AKP ភ្នំពេញ ថ្ងៃទី១១ ខែមេសា ឆ្នាំ២០២៦--
ដោយសារតែពិធីបុណ្យចូលឆ្នាំថ្មីប្រពៃណីជាតិខ្មែរកាន់តែខិតជិតចូលមកដល់ហើយ ជាពិសេសក្នុងឆ្នាំ២០២៦នេះ រដ្ឋបាលរាជធានីភ្នំពេញ ក៏នឹងត្រូវត្រៀមរៀបចំព្រឹត្ដិការណ៍ “នគរសង្ក្រាន្ដ” ថែមទៀតផងនោះ ហើយបើគិតរហូតមកដល់ពេលនេះ អាជ្ញាធរធានីភ្នំពេញបាននិងកំពុងតែរៀបចំតុបតែងលម្អសោភណភាពនៅតាមដងផ្លូវ សួនច្បារសាធារណៈ កន្លែងកម្សាន្ដនានា ផ្លូវតាមមាត់ទន្លេ និងរមណីយដ្ឋានវត្ដភ្នំ គឺធ្វើជិតរួចរាល់អស់ហើយ។ 
ជាមួយគ្នានេះ អាជ្ញាធររាជធានីភ្នំពេញ បានបញ្ជាក់ឱ្យដឹងដែរថា កម្លាំងស្នងការដ្ឋាននគរបាលរាជធានីភ្នំពេញបានត្រៀមលក្ខណៈរួចរាល់ហើយ ដើម្បីធានាឱ្យបានទាំងស្រុងនូវសន្ដិសុខ សណ្ដាប់ធ្នាប់ និងសុវត្ថិភាពរបៀបរៀបរយសាធារណៈ ជូនប្រជាពលរដ្ឋ ដែលអញ្ជើញមកកម្សាន្ដសប្បាយក្នុងពិធីបុណ្យចូលឆ្នាំថ្មីប្រពៃណីជាតិខ្មែរ និងព្រឹត្ដិការណ៍ “នគរសង្ក្រាន្ដ” នៅរាជធានីភ្នំពេញ។
ឯកឧត្ដម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការ នៃស្នងការដ្ឋាននគរបាលរាជធានីភ្នំពេញបានគូសបញ្ជាក់ថា អាជ្ញាធររាជធានីភ្នំពេញ បានត្រៀមប្រើប្រាស់កម្លាំងប្រមាណ ៣ ៦០០ នាក់ ដើម្បីការពារសន្តិសុខ សណ្ដាប់ធ្នាប់ និងសុវត្ថិភាព ជូនភ្ញៀវទេសចរជាតិ-អន្ដរជាតិ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០។

ថ្លែងក្នុងកិច្ចប្រជុំគណៈបញ្ជាការឯកភាពរាជធានី កាលពីថ្ងៃទី៨ ខែមេសា ឆ្នាំ២០២៦ នៅសាលារាជធានីភ្នំពេញ ឯកឧត្ដម ឧត្តមសេនីយ៍ឯកបានលើកឡើងថា ការត្រៀមកងកម្លាំងការពារសន្ដិសុខ សុវត្ថិភាព និងសណ្ដាប់ធ្នាប់សាធារណៈនេះ គឺជាការចូលរួមថែរក្សាការពារទំនៀមទម្លាប់ ប្រពៃណី វប្បធម៌ដ៏ល្អផូរផង់របស់ជាតិ ដើម្បីទាក់ទាញភ្ញៀវទេសចរជាតិ-អន្តរជាតិ ជាពិសេសបង្ហាញពីការដឹងគុណយ៉ាងជ្រាលជ្រៅ និងផ្សារភ្ជាប់ពិធីបុណ្យចូលឆ្នាំថ្មីនេះដែរ ខណៈយើងក៏មិនត្រូវភ្លេចវីរៈកងកម្លាំងជួរមុខ និងបងប្អូនភៀសសឹក ក្រោមស្មារតីការរួបរួមសាមគ្គី នៃមហាគ្រួសារខ្មែរតែមួយ ផងដែរ ។ 
ឯកឧត្ដម ឧត្តមសេនីយ៍ឯកបានឱ្យដឹងទៀតថា កម្លាំងទាំងនេះ នឹងបែងចែកជាក្រុមសម្រួលចរាចរណ៍ ការពារកន្លែងជួបជុំ ជួយអន្ដរាគមន៍ភ្លាមៗ ឱ្យទាន់ពេលវេលា ពេលមានហេតុការណ៏កើតឡើង និងកម្លាំងអន្តរាគមន៍ពិសេស ដើម្បីធានាដល់ការដើរលេងកម្សាន្ដ និងផ្ដល់ភាពសប្បាយរីករាយជូនបងប្អូនប្រជាពលរដ្ឋរយៈពេល៦ថ្ងៃ ដែលបងប្អូន អញ្ជើញមកទស្សនាកម្សាន្ដ សង្ក្រាន្ដ នៅរាជធានីភ្នំពេញ។ 
យោងតាមផែនការកម្មវិធីរបស់រដ្ឋបាលរាជធានីភ្នំពេញ និងសហភាពសហព័ន្ធយុវជនកម្ពុជា(ស.ស.យ.ក)បានឱ្យដឹងថា សម្រាប់កម្មវិធីព្រឹត្ដិការណ៍ “នគរសង្ក្រាន្ដ”  មាន៦ទីតាំង នៅក្នុងរាជធានីភ្នំពេញ រួមមាន៖ ១. នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ, ២. តំបន់ជុំវិញវត្តភ្នំ, ៣. បរិវេណសួនច្បារវឌ្ឍនៈ សួនច្បារអតីតទីលានប្រជាធិបតេយ្យ, ៤. ស្ពាននាគភ្លោះរមណីយដ្ឋានវត្តភ្នំរហូតដល់ផ្សាររាត្រី, ៥. ផ្លូវថ្មើរជើងចតុមុខរាជធានីភ្នំពេញ(Walk Street)រហូតបរិវេណបាសាក់លែន(Bassac Lane) និង ៦. បរិវេណផ្សារទួលទំពូង។  

ក្នុងកិច្ចប្រជុំគណៈបញ្ជាការឯកភាពរាជធានីនេះដែរ ឯកឧត្ដម ឃួង ស្រេង អភិបាលរាជធានីភ្នំពេញបានបញ្ជាក់ ថា  អាជ្ញាធររាជធានីភ្នំពេញ បានត្រៀមរៀមចំទទួលភ្លៀវជាតិ-អន្ដរជាតិ ចូលទស្សនាកម្សាន្តក្នុងព្រឹត្តិការណ៍ “នគរសង្ក្រាន្ត” នៅតាមទីតាំងទាំង៦កន្លែង ប្រកបដោយភាពសប្បាយរីករាយ ក្រោមម្លប់សន្តិភាព ដ៏ត្រជាក់ត្រជំ និងក្រោមស្មារតីសាមគ្គីភាព ឯកភាព និងភាពធន់។ ឯកឧត្ដមបានបញ្ជាក់បន្ថែមថា ដើម្បីឱ្យការរៀបចំព្រឹត្តិការណ៍នេះប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈល្អប្រសើរ ព្រមទាំងបញ្ចៀសបាននូវការកកស្ទះចរាចរណ៍នៅជុំវិញទីតាំង រៀបចំព្រឹត្តិការណ៍ អាជ្ញាធរមានសមត្ថមកិច្ច បានរៀបចំចំណតយានយន្ត គ្រប់ប្រភេទជូន សម្រាប់បងប្អូនប្រជាពលរដ្ឋដែលមកចូលរួមកម្សាន្តក្នុងព្រឹត្តិការណ៍ “នគរសង្ក្រាន្ត” នេះ។ ឯកឧត្ដមអភិបាលរាជធានីភ្នំពេញ ក៏សូមអំពាវនាវ និងលើកទឹកចិត្តដល់បងប្អូនប្រជាពលរដ្ឋដែលពុំមានការចាំបាច់ សូមធ្វើការពង្វាងការធ្វើដំណើរឆ្លងកាត់បរិវេណទីតាំងខាងលើ ផងដែរ ។    
ជាមួយគ្នានេះ ឯកឧត្តម ឃួង ស្រេង ក៏បានណែនាំឱ្យអាជ្ញាធរមូលដ្ឋាន ជួយផ្សព្វផ្សាយដល់ក្រុមហ៊ុនឯកជននានា តាមភោជនីយដ្ឋាននិងស្ថាប័នពាក់ព័ន្ធ រៀបចំតុបតែង ដាក់តាំងលម្អភ្លើងពណ៌ ទង់ជាតិ ទង់ជ្វាលា ហើយនៅតាមផ្ទះប្រជាពលរដ្ឋ ត្រូវដាក់ទង់ជាតិគ្រប់ផ្ទះដើម្បីទទួលទេវតាឆ្នាំថ្មី ។ ទន្ទឹមនេះ មន្ទីរសាធារណការ និងដឹកជញ្ជូនរាជធានីភ្នំពេញ ត្រូវបូមលូឱ្យបានស្អាត ដើម្បីបំបាត់ក្លិនស្អុយ និងធ្វើឱ្យមានបរិស្ថានល្អ ជាពិសេសកាកសំណល់រឹង គិតគូរពីការប្រមូលសំរាមនៅទីតាំងសប្បាយភាពទាំងអស់នេះ។

ទាក់ទងនឹងការរៀបចំនៅតាមទីកន្លែងកម្សាន្ដសប្បាយ សម្រាប់ព្រឹត្ដិការណ៍ “នគរសង្ក្រាន្ដ” នៅរាជធានីភ្នំពេញនេះដែរ លោក ចាប ឌីណា អភិបាលរងខណ្ឌដូនពេញ ទទួលផ្នែក សន្ដិសុខ សណ្ដាប់ធ្នាប់សាធារណៈ បានបញ្ជាក់ឱ្យដឹងថា អាជ្ញាធរខណ្ឌរួមជាមួយសង្កាត់ បានត្រៀមកម្លាំង៥០០នាក់ ដោយបែងចែកជា៥ក្រុម ក្នុងមួយក្រុម១០០នាក់ ។ លោកបានបន្ដថា ក្រុមទី១ ទទួលផ្នែកសន្ដិសុខ សណ្ដាប់ធ្នាប់សាធារណៈ និងសង្គ្រោះបន្ទាន់, ក្រុមទី២ ទទួលផ្នែកបរិស្ថាន, ក្រុមទី៣ ទទួលផ្នែកអប់រំ ព័ត៌មាន តាមបណ្ដាគោលដៅសំខាន់ៗ នៃពិធីកន្លែងសប្បាយភាព នគរសង្ក្រាន្ដ ទាំង៦ទីតាំង, ក្រុមទី៤ ទទួលរៀបចំសណ្ដាប់ធ្នាប់ទូទៅ និងក្រុមទី៥ ទទួលសម្រួលចរាចណ៍តាមបណ្ដាគោលដៅសំខាន់ៗ នៃពិធីនេះ។ 

បន្ថែមពីនេះទៀត លោកស្រី ដោ សម្ឆស្ស អ្នកនាំពាក្យសាលារាជធានីភ្នំពេញបានឱ្យដឹងដែរថា សម្រាប់កម្មវិធីសប្បាយភាព “នគរសង្ក្រាន្ដ” ក្នុងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ២០២៦ រដ្ឋបាលរាជធានីភ្នំពេញ មានកម្មវិធីជាច្រើន ក្នុងនោះ នៅរមណីយដ្ឋានវត្ដភ្នំ គឺមានការលេងល្បែងប្រជាប្រិយ ដោយថ្ងៃទី១ មានវាយក្អម បោះអង្គុញ លោតបាវ ដណ្ដើមស្លឹកឈើ លាក់កន្សែង ស្ដេចចង់ និងទាញព្រ័ត្ន ដែលចូលរួមលេងសម្ដែងដោយមន្ទីរវប្បធម៌ និងវិចិត្រសិល្បៈរាជធានីភ្នំពេញ។ អ្នកនាំពាក្យរូបនេះបានបន្ដទៀតថា សម្រាប់ពេលយប់ ក៏មានល្ខោនបាក់សម្ដែង នៅមុខវត្ដបទុមវតី និងនៅផ្លូវថ្មើរជើងមាត់ទន្លេ (Walk Street) រួមទាំងចាប៉ីដងវែង សម្ដែងដោយមន្ទីរវប្បធម៌ និងវិចិត្រសីល្បៈ រាជធានីភ្នំពេញ ។ សម្រាប់ថ្ងៃទី២ ពេលថ្ងៃត្រង់ យើងលេងល្បែងប្រជាប្រិយនៅវត្ដភ្នំ យើងមានកម្មវិធីសប្បាយភាពដូចថ្ងៃទី១ដែរ និងកម្មវិធីថ្ងៃទី៣ យើងក៏មានលេងល្បែងប្រជាប្រិយ ដូចថ្ងៃទី១ដែរ៕

ដោយ៖ សួស សំរិត