AKP ភ្នំពេញ ថ្ងៃទី១០ ខែមេសា ឆ្នាំ២០២៦ -- សម្តេចកិត្ដសង្គហបណ្ឌិត ម៉ែន សំអន បានបញ្ជាក់ថា អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។ សម្តេចកិត្តិសង្គហបណ្ឌិត ម៉ែន សំអន ប្រធានសមាគមមិត្តភាពកម្ពុជា-វៀតណាម និងឯកឧត្តម ត្រិន កឹមទូ សមាជិកប្រចាំការគណៈលេខាមជ្ឈិមបក្សកុម្មុយនីស្តវៀតណាម បានបញ្ជាក់បែបនេះ ក្នុងពិធីជួបសំណេះសំណាលជាមួយអតីតនិស្សិតកម្ពុជា ដែលទទួលបានការបណ្តុះបណ្តាលនៅប្រទេសវៀតណាម នៅសណ្ឋាគារសូហ្វីតែល ភូគីត្រា រាជធានីភ្នំពេញ កាលពីរសៀលថ្ងៃសុក្រ ៨រោច ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១០ ខែមេសា ឆ្នាំ២០២៦ នេះ។

លោក អ៊ុច លាង ប្រធានសមាគមអតីតនិស្សិតកម្ពុជា មកពីប្រទេសវៀតណាម ក៏បានធ្វើសេចក្តីរាយការណ៍អំពីវឌ្ឍនៈភាពការងាររបស់សមាគម ព្រមទាំងបានលើកឡើងអំពីកិច្ចខិតខំប្រឹងប្រែងរបស់សមាគមក្នុងការផ្សារភ្ជាប់ទំនាក់ទំនង ពិសេសការជួយសម្របសម្រួលគ្រប់ការងារពាក់ព័ន្ធនឹងនិស្សិតកម្ពុជាដែលទទួលបានការបណ្តុះបណ្តាលនៅវៀតណាម។

សម្តេចកិត្តិសង្គហបណ្ឌិត ម៉ែន សំអន ក៏បានលើកឡើងអំពីទំនាក់ទំនងរវាងកម្ពុជា-វៀតណាម គឺជាទំនាក់ទំនងដែលមានចរិតលក្ខណៈប្រវត្តិសាស្ត្រ រួមសុខរួមទុក្ខ និងជួយគ្នាទៅវិញទៅមកក្នុងគ្រប់កាលៈទេសៈ ក្រោមទិសស្លោក «អ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង »។ ប្រទេសទាំងពីរបានពង្រឹងចំណងសាមគ្គីភាពកាន់តែស្អិតរមួតពីមួយថ្ងៃទៅមួយថ្ងៃ ក្នុងបរិបទនាយុគសម័យឌីជីថល និងការប្រកួតប្រជែងសកល ដោយវិស័យអប់រំគឺជាសសរស្តម្ភដ៏សំខាន់បំផុត។

ជាច្រើនទសវត្សរ៍កន្លងមកនេះ រដ្ឋាភិបាលវៀតណាមបានផ្ដល់អាហារូបករណ៍ដល់និស្សិតកម្ពុជារាប់ពាន់នាក់ ទៅសិក្សានៅលើទឹកដីវៀតណាម ក្មួយៗដែលអង្គុយនៅទីនេះ គឺជា "ធនធានមនុស្សដ៏មានសក្តានុពល" និងមានតម្លៃនៃកិច្ចសហប្រតិបត្តិការនេះ។ សម្តេចកិត្តិសង្គហបណ្ឌិត ចាត់ទុកវត្តមានរបស់ឯកឧត្តម ត្រិន កឹមទូ នាពេលនេះ គឺជាសក្ខីភាពបញ្ជាក់យ៉ាងច្បាស់អំពីការយកចិត្តទុកដាក់ខ្ពស់របស់បក្សរដ្ឋ និងប្រជាជនវៀតណាម ដែលបានឧបត្ថម្ភ គាំទ្រដល់កម្ពុជា ជាពិសេសលើវិស័យអប់រំ និងការបណ្ដុះបណ្ដាល ធនធានមនុស្ស។ ការជួបជុំក្នុងឱកាសដ៏មានអត្ថន័យនេះ បង្ហាញឱ្យឃើញពីការបន្តពង្រឹងទំនាក់ទំនងមិត្តភាពប្រពៃណី ការយោគយល់គ្នា និងសហប្រតិបត្តិការរវាងប្រជាជននៃប្រទេសទាំងពីរ។

ឯកឧត្តម ត្រិន កឹមទូ សមាជិកប្រចាំការគណៈលេខាមជ្ឈិមបក្សកុម្មុយនីស្តវៀតណាម ក៏បានបង្ហាញនូវចំណាប់អារម្មណ៍អំពីទំនាក់ទំនងកិច្ចសហប្រតិបត្តិការរវាងប្រទេសទាំងពីកម្ពុជា-វៀតណាម ដែលធ្វើឱ្យមានការរីកចម្រើនលើគ្រប់វិស័យ ដែលក្នុងនោះទំហំវិនិយោគនៃប្រទេសទាំងពីរសម្រេចបានដល់ ១១ពាន់លានដុល្លារអាម៉េរិកនៅក្នុងឆ្នាំ២០២៥ ហើយបើទោះបីដើមឆ្នាំ ឆ្នាំ២០២៦ សេដ្ឋកិច្ចពិភពលោកមានការលំបាក ក៏ទំហំពាណិជ្ជកម្មរវាងប្រទេសទាំងពីរនៅតែល្អប្រសើរ។ ឯកឧត្តម បានបន្តថា តាមរយៈកិច្ចសហប្រតិបត្តិការផ្សេងៗ ត្រូវបានជំរុញបន្ថែមឱ្យកាន់តែល្អប្រសើរ ជាពិសេសការបណ្តុះបណ្តាលធនធានមនុស្ស វិស័យសុខាភិបាល ដែលជាផ្លែផ្កានៃទំនាក់ទំនងល្អរវាងថ្នាក់ដឹកនាំនៃប្រទេសទាំងពីរ។ ឯកឧត្តម បានអបអរសាទរ និងវាយតម្លៃខ្ពស់ចំពោះសមិទ្ធផលផលជាច្រើនរបស់ប្រទេសកម្ពុជាសម្រេចបាននាពេលកន្លងមកនេះ ដែលបានលើកកម្ពស់ជីវភាពរស់នៅប្រទេសកម្ពុជាកាន់តែប្រសើរឡើង។ ឯកឧត្តម សង្ឃឹមជឿជាក់យ៉ាងមុតមាំថា អតីតនិស្សិតកម្ពុជាដែលបានទៅសិក្សានៅប្រទេសវៀតណាមនឹងក្លាយជាស្ពានផ្សារភ្ជាប់ទំនាក់ទំនងកាន់តែល្អប្រសើរឡើងបន្ថែមទៀតរវាងប្រទេសទាំងពីរ និងសូមឱ្យទំនាក់ទំនងមិត្តភាព ប្រពៃណី សន្តិភាព ដែលថ្នាក់ដឹកនាំជាច្រើនជំនាន់បានពូនជ្រំ និងបន្តអភិវឌ្ឍន៍ជាផលប្រយោជន៍រវាងកម្ពុជា-វៀតណាម កាន់តែប្រសើរឡើងបន្ថែមទៀត ដើម្បីសន្តិភាព នៅក្នុងតំបន់ និងសកលលោក៕

ដោយ៖ សួស សំរិត