AKP កំពង់ស្ពឺ ថ្ងៃទី១២ ខែមេសា ឆ្នាំ២០២៦ -- ជារៀងរាល់ឆ្នាំ មុនពេលពិធីបុណ្យចូលឆ្នាំប្រពៃណីជាតិខ្មែរ នឹងឈានជិតចូលមកដល់នោះ បងប្អូនប្រជាពលរដ្ឋដែលរស់នៅក្នុងខេត្ដកំពង់ស្ពឺ ក៏ដូចជារាជធានី ខេត្ដ ដែលនៅក្បែរនោះ តែងតែនាំគ្នារៀបចំកម្មវិធីប្រឡងប្រណាំងរទេះគោលឿន ដើម្បីចូលរួមអបអរសាទរបុណ្យចូលឆ្នាំថ្មី ការជួបជុំគ្នាសប្បាយរីករាយ និងចូលរួមថែរក្សានូវវប្បធម៌ ទំនៀមទម្លាប់ប្រពៃណី និងមរតកដែលបានបន្សល់ទុកតាំងពីដូនតាមក។ 

ស្របពេលដែលការប្រឡងការប្រណាំងរទេះសាឡី គោលឿន ដែលបានធ្វើឡើង កាលពីអំឡុងដើមខែមេសា ឆ្នាំ ២០២៦ កន្លងមក ដោយមានអ្នកចូលរួមបានកើនឡើងគួរកត់សម្គាល់ ខណៈកាលពីឆ្នាំ២០២៥ មានត្រឹមអ្នកចូលរួមប្រកួតចំនួន៥០នឹម ហើយឆ្នាំ២០២៦នេះ បានកើនឡើង៨០នឹមនោះ ធ្វើឱ្យអ្នកប្រណាំរទេះគោ បង្ហាញការសប្បាយចិត្ត និងប្តេជ្ញាថែរក្សាវប្បធម៌ការប្រណាំងគោរបស់ខ្មែរនេះឱ្យបានស្ថិតស្ថេរយូរអង្វែង។

ការប្រណាំងរទេះសាឡី គោលឿន ឆ្នាំ២០២៦ នេះត្រូវបានរៀបចំឡើង នៅក្នុងទីលានប្រកួត ស្ថិតនៅភូមិស្នោទី១ សង្កាត់រកាធំ ក្រុងច្បារមន ខេត្តកំពង់ស្ពឺ កាលពីថ្ងៃទី៥ ខែមេសា ឆ្នាំ២០២៦ ដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលនឹងឈានចូលមកដល់ និងក៏ដូចជាលើកស្ទួយវប្បធម៌ប្រពៃណីបុរាណរបស់ខ្មែរ ពិសេសរទេះគោដែលជារបស់ដូនតាខ្មែរ បានបន្សល់ទុកដ៏យូរលង់មកហើយ។ 

ក្នុងពេលបញ្ចប់ការរៀបចំប្រកួតនេះលោក ស៊ុន មានជ័យ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ស្ពឺ បានបញ្ជាក់ថា ចំនួនអ្នកចូលរួមប្រកួតបានកើនឡើងជាបន្តបន្ទាប់ ដែលក្នុងឆ្នាំ២០២៥កន្លងមក មានចំនួនតែ៥០នឹមគោទេ ដែលបានចូលរួម ប៉ុន្តែសម្រាប់ឆ្នាំ២០២៦នេះ មានអ្នកចូលរួមរហូតដល់៨០នឹម ក្នុងនេះ ការប្រកួតមានគោ២ប្រភេទចូលរួមគឺ គោនឹមតូច និងប្រភេទនឹមធំ ។ លោកប្រធានមន្ទីរបានបន្ដថា សម្រាប់នឹមតូចចូលរួមមានចំនួន៥០នឹម ឯនឹមធំមានចំនួន ៣០នឹម ដែលការប្រកួតនេះមានចំនួន២ថ្ងៃ ពោលគឺកាលពីថ្ងៃទី៤ ខែមេសា ឆ្នាំ ២០២៦ ប្រកួតគោនឹមតូចជម្រុះ ដោយយកត្រឹម៦នឹម មកប្រកួតបូកជាមួយគោនឹមធំចំនួន៣០នឹមសរុបមានចំនួន៣៦ បានចូលរួមប្រកួតនៅថ្ងៃទី៥ ខែមេសា ឆ្នាំ ២០២៦ដើម្បីប្រកួតផ្តាច់ព្រ័ត្រ។

លោកប្រធានមន្ទីរបានលើកឡើងថា តាមរយៈការមើលឃើញសារៈប្រយោជន៍នៃការប្រណាំងរទេះសាឡី គោលឿន របស់ចាស់បុរាណខ្មែរ ដើម្បីលើកស្ទួយវិស័យវប្បធម៌ ប្រពៃណីខ្មែរមួយនេះកាន់តែខ្ពស់ត្រដែតថែមទៀតមន្ទីរវប្បធម៌ខេត្ដ ក៏ដូចជាភាគីពាក់ព័ន្ធ គ្រោងនឹងធ្វើការសិក្សាស្រាវជ្រាវបំពេញបន្ថែមនូវឯកសារមួយចំនួនដើម្បីស្នើសុំមន្រ្តីជំនាញពីក្រសួងវប្បធម៌ និងវិចិត្រសិល្បៈដើម្បីបញ្ចូលការប្រណាំងរទេះសាឡី គោលឿនឱ្យទៅជាសម្បត្តិបេតិកភណ្ឌជាតិ។

ជាមួយគ្នានេះ លោក សុខ វណ្ណៈ រស់នៅក្នុងស្រុកសំរោងទង ខេត្តកំពង់ស្ពឺ និងជាអ្នកចូលរួមប្រកួតផងដែរនោះបានឱ្យដឹងថា លោកបានចូលរួមប្រកួតប្រណាំងរទេះគោនេះបានចំនួន៥លើកមកហើយ ដែលការប្រកួតកន្លងមកលោកបានទទួលជ័យលាភីលេខ២ និងលេខ៣។ លោក វណ្ណៈ ចាត់ទុកថា៖ «ការប្រឡងប្រណាំងរទេះគោនេះក្រៅអំពីអបអរសាទរពិធីបុណ្យចូលឆ្នាំថ្មីហើយនៅបញ្ជាក់ពីប្រពៃណីរបស់ចាស់បុរាណខ្មែរយើងដ៏ល្អផូរផង់ថែមទៀត»។

លោក វណ្ណៈ ដែលជាអ្នកប្រណាំងរទេះគោរូបនេះក៏បានប្រាប់ឱ្យដឹងដែរថា លោកមានឪពុកជាអ្នកស្រឡាញ់គោ និងចូលចិត្តចិញ្ចឹមគោ ហេតុនេះលោក ក៏សម្រេចចិត្តចូលរួមប្រកួត និងម្យ៉ាងចង់ចូលរួមថែរក្សាការប្រណាំងរទេះគោចាស់បុរាណខ្មែរ ផងដែរ។

កំពុងតែជិះនៅលើរទេះ ដៃម្ខាងកំពុងតែកាន់ខ្សែគោ និងដៃម្ខាងទៀតកំពុងតែអង្អែលគោដែលទើបនឹងឈប់នោះលោក បូរិន សុធី អ្នកប្រណាំងរទេះគោម្នាក់ មកពីភូមិព្រៃពពេល ឃុំក្រាំងម្កាក់ ស្រុកអង្គស្នួល ខេត្តកណ្តាលបានរៀបរាប់ឱ្យដឹងថា ការប្រណាំងរទេះគោខ្មែរយើងពិតជាពិសេសណាស់ ហើយការប្រណាំនេះវាក៏បានឆ្លុះបញ្ជាំពីប្រពៃណីដូនតាខ្មែរយើង។ លោក សុធី ក៏ចង់ឱ្យមានការប្រណាំនេះកាន់តែទូលំទូលាយ និងពិសេសចង់ឱ្យបរទេសបានស្គាល់ប្រពៃណីប្រណាំរទេះគោនេះលើឆាកអន្តរជាតិ។

មិនខុសគ្នានេះដែរ លោក យឹម យីម អ្នកប្រណាំងគោតូចម្នាក់ទៀត នៅស្រុកថ្ពង ខេត្តកំពង់ស្ពឺ ក៏បានប្រាប់ថាលោកស្រឡាញ់ ពេញចិត្ដការចិញ្ចឹមគោតាំងតែពីកុមារមក ហេតុនេះនៅពេលមានការប្រណាំងរទេះគោលោកក៏សម្រេចចិត្តចូលរួមប្រកួតតែម្តង។ បុរសអាយុជាង៣០ឆ្នាំរូបនេះ ក៏បានអះអាងដែរថា៖ «ប្រណាំងរទេះគោពិតជាពិសេសណាស់ពីព្រោះថាវាក្រៅពីបង្ហាញប្រពៃណីខ្មែរ ហើយវាក៏បានបង្ហាញពីក្តីសប្បាយរីករាយក្នុងការប្រណាំងដើម្បីអបអរសាទរបុណ្យចូលឆ្នាំថ្មីរបស់យើងផង»។
 

ដោយសារតែការស្រឡាញ់ចូលចិត្ដ និងចង់ថែរក្សានូវរទេះគោ ដែលដូនតាខ្មែរយើងបានបន្សល់ទុករហូតមកដល់ពេលបច្ចុប្បន្ននេះ យុវជន ហេង ណារារ៉ាត់ រស់នៅឃុំបែកចាន ស្រុកអង្គស្នួល ខេត្តកណ្តាល បានបញ្ជាក់ប្រាប់ឱ្យដឹងដែរថា លោកពុំមានបងប្អូន ឬសាច់ញាតិ ជាអ្នកធ្លាប់ប្រណាំងរទេះគោទេ តែលោកចង់ចូលរួមប្រកួតព្រោះការប្រណាំងរទេះគោនេះ ក្រៅអំពីការចូលរួមថែរក្សាប្រពៃណីដូនតាខ្មែរ លោកក៏ចង់ឱ្យក្មេងជំនាន់ក្រោយបានស្គាល់ដើម្បីចូលរួមថែរក្សាប្រពៃណីមួយនេះឱ្យបានគង់វង្ស។ តាមរយៈការប្រណាំរទេះគោនេះដែរ លោកហេង ណារារ៉ាត់ ចង់ឱ្យមានការប្រកួតឱ្យបានច្រើនខេត្ត និងពង្រីកការប្រកួតឱ្យបានធំដើម្បីទាក់ទាញវិស័យទេសចរណ៍នៅថ្ងៃខាងមុខ។

ចំណែកលោក អ៊ី ទៀប អ្នកប្រណាំងរទេះគោម្នាក់ទៀត មកពីខេត្តកំពង់ស្ពឺ ដែលកំពុងអង្គុយលើរទេះគោត្រៀមចេញដំណើរក្នុងការប្រកួតហើយនោះ ក៏បានបង្ហាញនូវការពេញចិត្ត សម្រាប់ការចូលរួមប្រកួតមួយនេះ ហើយលោកចង់ឱ្យកូនចៅជំនាន់ក្រោយបានឃើញបានស្គាល់ ពិសេសបរទេសបានចូលរួមទស្សនាកាន់តែច្រើន ដើម្បីជួយលើកស្ទួយដល់វិស័យទេសចរណ៍របស់ប្រទេសខ្មែរយើង។

គួរបញ្ជាក់ថា ការប្រណាំងរទេះសាឡី គោលឿន នាឆ្នាំ២០២៦នេះ ជាលទ្ធផល ផ្នែកគោធំលេខ១ បានទៅលើលោក ស្រី ចាន់ ដែលមានគោឈ្មោះ សួស្តី ស្តារិច មកពីខណ្ឌកំបូល រាជធានីភ្នំពេញ, លេខ២ បានទៅលើ លោក សឿន មករា ដែលមានគោ ឈ្មោះ អានីព្រើតមែន មកពីខេត្តកំពង់ស្ពឺ និង លោក ប្រាក់ ពិសី ដែលមានគោឈ្មោះអាថាវរិន មកពីខេត្តកំពង់ស្ពឺ។ ចំណែកផ្នែកគោតូចលេខ១ បានទៅលើ លោក ប៉ូ រដ្ឋា ដែលមានគោឈ្មោះថា ច័ន្ទរះ, លេខ២ បានទៅលើលោក ផន គន្ធា ដែលមានគោឈ្មោះ អាពេជ្រ និងលេខ៣ បានទៅលើ លោក វី វិរៈ មកពី ខេត្តកំពង់ស្ពឺ។

យោងតាមប្រធានមន្ទីវប្បធម៌ និងវិចិត្រសិល្បៈខេត្តកំពង់ស្ពឺបានឱ្យដឹងថា ការប្រណាំងរទេះសាឡី គោលឿននេះ ត្រូវបានគេដឹងថាមានដើមកំណើត និង ដំបូងគេនៅក្នុងខេត្តកំពង់ស្ពឺ។ គោលបំណងចម្បងនៃការប្រារព្ធពិធីប្រណាំងរទេះសាឡីគោលឿន ឆ្នាំ២០២៦ គឺចូលរួមអភិរក្ស លើកស្ទួយ អភិវឌ្ឍន៍ និងផ្សព្វផ្សាយឱ្យកាន់តែទូលំទូលាយស្របតាមបរិបទនៃសង្គមបច្ចុប្បន្ន នូវប្រពៃណីប្រណាំងរទេះសាឡី គោលឿន នៅក្នុងខេត្តកំពង់ស្ពឺ ដែលបុព្វបុរសខ្មែរបានបន្សល់ទុកជាយូរណាស់មកហើយ។ បន្ថែមពីនេះទៀត ដើមឡើយរទេះសាឡីគោ ប្រើប្រាស់សម្រាប់តែដឹក ជញ្ជូនបណ្ណាការក្នុងពិធីអាពាហ៍ពិពាហ៍ និងដឹកជញ្ជូន លោក យាយ លោកតា ចូលរួមក្នុងពិធីអាអាពាហ៍ពិពាហ៍ ពីធីបុណ្យប្រពៃណី និងពីធីបុណ្យផ្សេងៗទៀតតែប៉ុណ្ណោះ។ លុះក្រោយៗមកទៀត អ្នកភូមិក៏បានផ្តួចផ្តើមគំនិត បង្កើតពិធីប្រណាំងរទេះសាឡីគោនេះនៅតាមភូមិ នៅតាមសហគមន៍ រហូតនៅតាមទីប្រជុំជន ដើម្បីអបអរមុន ពិធីបុណ្យចូលឆ្នាំថ្មីប្រពៃណីជាតិ ដែលនឹងឈានចូលមកដល់ ៕

ដោយ៖ មករា និង រិទ្ធី