AKP ខេត្តព្រះសីហនុ ថ្ងៃទី0៩ ខែមេសា ឆ្នាំ២០២៦ --  ឯកឧត្តម ម៉ាង ស៊ីណេត អភិ បាល នៃគណៈអភិបាលខេត្តព្រះសីហនុ នាព្រឹកថ្ងៃព្រហស្បតិ៍ទី៩ ខែមេសា ឆ្នាំ២០២៦ បានអញ្ជើញដឹកនាំគណៈប្រតិភូខេត្តព្រះសីហនុ ចុះសួរសុខទុក្ខដល់នាយ នាយរង និងពលទាហានកងពលតូចអន្តរាគមន៍លេខ៤ ទិសខេត្តឧត្តរមានជ័យ ដែលចងសម្ព័ន្ធភាពជាមួយខេត្តព្រះសីហនុ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ នឹងឈានចូលមកដល់នៅថ្ងៃអង្គារ ១២រោច ខែចេត្រ ឆ្នាំមមី អដ្ឋស័ក ពុទ្ធសករាជ ២៥៦៩ ត្រូវនឹងថ្ងៃទី១៤ ខែមេសា ឆ្នាំ២០២៦ខាងមុខ ស្ថិតនៅភូមិពងទឹក ឃុំអំពិល ស្រុកបន្ទាយអំពិល ខេត្តឧត្ដរមានជ័យ។

  លោក សន ស៊ា មេបញ្ជាការកងពលតូចអន្តរាគមន៍លេខ៤ ទិសខេត្តឧត្តរមានជ័យ បានឱ្យ ដឹងថា កងពលតូចអន្តរាគមន៍លេខ៤ កំពុងបំពេញបេសកកម្មការពារជាតិ មាតុភូមិព្រំដែនកម្ពុជា- ថៃ ទិសប្រាសាទតាមាន់បានធ្វើរបាយការណ៍សង្ខេបស្តីពី ការងារសន្តិសុខនៅតាមព្រំដែននៅមានភាពផុយស្រួល ហើយរាល់សកម្មភាពរបស់កងពលតូចអន្តរាគមន៍លេខ៤ ជាកម្លាំងអន្តរាគមន៍។ បច្ចុប្បន្នកម្លាំងរបស់យើងបានឈរជើងនៅតាមទីតាំងគោលដៅនៅតាមសមភូមិមុខ ដោយចែកជាពីរគោលដៅ។

  ឯកឧត្តម ម៉ាង ស៊ីណេត អភិបាលខេត្តព្រះសីហនុ បានថ្លែងអំណគុណ មេបញ្ជាការ មេបញ្ជាការង និងពលទាហានកងពលតូចអន្តរាគមន៍លេខ៤ ដែលបាន និងកំពុងឈរជើងនៅតាមគោលដៅជួរមុខ ដោយសារតែកម្ពុជាមានសង្គ្រាមជាបន្តបន្ទាប់ធ្វើឱ្យយើងបាត់បង់នូវធនធានមនុស្សយ៉ាងច្រើន។ ដោយផ្តើមចេញពីសម្តេច ហ៊ុន សែន អតីតនាយករដ្ឋមន្ត្រីកម្ពុជា បន្តមកសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការដឹកនាំប្រទេសទទួលបានសន្តិភាពជូនប្រទេសជាតិយើង ត្រូវរួមគ្នាក្នុងក្របខ័ណ្ឌតែមួយនូវការអនុវត្តគោលនយោបាយឈ្នះឈ្នះ ធ្វើឱ្យកម្ពុជាមានសុខសន្តិភាព និងការឯកភាពជាតិពេញលេញធ្វើឱ្យប្រទេសជាតិ មានការអភិវឌ្ឍរីកចម្រើនលើគ្រប់វិស័យ ហើយចក្ខុវិស័យរបស់រាជរដ្ឋាភិបាលកម្ពុជាធ្វើឱ្យប្រទេសកម្ពុជាមានចំណូលមធ្យមកម្រិតទាបនៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ 

  ឯកឧត្ដម អភិបាលខេត្តព្រះសីហនុបានបញ្ជាក់ថា រាជរដ្ឋាភិបាលបានដាក់ចេញព្រំដែនមានសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ក៏ប៉ុន្តែប្រទេសសៀមនៅតែចិញ្ចឹមចិត្តឈ្លានពានមកលើកម្ពុជា ក្នុងនាមយើងខ្ញុំជាសមភូមិក្រោយ ជាប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ និងព្រះសង្ឃ សូមពាំនាំនូវការផ្តាំផ្ញើសួរសុខទុក្ខ និងសេចក្តីនឹងរលឹក និងជឿជាក់លើវីរកងទ័ពរបស់យើងដែលបានឈរជើងនិងលះបង់ក្នុងបុព្វហេតុការពារទឹកដី ការពារជាតិ មាតុភូមិ និងប្រជាពលរដ្ឋ។ សមរភូមិក្រោយដំណើរការបាន អាស្រ័យនឹងសមភូមិមុខផងដែរ យើងត្រូវបែងចែកគ្នាតាម ទិសសមរភូមិក្រោយខិតខំពង្រឹងពង្រីកសេដ្ឋកិច្ចជាតិ យកមកពង្រឹងវិស័យសមភូមិមុខ ហើយសមភូមិក្រោយបានរួមគ្នាចូលរួមជួយដល់សមភូមិមុខដើម្បីខ្មែរជួយខ្មែរ។ 

  ឯកឧត្តមអភិបាលខេត្តព្រះសីហនុបានបញ្ជាក់បន្ថែមទៀតថា ថ្ងៃនេះប្រតិភូខេត្តព្រះសីហនុ បាននាំយកមកនូវអំណោយរបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ឧបត្ថម្ភជូនវីរកងទ័ពជួរមុខរបស់យើង ព្រមទាំងបានធ្វើការផ្តាំផ្ញើ និងអំពាវនាវដល់វីរកងទ័ពរបស់យើង ត្រូវថែទាំទាំសុខភាព និងសុវត្ថិភាពរបស់ខ្លួនជាចំបងក្នុងការការពារឃឿនឯករាជ្យជាតិខ្មែរ ហើយរាល់ការលំបាកនៅសមរភូមិក្រោយ គឺគ្រាន់តែលំបាកកម្លាំងកាយ ក៏ប៉ុន្តែកម្លាំងជួរមុខរបស់យើងយកអាយុជីវិត សាច់ស្រស់ ឈាមស្រស់ មកការពារទឹកដី និងប្រជាពលរដ្ឋកម្ពុជា។ យើងរួមគ្នាជាមួយសមភូមិមុខក្នុងការអនុវត្តគោលនយោបាយ និងរួមគ្នាគាំទ្ររាជរដ្ឋាភិបាល ហើយភាពជោគជ័យរួមរបស់យើងទាំងអស់គ្នា គឺការពង្រឹងស្មារតីសាមគ្គីភាព ថែក្សាសុខភាពដោយអនុវត្តន៍នូវបទបញ្ជារបស់រាជរដ្ឋាភិបាលក្នុងកិច្ចការពារទឹកដីរបស់យើងឪ្យបាន១០០ភាគរយ ឈានទៅចក្ខុវិស័យឆ្នាំ២០៥០ ។ សូមជូនពរឱ្យមេបញ្ជាការ មេបញ្ជាការរង និងពលទាហានទាំងអស់ទទួលបាននូវសេរីសួស្តីក្នុងឱកាសបុណ្យចូលឆ្នាំថ្មី សូមមានសុខភាពល្អ និងជ័យជម្នះគ្រប់ភារកិច្ច។

  ក្នុងឱកាសនោះ ឯកឧត្តម អភិបាលខេត្តព្រះសីហនុ បាននាំយកអំណោយរបស់សម្តេចធិបតី ហ៊ុន ម៉ាណែត និងលោកជំទាវបណ្ឌិតឧបត្ថម្ភជូនកងពលតូចអន្តរាគមន៍លេខ៤ មានដូចជា៖ គ្រឿងឧបភោគ បរិភោគ ថ្នាំពេទ្យ និងសម្ភារប្រើប្រាស់ចំនួន ២៥មុខ និងថវិកាចំនួន ៤០លានរៀល  ៕

ដោយ ងូ សុមុនី