AKP ភ្នំពេញ ថ្ងៃទី១២ ខែមេសា ឆ្នាំ ២០២៦ – ដើម្បីបង្កើនការចិញ្ចឹមត្រីច្រើនប្រភេទ ឱ្យបានបរិមាណច្រើន សមាគមវារីវប្បករ នៅកម្ពុជា បានរៀបចំដំណើរទស្សនកិច្ចសិក្សាស្វែងយល់ ស្តីពី ពិពិធកម្មវារីវប្បកម្ម ដោយបានដឹកនាំវារីវប្បករសំខាន់ៗចំនួន២០រូបពីខេត្តកំពង់ចាម កំពង់ធំ និង សៀមរាបទៅទស្សនាកសិដ្ឋានចិញ្ចឹមបង្កង ត្រីក្រាញ់ និង ទីឡាព្យាក្រហម និង ខ្សែច្រវាក់តម្លៃតាមប្រភេទត្រី ក្នុង ខេត្ត តាកែវ។

សមាគមវារីវប្បករ នៅកម្ពុជា ឱ្យដឹងថា ក្នុងដំណើរទស្សនកិច្ចនេះក្រុមវារីវប្បករកម្ពុជាបាន ស្តាប់ពីបទពិសោធន៍អាជីវកម្មរបស់កសិដ្ឋានក្នុងខេត្តតាកែវ ពីការផ្សាំកូនត្រីពូជ និងកូនត្រីជំទង់សម្រាប់ការផ្គត់ផ្គង់តាមកិច្ចសន្យាលើប្រភេទត្រីក្រាញ់សម្រាប់ក្រុមហ៊ុនវារីវប្បករខ្មែរ សម្រាប់ចិញ្ចឹមយកសាច់នៅតាមកសិដ្ឋានដៃគូរបស់ក្រុមហ៊ុន រួចក្រុមហ៊ុនទិញត្រីសាច់យកវិញ។

ក្នុងដំណើរទស្សនកិច្ចនេះ គណៈប្រតិភូបានសិក្សាពីទីផ្សារ និងបច្ចេកទេសផ្សាំត្រីទីឡាព្យាពូជ និង បច្ចេកទេសចិញ្ចឹមត្រីក្រាញ់យកសាច់ដោយប្រើចំណីសម្រេច១០០ភាគរយ  និងបង្កងសាច់។ក្នុងដំណើរទស្សនកិច្ចនេះដែរ គណៈប្រតិភូបានសិក្សាពីទីផ្សារ និង បច្ចេកទេសផ្សាំកូនបង្កង និង ចិញ្ចឹមបង្កងសាច់ ព្រមទាំងការបំប៉នកូនត្រីប្រាផងដែរ។

សមាគមវារីវប្បករនៅកម្ពុជា ឱ្យដឹងដែរថា តាមរយៈដំណើរទស្សនកិច្ចសិក្សារយៈពេលបីថ្ងៃចាប់ពីថ្ងៃទី៨ដល់ទី១០ ខែមេសា ឆ្នាំ២០២៦នេះគេអាចវាយតម្លៃបានថា ការធ្វើពិពិធកម្មវារីវប្បកម្មចាំបាច់ត្រូវការប្រភពទីផ្សារ និង ព័ត៌មានច្បាស់លាស់ដើម្បីឱ្យវារីវប្បកររបស់យើងបង្កើនការវិនិយោគ និង បង្វែរចេញពីប្រភេទត្រីដែលវារីវប្បករក្នុងស្រុកផលិតបានច្រើនដែលធ្វើឱ្យតម្លៃនៅមាត់ស្រះមិនមានស្ថេរភាពណាមួយនោះ៕

ដោយ៖ មករា