AKP សៀមរាប ថ្ងៃទី៨ ខែមេសា ឆ្នាំ២០២៦--
សួនរុក្ខជាតិអង្គរ ដែលជាសួនរុក្ខជាតិដ៏មានសក្តានុពល និងធំជាងគេមួយនៅក្នុងខេត្តសៀមរាប ស្ថិតនៅតាមបណ្តោយផ្លូវឆ្ពោះទៅប្រាសាទអង្គរវត្ត ក្នុងសង្កាត់គោកចក ក្រុងសៀមរាប ខេត្តសៀមរាប កំពុងត្រៀមលក្ខណៈរួចជាស្រេចដើម្បីទទួលស្វាគមន៍ភ្ញៀវទេសចរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ។ ជាមួយនឹងការយកចិត្ដទុកដាក់រៀបចំថែរក្សា ការពាររុក្ខជាតិគ្រប់ប្រភេទនៅក្នុងសួនរុក្ខជាតិអង្គរ ដែលគិតមកដល់ពេលបច្ចុប្បន្ន អាជ្ញាធរជាតិអប្សរា បានពង្រីកផ្ទៃដីសួននេះ រហូតដល់ ១៥០ហិកតា ដែលជាទីប្រមូលផ្តុំទៅដោយរុក្ខជាតិឱសថ ផ្កា និងឈើព្រៃរាប់រយប្រភេទ។
បើតាមការបញ្ជាក់របស់អ្នកគ្រប់គ្រប់សួនរុក្ខជាតិអង្គរបានឱ្យដឹងថា ការរៀបចំសួនរក្ខជាតិនេះឡើង គឺដើម្បីឱ្យប្រជាពលរដ្ឋ ក៏ដូចជាភ្ញៀវទេសចរជាតិ-អន្ដរជាតិ បានមកទស្សនា និងស្វែងយល់កាន់តែច្បាស់អំពីប្រភេទរុក្ខជាតិ និងផ្កាគ្រប់ប្រភេទ រួមទាំងប្រភេទសត្វព្រៃកម្រ ដែលមានវត្ដមាននៅក្នុងប្រទេសកម្ពុជា ផងដែរ។

លោក មាឃ បូរ៉ា អ្នកគ្រប់គ្រងទូទៅនៃសួនរុក្ខជាតិអង្គរ បានលើកឡើងថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ សួនរុក្ខជាតិអង្គរ នឹងរៀបចំ "ពិព័រណ៍សត្វល្អិត និងសត្វស្លាប" ដើម្បីបង្ហាញពីជីវៈចម្រុះដែលកំពុងរស់នៅក្នុងបរិវេណសួន និងក្នុងតំបន់អង្គរ។ លោកបានបញ្ជាក់បន្ថែមថា៖ «ការរៀបចំនេះ មានគោលបំណងចម្បងដើម្បីឱ្យភ្ញៀវទេសចរបានស្វែងយល់កាន់តែច្បាស់ពីដង្ហើមជីវិតរបស់សត្វលោក ដែលផ្សារភ្ជាប់យ៉ាងជិតស្និទ្ធជាមួយធម្មជាតិ។ បន្ថែមពីនេះ ក៏មានការតាំងបង្ហាញពីសត្វព្រៃកម្រមួយចំនួនដែលកំពុងមានវត្តមានក្នុងតំបន់អង្គរ ដូចជា សត្វភេ ទោចម្កុដ និងសត្វស្លាបចម្រុះប្រភេទ ដែលសុទ្ធសឹងជាសត្វទទួលបានការថែរក្សា និងអភិរក្សយ៉ាងយកចិត្តទុកដាក់ពីសំណាក់អាជ្ញាធរជាតិអប្សរា»។

បើតាមលោក មាឃ បូរ៉ា ក្រៅពីពិព័រណ៍សត្វ និងសួនរុក្ខជាតិដែលមានស្រាប់ សួនរុក្ខជាតិអង្គរក៏បានបង្កើនសោភ័ណភាពបន្ថែមតាមរយៈការរៀបចំ សួនផ្កាកូលាប និង សួនកេសរកូល (ផ្កាឡំអង់) ដើម្បីផ្តល់នូវចំណីចក្ខុដ៏ស្រស់ត្រកាលសម្រាប់អ្នកទស្សនា។ ទន្ទឹមនេះ ក៏មានការរៀបចំតំបន់កម្សាន្តសម្រាប់កុមារ និងការតុបតែងលម្អតាមរចនាបថ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដើម្បីបង្កបរិយាកាសសប្បាយរីករាយជូនដល់ភ្ញៀវទេសចរមកពីគ្រប់ទិសទី។

អ្នកស្រី លី សីហា អាយុ៣៥ឆ្នាំ ប្រជាពលរដ្ឋរស់នៅក្នុងខេត្តសៀមរាបបាននិយាយឱ្យដឹងថា នេះជាលើកទី១ហើយ ដែលបាននាំកូនៗមកទស្សនាសួនរុក្ខជាតិអង្គរ ដើម្បីឱ្យកូនបានស្គាល់នូវប្រភេទរុក្ខជាតិ និងសត្វកម្រៗដែលបានថែទាំក្នុងសួននេះ ជាពិសេស កូនៗ និងអ្នកស្រីផ្ទាល់ ទទួលបានអារម្មណ៍សប្បាយរីករាយជាមួយទេសភាពបៃតង ដោយមានរុក្ខជាតិកម្រៗច្រើនប្រភេទមិនធ្លាប់បានស្គាល់ពីមុនមក។ អ្នកស្រីបានអះអាងថា៖ «សួនរុក្ខជាតិអង្គរ មិនត្រឹមឱ្យទេសចរទទួលបានអារម្មណ៍រីករាយប៉ុណ្ណោះទេ ទីនេះ ជាកន្លែងដែលពលរដ្ឋខ្មែរបានស្វែងយល់ពីសត្វ និងរុក្ខជាតិកម្រៗជាច្រើនមុខ»។ 

ដោយមានទឹកមុខសប្បាយរីករាយជាមួយនឹងការដើរកម្សាន្ដមើលរុក្ខជាតិជាច្រើនប្រភេទនៅក្នុងសួនរុក្ខជាតិ ផងនោះ អ្នកស្រី លី សីហា បានបង្ហាញនូវអារម្មណ៍ថា ពិតប្លែកភ្នែក ស្រស់ស្រាយ មានប្រភេទសត្វច្រើនប្រភេទ ហើយកូនៗអ្នកស្រីចូលចិត្តសត្វ ខណៈពេលដែលកូនៗរបស់គាត់បានឃើញពិតជាភ្ញាក់ផ្អើល។ អ្នកស្រីបានអះអាងថា៖ «ឃើញដើមឈើច្រើន ខ្ញុំសប្បាយចិត្ត នេះជាភាពទាក់ទាញមួយឱ្យយើងបន្ធូរអារម្មណ៍ ពេលអារម្មណ៍ស្មុគស្មាញបានចូលមកបានលម្ហែអារម្មណ៍ យើងកាន់តែសប្បាយ ធ្វើឱ្យយើងស្រស់ស្រាយ»។ 

ចំណែកប្រជាពលរដ្ឋម្នាក់ទៀតបានឱ្យដឹងផងដែរថា ការចូលទស្សនានៅក្នុងសួននេះ គឺពិតជាស្រស់ស្អាត មានសោភណភាពទាក់ទាញ អាចមើលឃើញដើមរុក្ខជាតិច្រើនប្រភេទ ជាពិសេសបានស្គាល់ប្រភេទសត្វព្រៃកម្រមួយចំនួនថែមទៀត។ អ្នកស្រីក៏បាននិយាយបន្ថែមថា នៅពេលទទួលបានព័ត៌មានថា ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខ សួនរុក្ខជាតិអង្គរ នឹងរៀបចំ "ពិព័រណ៍សត្វល្អិត និងសត្វស្លាប" ដើម្បីបង្ហាញពីជីវៈចម្រុះដែលកំពុងរស់នៅក្នុងបរិវេណសួន និងក្នុងតំបន់អង្គរ រួមជាមួយកម្មវិធីជាច្រើនទៀតនោះ អ្នកស្រី នឹងនាំក្រុមគ្រួសារមកលេងម្តងទៀត ព្រោះក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំនេះ មិនបានទៅណាឆ្ងាយទេ ព្រោះតែសាំងឡើងថ្លៃពេក។
សូមរម្លឹកផងដែរថា សួនរុក្ខជាតិអង្គរ ត្រូវបានកែលម្អ និងបើកឱ្យដំណើរការជាផ្លូវការ កាលពីឆ្នាំ២០២២ ហើយ គិតមកទល់ពេលនេះ សួនទទួលបានភ្ញៀវទេសចរចូលទស្សនាប្រមាណជាង ៦០ម៉ឺននាក់ហើយ។ សួនរុក្ខជាតិអង្គរ បើកជូនសាធារណជនចូលទស្សនាដោយឥតគិតថ្លៃ ចាប់ពីថ្ងៃពុធ ដល់ថ្ងៃចន្ទ (ឈប់សម្រាករៀងរាល់ថ្ងៃអង្គារ) ចាប់ពីម៉ោង ៨:០០ នាទីព្រឹក ដល់ម៉ោង ៦:០០ល្ងាច៕

ដោយ៖ ឃុត សៅ