ទាំងទស្សនីភាពមួយ ដែលមានភាពទាក់ទាញ ហើយលោកសង្ឃឹមថា ភ្ញៀវទេសចរជាតិ និងអន្តរជាតិ នឹងអញ្ជើញមកទស្សនាកម្សាន្តឱ្យបានច្រើនកុះករ នៅតាមបណ្តោយស្ទឹងសៀមរាប។

ទាក់ទងនឹងការប្រកួតទូតនេះដែរ លោក ព្រំ រិទ្ធី ជាកីឡាករម្នាក់មកពីតំបន់ភ្នំក្រោមនៃក្រុងសៀមរាប បានបញ្ជាក់ថា សម្រាប់ក្រុមពួកលោក នេះគឺជាលើកទី១ហើយ ដែលបានប្រណាំងទូកនាគ។ ប៉ុន្តែទោះជាយ៉ាងនេះក្តី ក្នុងនាមជាកីឡាករ គឺត្រូវតែប្រឹងប្រែងហ្វឹកហាត់យ៉ាងយកចិត្តទុកដាក់ និងមានក្តីរំពឹងយកឈ្នះការប្រគួតរហូតដល់៨០%។ លោក រិទ្ធី ក៏បានបង្ហាញពីអារម្មណ៍សប្បាយរីករាយដោយបាននិយាយតាមរយៈទឹកមុខដ៏មុតមុតមាំយ៉ាងដូច្នេះថា៖ ខ្ញុំមានការសប្បាយរីករាយ ដែលអាជ្ញាធរខេត្តបានយកចិត្តទុកដាក់លើកស្ទួយវិស័យកីឡាអុំទូកដើម្បីធ្វើឱ្យកីឡាករអុំទូករបស់យើងកាន់តែមានសមត្ថភាព និងចូលរួមប្រកួតអន្តរជាតិនាពេលខាងមុខទទួលបានជ័យជម្នះ»។

សូមបញ្ជាក់ផងដែរថា បើទោះបីឆ្នាំនេះ ខេត្តសៀមរាប មិនមានរៀបចំព្រឹត្តិការណ៍អង្គរសង្ក្រាន្ត ក៏ពិតមែន ប៉ុន្តែរដ្ឋបាលខេត្តសៀមរាប បានសហការជាមួយសហភាពសហព័ន្ឋយុវជនកម្ពុជាខេត្ត និងអង្គភាពមន្ទីរពាក់ព័ន្ឋ គ្រោងនឹងរៀបចំកម្មវិធីកម្សាន្ត ក្រោមគោលបំណងដើម្បីផ្សព្វផ្សាយវប្បធម៌ ប្រពៃណី ទំនៀមទម្លាប់ និងកម្មវិធីកម្សាន្តផ្សេងៗជាច្រើនទៀត ដើម្បីអញ្ជើញភ្ញៀវទេសចរជាតិ និងអន្តរជាតិ ឱ្យមកចូលរួមកម្សាន្ត និងឈ្វេងយល់ពីប្រពៃណីខ្មែរ ជាពិសេសជំរុញកំណើនសេដ្ឋកិច្ច និងលើកកម្ពស់វិស័យទេសចរណ៍ ផងដែរ។ នៅក្នុងឱកាសចូលឆ្នាំថ្មីប្រពៃណីជាតិខ្មែរ ក្នុងរយៈពេល៣ថ្ងៃ ខេត្តសៀមរាប នឹងរៀបចំកម្មវិធីទទួលទេវតាឆ្នាំថ្មី ការសម្តែងសិល្បៈចម្រុះ ល្បែងប្រជាប្រិយ ជិះទូកកម្សាន្ត រាំស្គរដៃ ស្តង់ពិព័រណ៌ និងសកម្មភាព ផ្សេងៗតាមតំបន់ នៅតាមបណ្តោយស្ទឹងសៀមរាប ចាប់ពីស្ពានថ្មព្រះរាជដំណាក់ រហូតទៅដល់ស្ពានថ្មផ្សារចាស់ក្រុងសៀមរាប ខេត្តសៀមរាប៕

ដោយ៖ ឃុត សៅ