AKP កំពង់ស្ពឺ ថ្ងៃទី០៩ ខែមេសា ឆ្នាំ២០២៦--   ឯកឧត្តមបណ្ឌិត ជាម ចន្ទ័ សោភ័ណ អភិបាល នៃគណៈអភិបាលខេត្តកំពង់ស្ពឺ បានធ្វើការ ណែនាំដល់អភិបាលស្រុកឱរ៉ាល់ដែលទើបប្រកាសតែងតាំងថ្មី ឱ្យបង្កើនការយកចិត្តទុកដាក់ ខ្ពស់លើកិច្ចការងារ ដើម្បីឆ្លើយតបប្រកបដោយប្រសិទ្ធភាព និងតម្លាភាពនូវរាល់សំណើ សំណូមពរ និងតម្រូវការចាំបាច់របស់ប្រជាពលរដ្ឋក្នុងមូលដ្ឋាន និងលុបបំបាត់ឱ្យបាននូវរាល់បទល្មើសផ្សេងៗ ដែលកើតមាន ពិសេសគឺល្បែងឆបោកតាមអនឡាញ(Scams online) ការចរាចរណ៍គ្រឿងញៀន និងក្មេងទំនើង។ ការណែនាំដូច្នេះនាព្រឹកថ្ងៃទី៩ ខែមេសា ឆ្នាំ២០២៦ នៅក្នុងឱកាសតែងតាំង លោក នី នរៈ ពីអភិបាលរង ស្រុកសាមគ្គីមុនីជ័យ ជាអភិបាលស្រុកឱរ៉ាល់ ជំនួសលោក ងួន វាសនា ដែលរាជរដ្ឋាភិបាល ប្រគល់ភារកិច្ចថ្មី ។

  ឯកឧត្តមបណ្ឌិត ជាម ចន្ទ័សោភ័ណ បានលើកឡើងថា អាជ្ញាធរដែលបម្រើពលរដ្ឋបានល្អ មូលដ្ឋានមិនមានបញ្ហាប្រឈមនោះទេ ហើយបើសេវាល្អ នោះពលរដ្ឋក៏គ្មានកង្វល់ដែរ ដូច្នេះជា មន្ត្រី ជាអាជ្ញាធរត្រូវតែចុះជាប់ និងតាមដានរាល់សំណើ សំណូមពរនិងតម្រូវការចាំបាច់នានា របស់ពលរដ្ឋ ហើយក្នុងករណីទទួលបាននូវសំណើ សំណូមពរ និងតម្រូវការរបស់ពលរដ្ឋ ក្នុងនាម ជាមន្ត្រី ជាអាជ្ញាធរគឺត្រូវឆ្លើយតបឱ្យបានទាន់ពេលវេលា ហើយក្នុងករណីមិនអាចដោះស្រាយ បានត្រូវដាក់រាល់សំណើ និងសំណូមពរទាំងនោះមករដ្ឋបាលខេត្តដើម្បីពិនិត្យនិងដោះស្រាយបន្ត។

  ឯកឧត្តមបានបន្តថា រាល់ការផ្តល់ជូនដល់ប្រជាពលរដ្ឋក្នុងការចូលរួមដំណើរការអភិបាល កិច្ចល្អ និងជាឧបករណ៍មួយសម្រាប់លើកកម្ពស់គណនេយ្យភាព តម្លាភាព ក្នុងដំណើរការ ពិនិត្យមើលលើការផ្តល់សេវាសាធារណៈរបស់រដ្ឋបាលខេត្ត រដ្ឋបាលស្រុក និងរដ្ឋបាលឃុំ-សង្កាត់ ក្នុងគោលបំណងដើម្បីធានាថា រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋានត្រូវបានពិនិត្យ ដោះស្រាយ និងឆ្លើយតប។ ក្នុងនោះគ្រប់អ្នកពាក់ព័ន្ធទាំងអស់ក្នុងមូលដ្ឋានត្រូវបានរួមបញ្ចូល បរិយាប័នទៅក្នុងដំណើរការនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។

  ទន្ទឹមគ្នានោះ ឯកឧត្តមបណ្ឌិត ជាម ចន្ទ័សោភ័ណ ក៏បានព្រមានចាត់វិធានការចំពោះមន្ត្រី ឬអភិបាលស្រុករូបណាដែលមកបំពេញការងារនៅក្នុងខេត្តនេះដោយអាងខ្នង ឬខ្សែ ហើយមិន បម្រើផលប្រយោជន៍រាស្ត្រ។ ក្នុងនាមជាមន្ត្រីសាធារណៈគឺជាអ្នកបម្រើរាស្ត្រ មិនមែនជាចៅ ហ្វាយនៃរាស្ត្រនោះទេ ពោលគឺមន្ត្រីកុំតាំងខ្លួនជាមេ ដោយសំអាងថា ខ្លួនបានមកកាន់តួនាទី ឬតំណែងនៅទីនេះដោយសារតែមានខ្សែចៅហ្វាយខេត្ត ឬខ្នងធំនោះឡើយ។ ឯកឧត្តមមិន គាំទ្រចំពោះចរិតមន្ត្រីដែលតាំងខ្លួនបែបនេះនោះទេ។ ការតាំងខ្លួនអញនិយម ដោយសារតែមានខ្សែ ហើយមិនយកផលប្រយោជន៍រាស្ត្រដាក់ក្នុងបេះដូង ហើយធ្វើអ្វីស្រេចតែចិត្ត ឯកឧត្តមនឹងចាត់ វិធានការភ្លាម មិនឱ្យមន្ត្រី ឬអភិបាលស្រុកនោះ មានឱកាសដឹកនាំបន្តទៀតទេ។ ឯកឧត្តមទទួល យកតែមន្ត្រីរូបណាដែលធ្វើការងារ និងមិនទទួលយកទេចំពោះមន្ត្រីរូបណាដែលអួតអាងខ្សែ នោះឡើយ។

  ជាមួយនឹងការណែនាំនោះដែរ អភិបាលខេត្តកំពង់ស្ពឺក៏បានស្នើឱ្យមន្ត្រីទាំងអស់ត្រូវចេះរួម សាមគ្គីគ្នា ដោះដូរបទពិសោធរវាងគ្នានិងគ្នា ពិសេសករណីខុសទាស់ត្រូវចេះអប់រំ ពន្យល់ដល់គ្នា ដើម្បីរកផ្លូវត្រូវ។ ម្យ៉ាងវិញទៀត កុំមើលស្រាលអ្នកដែលនៅជុំវិញខ្លួន ព្រោះអ្នកនៅជុំវិញអាចជាគ្រូ នៃយើងគ្រប់គ្នា។ ត្រូវខិតខំអភិវឌ្ឍន៍មូលដ្ឋានឱ្យមានការរីកចម្រើន យកចិត្តទុកដាក់លើបរិស្ថាន អនាម័យ ដើម្បីទាក់ទាញភ្ញៀវទេសចរជាតិ អន្តរជាតិ ឱ្យមកលេងកម្សាន្តច្រើន ខណៈដែលស្រុក ឱរ៉ាល់មួយនេះសំបូរទៅដោយរមណីយដ្ឋានធម្មជាតិច្រើន ពិសេសគឺខ្នងភ្នំផ្សារ ទេរទឹកពុះ ខ្នងភ្នំឱរ៉ាល់ ជាដើមដើម្បីទាញចំណូលដល់សហគមន៍៕

ដោយ ម៉ែន ប៊ុនធីម