AKP ‎កំពង់ស្ពឺ ថ្ងៃទី១០ ខែមេសា ឆ្នាំ២០២៦ -- នៅសាលប្រជុំ វ៉ីសំណាង រដ្ឋបាលខេត្តកំពង់ស្ពឺ បានរៀបចំពិធីសំណេះសំណាលជាមួយថ្នាក់ដឹកនាំ និងមន្ត្រីរាជការ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ ដែលនឹងឈានចូលមកដល់នាពេលដ៏ខ្លីខាងមុខនេះ ក្រោមអធិបតីភាព ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត និងលោកជំទាវ ម៉េង វ៉ាន់ដានីន ព្រមទាំង ឯកឧត្តម យឹម សុខុម ប្រធានក្រុមប្រឹក្សាខេត្ត ដោយមានការអញ្ជើញចូលរួមពីសំណាក់លោក លោកស្រី ជាអភិបាលរងខេត្ត ប្រធានមន្ទីរអង្គភាពជុំវិញខេត្ត និងមន្ត្រីរាជការនៃសាលាខេត្តយ៉ាងច្រើនកុះករ។‌‎

ក្នុងឱកាសដ៏វិសេសវិសាលនោះ ឯកឧត្តមបណ្ឌិតអភិបាលខេត្ត បានមានប្រសាសន៍សំណេះសំណាល ថ្លែងនូវការសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីរាជការគ្រប់លំដាប់ថ្នាក់ ដែលបានលះបង់កម្លាំងកាយចិត្តក្នុងការបម្រើសេវាសាធារណៈ និងចូលរួមអភិវឌ្ឍន៍ខេត្តកំពង់ស្ពឺឱ្យមានការរីកចម្រើនលើគ្រប់វិស័យនាពេលកន្លងមក។

‌‎ទន្ទឹមនឹងនេះ ឯកឧត្តមបណ្ឌិត ក៏បានពាំនាំនូវប្រសាសន៍សាកសួរសុខទុក្ខ និងពរជ័យមង្គលពីសំណាក់ថ្នាក់ដឹកនាំជាន់ខ្ពស់ជូនដល់មន្ត្រីរាជការទាំងអស់ សូមឱ្យទទួលបាននូវសុខភាពល្អបរិបូរណ៍ និងសេចក្តីសុខក្នុងក្រុមគ្រួសារ ក្នុងឱកាសនៃពិធីបុណ្យចូលឆ្នាំថ្មី ប្រពៃណីជាតិខ្មែរនេះផងដែរ។

ដោយ៖ ម៉ែន ប៊ុនធីម