AKP ភ្នំពេញ ថ្ងៃទី០៩ ខែមេសា ឆ្នាំ២០២៦ -- កាលពីថ្ងៃអង្គារ ប្រទេសអ៊ូហ្គង់ដាបានចាប់ផ្តើមចែកចាយមុងចំនួន ៤,៥លានមុងនៅទូទាំងតំបន់ភាគខាងកើតនៃប្រទេស ដែលជាផ្នែកមួយនៃកិច្ចខិតខំប្រឹងប្រែងឡើងវិញក្នុងការប្រយុទ្ធប្រឆាំងនឹងជំងឺគ្រុនចាញ់។

លោក អេមម៉ានូអែល អៃនេបយូណា (Emmanuel Ainebyoona)អ្នកនាំពាក្យក្រសួងសុខាភិបាល បានប្រាប់សារព័ត៌មានស៊ីនហួរតាមទូរស័ព្ទថា មុងទាំងនោះនឹងត្រូវចែកចាយនៅក្នុងស្រុកចំនួន ៣៣ ក្រោមយុទ្ធនាការទូទាំងប្រទេសដ៏ទូលំទូលាយដែលមានគោលបំណងចែកចាយមុងរហូតដល់២៨,៥លានមុងទូទាំងប្រទេសនៅឆ្នាំនេះ។

នៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គមអ៊ិចក្រសួងបានជំរុញឱ្យប្រជាជននៅតំបន់ភាគខាងកើតចុះឈ្មោះដើម្បីទទួលបានមុង។

ការគេងក្នុងមុងដែលជ្រលក់ថ្នាំសម្លាប់សត្វល្អិត គឺជាវិធានការសំខាន់ៗមួយដែលប្រទេសអ៊ូហ្គង់ដាកំពុងប្រើប្រាស់ ដើម្បីទប់ស្កាត់ការរីករាលដាលនៃជំងឺគ្រុនចាញ់។ ការអន្តរាគមន៍ផ្សេងទៀតរួមមានការចាក់វ៉ាក់សាំងដែលត្រូវបានណែនាំនៅក្នុងប្រទេសកាលពីឆ្នាំមុន និងការបាញ់ថ្នាំដែលនៅសេសសល់ក្នុងផ្ទះ។

យោងតាមក្រសួងសុខាភិបាលបានឱ្យដឹងថា ជំងឺគ្រុនចាញ់នៅតែជាមូលហេតុចម្បងនៃជំងឺ និងការស្លាប់ក្នុងចំណោមកុមារតូចៗនៅក្នុងប្រទេសអ៊ូហ្គង់ដា។ ក្នុងឆ្នាំ២០២៤ ប្រទេសនេះបានកត់ត្រាករណីជំងឺគ្រុនចាញ់ចំនួន១០,៩លានករណី និងការស្លាប់ចំនួន ៣.៥៨២ករណី៕

ដោយ៖ មូល មិនា (ប្រភព៖ ស៊ីនហួ)