AKP ភ្នំពេញ ថ្ងៃទី០៨ ខែមេសា ឆ្នាំ២០២៦ -- នៅថ្ងៃពុធនេះ មេដឹកនាំគណបក្សប្រឆាំងអ៊ីស្រាអែល លោក យ៉ែរ ឡាពីដ (Yair Lapid) បានរិះគន់យ៉ាងខ្លាំងទៅលើនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ចំពោះការគាំទ្របទឈប់បាញ់បណ្តោះអាសន្នរវាងសហរដ្ឋអាមេរិក និងអ៊ីរ៉ង់ ដោយបានហៅវាថាជា «ការបរាជ័យផ្នែកនយោបាយ និងយុទ្ធសាស្ត្រ»។

លោក ឡាពីដ បាននិយាយនៅលើប្រព័ន្ធផ្សព្វផ្សាយសង្គមអ៊ិចថា«យើងមិនដែលឃើញមហន្តរាយនយោបាយបែបនេះនៅក្នុងប្រវត្តិសាស្ត្ររបស់យើងទេ។ អ៊ីស្រាអែលមិនមានវត្តមានសូម្បីតែពេលដែលការសម្រេចចិត្តត្រូវបានធ្វើឡើងអំពីស្នូលនៃសន្តិសុខជាតិរបស់យើង»។

លោកបានបន្ថែមថា «វានឹងចំណាយពេលច្រើនឆ្នាំដើម្បីជួសជុលការខូចខាតផ្នែកនយោបាយ និងយុទ្ធសាស្ត្រដែលបង្កឡើងដោយលោកណេតាន់យ៉ាហ៊ូ ដោយសារតែភាពក្រអឺតក្រទម ការធ្វេសប្រហែស និងកង្វះផែនការយុទ្ធសាស្ត្ររបស់លោក»។

លោក ឡាពីដ បានបន្ថែមថា ខណៈដែលយោធា និងសាធារណជនបានបំពេញតួនាទីរបស់ពួកគេ រដ្ឋាភិបាលបានបរាជ័យក្នុងការសម្រេចគោលបំណងរបស់ខ្លួន។

លោកបាននិយាយថា «កងទ័ពបានអនុវត្តអ្វីគ្រប់យ៉ាងដែលខ្លួនត្រូវបានស្នើសុំឱ្យធ្វើ ហើយប្រជាជនបានបង្ហាញពីភាពធន់មិនធម្មតា ប៉ុន្តែលោកណេតាន់យ៉ាហ៊ូ បានបរាជ័យផ្នែកនយោបាយ និងយុទ្ធសាស្ត្រ ហើយមិនបានសម្រេចគោលដៅណាមួយដែលលោកបានកំណត់សម្រាប់ខ្លួនឯង»។

ការកត់សម្គាល់របស់លោកខាងលើនេះ បានធ្វើឡើងបន្ទាប់ពីការិយាល័យរបស់លោក ណេតាន់យ៉ាហ៊ូ បាននិយាយថា អ៊ីស្រាអែលគាំទ្រចំពោះសេចក្តីសម្រេចចិត្តរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ក្នុងការផ្អាកការវាយប្រហារយោធាប្រឆាំងនឹងអ៊ីរ៉ង់រយៈពេលពីរសប្តាហ៍។

ទោះជាយ៉ាងណាក៏ដោយ ការិយាល័យរបស់លោក ណេតាន់យ៉ាហ៊ូបាននិយាយថា បទឈប់បាញ់រយៈពេលពីរសប្តាហ៍ «មិនរាប់បញ្ចូលប្រទេសលីបង់ទេ»។

លោក ត្រាំ បានប្រកាសកាលពីថ្ងៃអង្គារថា លោកបានយល់ព្រម«ផ្អាកការទម្លាក់គ្រាប់បែក និងការវាយប្រហារលើប្រទេសអ៊ីរ៉ង់រយៈពេលពីរសប្តាហ៍»៕

ដោយ៖ យា ចិន្ដាខន្ដី (ប្រភព៖ AA-AKP)