AKP ភ្នំពេញ ថ្ងៃទី១០ ខែមេសា ឆ្នាំ២០២៦ --សម្ដេចអគ្គមហាសេនាបតីតេជោ ហ៊ុន សែន បានលើកឡើងអំពីការពន្លឿនការបោះបង្គោលព្រំដែនរវាងប្រទេសទាំងពីរ (កម្ពុជា-វៀតណាម) ដែលនៅសេសសល់ ឱ្យបានចប់ជាស្ថាពរ និងឆាប់រហ័ស។ នេះបើយោងតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានអនុញ្ញាតឱ្យ ឯកឧត្តម Tran Cam Tu សមាជិកការិយាល័យនយោបាយ និងជាសមាជិកប្រចាំការ គណៈលេខាធិការមជ្ឈិមបក្សកុម្មុយនីស្តវៀតណាម ចូលជួបសម្ដែងការគួរ សម និងពិភាក្សាការងារ នាព្រឹកថ្ងៃទី១០ ខែមេសាឆ្នាំ២០២៦ នៅវិមានសាមគ្គីភាពនៃព្រឹទ្ធសភា ក្នុងខណដែលឯកឧត្ដមដឹកនាំគណប្រតិភូអញ្ជើញមកបំពេញទស្សនកិច្ចនៅកម្ពុជា។

ក្នុងជំនួបនោះ សម្ដេចតេជោបានសម្ដែងនូវក្ដីរីករាយនិងស្វាគមន៍ចំពោះឯកឧត្តម Tran Cam Tu និងប្រតិភូដែលបានអញ្ជើញមកបំពេញទស្សនកិច្ចនៅក្នុងប្រទេសកម្ពុជានាពេលនេះ។ សម្ដេចតេជោ បានចាត់ទុកដំណើរទស្សនកិច្ចជាន់ខ្ពស់របស់គណៈប្រតិភូមជ្ឈិមបក្សកុម្មុយនីស្តវៀតណាមមកកាន់ប្រទេសកម្ពុជា គឺបានបង្ហាញយ៉ាងច្បាស់អំពីទំនាក់ទំនងដ៏រឹងមាំរវាងកម្ពុជា និងវៀតណាម ហើយទស្សនកិច្ចនេះ ក៏បានបង្ហាញនូវនិមិត្តរូបនៃការជឿជាក់គ្នារវាងកម្ពុជា និងវៀតណាម។ 

ជាមួយគ្នានេះ ឯកឧត្តម Tran Cam Tu បានសម្ដែងនូវការអរគុណជាអនេកប្បការចំពោះសម្ដេចតេជោ ដែលបានអនុញ្ញាតឱ្យឯកឧត្ដម និងប្រតិភូបានជួបសម្ដែងការគួរសម និងពិភាក្សាការងារ។ ឯកឧត្ដមបានលើកឡើងថា ទំនាក់ទំនងកិច្ចសហប្រតិបត្តិការរវាងកម្ពុជា និងវៀតណាម នាពេលបច្ចុប្បន្ននេះ ទាំងនៅក្នុងក្របខ័ណ្ឌបក្ស ក្របខ័ណ្ឌរដ្ឋ គឺមានភាពស្អិររមួតនិងរឹងមាំ ហើយកន្លងទៅតាមរយៈការផ្លាស់ប្ដូរដំណើរទស្សនកិច្ចជាន់ខ្ពស់រវាងថ្នាក់ដឹកនាំបក្ស ថ្នាក់ដឹករដ្ឋនៃប្រទេសទាំងពីរ បានបង្ហាញយ៉ាងច្បាស់អំពីការលើកកម្ពស់នៃទំនាក់ទំនងរវាងកម្ពុជា និងវៀតណាម។ ជាមួយគ្នានេះដែរ ឯកឧត្ដមក៏បានលើកឡើងអំពីកិច្ចសហប្រតិបត្តិការរវាងកម្ពុជា និងវៀតណាម នៅគ្រប់វិស័យ ជាពិសេសវិស័យការពារជាតិ និងកិច្ចសហប្រតិបត្តិការនៅតាមព្រំដែនតែម្ដង ដែលបណ្ដាខេត្តជាប់ព្រំដែននៃប្រទេសទាំងពីរ បានសហការគ្នាយ៉ាងល្អ ក្នុងការទប់ស្កាត់នូវបទល្មើសឆ្លដែន និងការពង្រឹងសន្តិសុខនៅតាមព្រំដែន ដែលធ្វើឱ្យព្រំដែនមានសន្តិភាព និងការអភិវឌ្ឍជាមួយគ្នា។ 

ឯកឧត្តម Tran Cam Tu ក៏បានរំលេចពីការសាមគ្គីគ្នា សហការគ្នា ក្នុងការកាពារកុំឱ្យមានកម្លាំងអមិត្តណាមួយយកទឹកដីនៃប្រទេសម្ខាងមកប្រឆាំង និងប្រទេសម្ខាងទៀត ដែលភាគីទាំងពីរបានសហការគ្នាយ៉ាងល្អ នៅក្នុងកិច្ចការងារមួយនេះ។ បន្ថែមលើនេះ នៅតាមព្រំដែន ក៏ដូចជាការផ្លាស់ប្ដូរទំនិញពាណិជ្ជកម្មជាមួយគ្នា ប្រទេសទាំងពីរបានធ្វើឱ្យមានកំណើនពាណិជ្ជកម្មលើសពី១០ពាន់លាន ហើយដែលនាពេលបច្ចុប្បន្នកម្ពុជា និងវៀតណាមកំពុងតែមានមហិច្ឆតាក្នុងការសម្រចឱ្យបាននូវទំហំពាណិជ្ជកម្មឱ្យឡើងដល់ ២០ពាន់លានដុល្លារសហរដ្ឋអាមេរិក។
ក្នុងឱកាសនោះ សម្ដេចតេជោប្រមុខរដ្ឋស្ដីទី បានឯកភាពទាំងស្រុងចំពោះការលើកឡើងរបស់ឯកឧត្តម Tran Cam Tu ជាពិសេសនៅត្រង់ចំណុច ការសហការគ្នានៅតាមព្រំដែន ដោយសម្ដេចតេជោបានជំរុញបន្ថែមទៀតឱ្យបណ្ដាអាជ្ញាធរនៅតាមព្រំដែនរវាងប្រទេសទាំងពីរ បង្កើននូវកិច្ចសហប្រតិត្តិការឱ្យកាន់ទេជិតស្និទ្ធ ដើម្បីធានាឱ្យបាននូវព្រំដែនដែលមានសន្តិភាព ស្ថិរភាព និងការអភិវឌ្ឍនៅតាមបណ្ដោយព្រំដែននៃប្រទេសទាំងពីរ។ សម្ដេចតេជោ ក៏បានពេញចិត្តចំពោះការលើកឡើងអំពី ការបង្កើនទំហំពាណិជ្ជកម្ម ពីព្រោះសម្ដេចតេជោបានចាត់ទុកទំនាក់ទំនងផ្នែកសេដ្ឋកិច្ច ពាណិជ្ជកម្ម ការវិនិយោគ គឺជាចំណុចស្នូលដ៏សំខាន់នៃទំនាក់ទំនងទូទៅ រវាងកម្ពុជា និងវៀតណាម ដែលសម្ដេចចង់ឃើញប្រទេសទាំងពីរសម្រេចបាននូវទំហំពាណិជ្ជកម្មដល់២០ពាន់លានដុល្លារសហរដ្ឋអាមេរិកតាមការគ្រោងទុក។ 

សម្ដេចតេជោប្រមុខរដ្ឋស្ដីទី ក៏បានលើកឡើង អំពីកិច្ចសហប្រតិបត្តិការរវាងស្ថាប័នសភា ស្ថាប័នរដ្ឋ និងស្ថាប័នបក្ស ដែលប្រទេសទាំងពីរកំពុងតែពូនជ្រុំជាមួយគ្នា ដែលជាសកម្មភាពដែលត្រូវពង្រីកបន្ថែមទៀត ឱ្យកាន់តែស៊ីជម្រៅនៅក្នុងក្របខណ្ឌនៃទំនាក់ទំនងរវាងប្រទេសទាំងពីរ ទាំងស្ថាប័ននីតិប្បញ្ញត្តិ ស្ថាប័នរដ្ឋ និងស្ថាប័នគណបក្ស។ សម្ដេចតេជោ ក៏បានលើកឡើងអំពីការពន្លឿនការបោះបង្គោលព្រំដែនរវាងប្រទេសទាំងពីរឱ្យបានចប់ជាស្ថាពរ ឱ្យបានឆាប់រហ័ស ដែលភាគីត្រូវតែបង្កើននូវកិច្ចសហប្រតិបត្តិការនៅក្នុងការធ្វើកិច្ចការងារដ៏មានសារសំខាន់នៅតាមបន្ទាត់ព្រំដែនរវាងប្រទេសទាំងពីរ ដើម្បីធានាឱ្យបាននូវព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍ។
ឯកឧត្តម Tran Cam Tu បានឯកភាពចំពោះការលើកឡើងរបស់សម្ដេចតេជោ ទាក់ទងទៅនឹងការជំរុញ និងការពន្លឿននៅការបោះបង្គោលតាមព្រំដែនរវាងកម្ពុជា និងវៀតណាមឱ្យបានឆាប់ តាមដែលអាចធ្វើទៅបាន ដែលជាចំណុចដ៏សំខាន់ក្នុងការពង្រឹងនូវសន្តិភាព ស្ថេរភាព នៅតាមព្រំដែនរវាងប្រទេសទាំងពីរ ស្របទៅនិងគោលដៅដែលប្រទេសទាំងពីរមានមិត្តភាពជាប្រពៃណីយូរអង្វែងជាមួយគ្នា៕

ដោយ៖ ជឹម ណារី