AKP កណ្តាល  ថ្ងៃទី១០ ខែមេសា ឆ្នាំ២០២៦---
ជារៀងរាល់ឆ្នាំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ជិតឈានចូលមកដល់ ប្រជាជានកម្ពុជាតែងតែនាំគ្នាសម្អាត តុបតែងផ្ទះសម្បែង និងរៀបចំសម្ភារៈផ្សេងៗ ដើម្បីត្រៀមទទួលទេវតាឆ្នាំថ្មី។ ក្រៅពីនេះ នៅតាមក្រសួង ស្ថាប័ន ឬក្រុមហ៊ុន វិស័យឯកជន ក៏បានរៀបចំ តុបតែងលម្អ ផ្កាភ្ញី សរសេរពាក្យសោ្លក បដា បិទនៅតាមរៀងៗខ្លួន ដើម្បីចូលរួមអបអរបុណ្យចូលឆ្នាំថ្មី។ 
ជាមួយនឹងការរៀបចំនេះដែរ មិនថាតែការរៀបចំនៅក្នុងរាជធានីភ្នំពេញ ឬវត្តអារាមនានានោះទេ សូម្បីតែនៅតាមដងផ្លូវ ទាំងផ្លូវជាតិ ផ្លូវខេត្ដ ផ្លូវលំ ឬក៏ផ្លូវចូលតាមក្រុង ស្រុក ភូមិ ក៏មានការរៀបចំតុបតែងលម្អ ដោយរៀបចំដាក់ជាបដា ពាក្យស្លោក ការដាក់ភ្លើងបំភ្លឺ និងការរចនារូបភាពផ្សេងៗថែមទៀតផង។
ជាក់ស្តែង បើយើងធ្វើដំណើរតាមផ្លូវជាតិលេខ២១ ចាប់រង្វង់មូលក្រុងតាខ្មៅ ខេត្ដកណ្ដាល ចន្លោះស្ពានលេខ១៦ ដល់ស្ពានលេខ២១ ដែលមានទីតាំងស្ថិតក្នុងស្រុកស្អាង ខេត្តកណ្តាល ក៏បានមើលឃើញការរៀបចំតុបតែងលម្អ ការដាក់តាំងរូបភាពផ្សេងៗគ្នាជាច្រើន នៅអមសងខាងផ្លូវ និងដាក់ចំមុខផ្ទះរបស់ប្រជាពលរដ្ឋ មើលទៅកាន់តែមានភាពទាក់ទាញ និងចាប់អារម្មណ៍ពីអ្នកធ្វើដំណើរឆ្លងកាត់តាមតំបន់នោះ។ 
នៅអមសងខាងផ្លូវគេឃើញប្រជាពលរដ្ឋបានរៀបចំចងទង់ជាតិខ្មែរ ទង់សាសនា ដែលកំពុងតែបក់រវិចៗ នៅអមជុំវិញផ្លូវជាតិលេខ២១ សិ្ថតនៅឃុំទឹកវិល ស្រុកស្អាង ខេត្តកណ្តាល ដើម្បីស្វាគមន៍ទេវតាឆ្នាំថ្មី។  អ្វីដែរគួរចាប់អារម្មណ៍ផងនោះ គឺនៅត្រង់ស្ពានលេខ១៦ បងប្អូនប្រជាពលរដ្ឋបានរៀបចំតុបតែងលម្អ រចនាជារូបភាពនិងបដាដោយសរសេរថា សួស្ដីឆ្នាំថ្មី យ៉ាងស្រស់ស្អាត នៅខាងមុខគេហដ្ឋាននីមួយៗដោយបានដាក់ដងទង់ជាតិ ទង់សាសនា ដោតតាមជាយចិញ្ចើមផ្លូវ ដោយមានគម្លាតស្មើៗគ្នា ព្រមទាំងមានចងទង់ខ្សែ ចតុកោណកែង គោមស្លឹកត្នោត មួកស្លឹកត្នោត និងរៀបចំដាក់ដុំចំបើង ជាដុំៗ ផងដែរ។ 
សម្រាប់ការរៀបចំតុបតែងនៅតាមដងផ្លូវនេះ អ្វីដែលឃើញជាក់ស្តែងនោះ បងប្អូនប្រជាពលរដ្ឋបានប្រើប្រាស់ជាមួយនឹងពាក្យ «សួស្តីឆ្នាំថ្មី! ភូមិព្រែកតាវ៉ា និងខ្ញុំស្រឡាញ់ភូមិខ្ញុំ» ព្រមទាំងរូបតុក្តា។ 

លោក យុន ស៊ីណាត ប្រធានយុវជនរៀបចំតុបតែងលម្អតាមដងផ្លូវ រស់នៅឃុំទឹកវិល ស្រុកស្អាងបានឱ្យដឹងថា ជាងរៀងរាល់ឆ្នាំពោលគឺឱ្យតែរដូវចូលឆ្នាំថ្មីប្រពៃណីជាតិ និងរដូវភ្ជុំបិណ្ឌ ប្រជាពលរដ្ឋរស់នៅភូមិព្រែកតាវ៉ា បាននាំគ្នាតុបតែងតាមដងផ្លូវជារៀងរាល់ឆ្នាំ។ លោកបន្ដថា នៅក្នុងភូមិព្រែកតាវ៉ានេះ មានការរៀបចំតាមដងផ្លូវតាំងតែពីដើមមកម្ល៉េះ ប៉ុន្តែមិនបានរៀបចំឱ្យបានស្អាតដូចពេលនេះទេ ព្រោះកាលពីពេលមុនខ្វះថវិកា។ តែដោយសារមានការចូលរួមពីសប្បុរសជនមួយចំនួនក្នុងការផ្តល់ជាថវិកា សម្ភារៈ រួមទាំងកម្លាំងផងនោះ លោកក៏បានដឹកនាំរៀបចំតុបតែង បានស្អាតបែបនេះ។ លោកបានរៀបរាប់បញ្ជាក់ថា៖ «ចាស់ៗពីមុនគាត់បានដើររ៉ៃអង្គាសថវិកាតាមផ្ទះ ប្រជាពលរដ្ឋដោយ ខ្លះចេញ១ពាន់រៀល ពីរពាន់រៀល ដើម្បីជួលម៉ាស៊ីនភ្លើងដាក់បំភ្លឺផ្លូវ។ តែមកដល់មានភ្លើងប្រើប្រាស់ តាមផ្ទះនីមួយៗទើបពួកខ្ញុំគិតឃើញរៀបចំតាមផ្ទះនីមួយៗឱ្យដូចៗគ្នា និងបានស្អាតដើម្បី ទទួលស្វាគមន៍បុណ្យចូលឆ្នាំថ្មី ដូចជាបុណ្យប្រពៃណីជាតិផ្សេងៗទៀត»។

លោក ស៊ីណាត ដែលជាប្រធានដឹកនាំយុវជនរៀបចំតុបតែងតាមដងផ្លូវ បានបញ្ជាក់ឱ្យដឹងទៀតថា បើតាមថ្នាក់ដឹកនាំស្រុកស្អាង គឺចង់ឱ្យមានការរៀបចំតុបតែបនៅតាមបណ្តាភូមិទាំងអស់ ឱ្យបានស្អាតបែបនេះ  ដើម្បីយកមកធ្វើការប្រកួតប្រជែងគ្នា ផងដែរ។ ការធ្វើបែបនេះ ដើម្បីទទួលបានសោភណភាពភូមិស្អាត បរិស្ថានស្អាត  ធ្វើ ឱ្យមានភាពទាក់ទាញពីអ្នកធ្វើដំណើរ។

លោកបានអះអាងផងដែរថា ការរៀបចំតុបតែងនេះ លោកនិងក្រុមការងារបានចំណាយពេលរៀបចំរយៈពេល១០ថ្ងៃមុនចូលឆ្នាំថ្មី ឈានមកដល់។ ទន្ទឹមនេះ ក្រុមយុវជនបានសហការរៀបចំតុបតែង ដោយអ្នកខ្លះចេញជាទង់ជាតិ ទង់សាសនា  ធ្វើគោម និងសម្ភារៈ ព្រមទាំងថវិកាមួយចំនួនទៀត ដើម្បីទទួលស្វាគមន៍ពិធីបុណ្យចូលឆ្នាំថ្មីប្រពៃណីជាតិខ្មែរ និងដើម្បីភូមិស្អាត។
ចំណែកលោក វណ្ឌី ជាប្រជាពលរដ្ឋរស់នៅស្រុកស្អាងម្នាក់ទៀតនោះ បាននិយាយថា ការរៀបចំតុបតែងលម្អនៅដងផ្លូវជាតិលេខ២១នេះ គឺមានភាពស្រស់ស្អាតមើលទៅគួរឱ្យទាក់ទាញ។ បន្ថែមពីនេះទៀត ប្រជាពលរដ្ឋនៅស្រុកស្អាង រួមទាំងផ្ទះលោកផងដែរ ជារៀងរាល់ឆ្នាំតែងតែរៀបចំតុបតែងដើម្បីទទួលស្វាគមន៍ទេវតាឆ្នាំ។ លោកវណ្ឌី បាននិយាយបញ្ជាក់យ៉ាងដូច្នេះថា៖ «ខ្ញុំឃើញបងប្អូនប្រជាពលរដ្ឋស្រុកស្អាង ពិសេសនៅស្ពានចន្លោះលេខ១៦ មក គាត់បានរៀបចំស្អាត ពេលខ្ញុំជិះកាត់ទៅធ្វើការតាមផ្លូវនេះ។ ខ្ញុំចង់ឱ្យប្រជាពលរដ្ឋនៅភូមិផ្សេងៗទៀតនៅស្រុកស្អាង ធ្វើបែបនេះដែរ ដើម្បីលើសម្រស់ សោភណភាពភូមិ ដូចអ្នកភូមិព្រែកតាវ៉ា អីញ្ចឹងដែរ»។

ជាមួយគ្នានោះដែរ លោក វណ្ឌី ក៏បានស្នើឱ្យថ្នាក់ដឹកនាំពិសេសគណៈពង្រឹងភូមិ ឃុំទាំងអស់នៅក្នុងស្រុកស្អាងគួរជួយលើកទឹកចិត្តប្រជាពលរដ្ឋឱ្យមានរៀបចំ ដើម្បីទទួលទេវតាឆ្នាំថ្មីជារៀងរាល់ឆ្នាំឱ្យបានស្អាតបែបនេះផង ។ លើសពីនេះ គណៈពង្រឹងភូមិ ឃុំ អាចបង្កើតមូលនិធិភូមិ ឃុំ សន្សំជាថវិកា ដើម្បីផ្តល់ឱ្យប្រជាពលរដ្ឋរៀបចំតាមដងផ្លូវ ឱ្យស្អាត ក្នុងការទទួលទេវតាឆ្នាំថ្មីបែបនេះ។
ពាក់ព័ន្ធនឹងការរៀបចំតុបតែងនៅតាមដងផ្លូវនៅក្នុងឃុំទឹកវិល ស្រុកស្អាង ខេត្តកណ្តាលនេះដែរ លោក ជ្រិន សៀង  មេឃុំទឹកវិល បានគូសបញ្ជាក់ថា ការរៀបចំតុបតែងនេះគឺធ្វើឡើងដោយមានការណែនាំពីថ្នាក់ដឹកនាំ ស្របនឹងការមានថវិកា ផងដែរទើបរៀបចំបាន។ លោកមេឃុំរូបនេះបញ្ជាក់បន្ថែមយ៉ាងដូច្នេះថា៖ «ការរៀបចំនេះ មានការចង្អុលពីថ្នាក់ដឹកនាំ ហើយក៏អាស្រ័យយើងមានថវិការៀបចំពីសប្បុរសជនផង  និងមានថវិកាសន្សំ ដែលប្រមូលផ្តុំគ្នាផង។ និយាយទៅ ការរៀបចំនេះត្រូវចំណាយថវិការ»។ លោកមេឃុំទឹកវិលបានឱ្យដឹងទៀតថា ការរៀបចំតុបតែងលម្អតាមដងផ្លូវនៅក្នុងភូមិនេះ ក្នុងគោលដៅ ដើម្បីអបអបសាទបុណ្យចូលឆ្នាំថ្មីប្រពៃណីជាតិខ្មែរ និងជួយលើកសោភណភាពភូមិ ឃុំឱ្យបានស្អាតល្អ ។  

បើតាមលោក ជ្រិន សៀង  នៅក្នុងឃុំទឹកវិលមាន១០ភូមិ ហើយលោកបានស្នើឱ្យប្រជាពលរដ្ឋ តាមភូមិនីមួយៗរៀបចំដោតទង់ជាតិ ដាក់ភ្លើង នៅតាមដងផ្លូវ ដើម្បីបង្កើតសោភណភាព កាន់តែស្រស់ស្អាត ខណៈការធ្វើបែបនេះ បានប្រព្រឹត្តទៅជារៀងរាល់ឆ្នាំ ។ លោកមេឃុំបានអះអាងទៀតថា៖ «យើងបានរៀបចំប្រមាណ៦ឆ្នាំមកហើយ តែមួយឆ្នាំៗយើងចេះតែរៀបចំកាន់តែឱ្យមានសោភណភាពស្អាតល្អ»។ 
ក្នុងឱកាសនោះដែរ លោក ជ្រិន សៀង បានបង្ហាញនូវទឹកចិត្ដផងដែរថា៖ «ក្នុងនាមជាប្រជាជាតិខ្មែរយើងត្រូវ តែលើកកម្ពស់ទិវាបុណ្យប្រពៃណីជាតិយើង ត្រូវធ្វើយ៉ាងណា បានគគ្រឹកគគ្រេង។ យើងធ្វើបែបនេះ ទី១. លើក កម្ពស់បុណ្យប្រពៃណីជាតិខ្មែរយើង  ទី២. បង្ហាញឱ្យឃើញការយកចិត្តទុកដាក់ក្នុងការសាមគ្គីជាតិ ឱ្យកាន់តែរឹងមាំ»៕

ដោយ៖ ប៊ុនរិទ្ធ