AKP បន្ទាយមានជ័យ ថ្ងៃទី០៧ ខែមេសា ឆ្នាំ២០២៦--

ក្នុងស្មារតីយកចិត្តទុកដាក់ខ្ពស់បំផុតចំពោះសុខទុក្ខ និងសុវត្ថិភាពរបស់ប្រជាពលរដ្ឋដែលរងផលប៉ះពាល់ពីស្ថានការណ៍ព្រំដែន នាព្រឹកថ្ងៃទី០៧ ខែមេសា ឆ្នាំ២០២៦នេះ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ បានអញ្ជើញចុះជួបសំណេះសំណាល និងដឹកនាំកិច្ចដំណើរការចាប់ឆ្នោតជ្រើសរើសក្បាលដី និងផ្ទះជម្រកបណ្តោះអាសន្នជូនបងប្អូនពលរដ្ឋភៀសសឹក។

ពិធីដ៏មានអត្ថន័យនេះត្រូវបានរៀបចំឡើងនៅបរិវេណវត្តពោធិ៍សូរិយារាម និងវត្តច័ន្ទស៊ីសាមគ្គីរតនារាមក្នុងស្រុកអូរជ្រៅ ដោយមានការអញ្ជើញចូលរួមពីឯកឧត្តម ប្លែក វ៉ារីប្រធានក្រុមប្រឹក្សាខេត្ត និង ឯកឧត្តម តាន់ ផាន់ណារ៉ាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកអូរជ្រៅ ព្រមទាំងអាជ្ញាធរពាក់ព័ន្ធយ៉ាងច្រើនកុះករ។

ថ្លែងទៅកាន់បងប្អូនប្រជាពលរដ្ឋក្នុងទឹកមុខពោរពេញដោយក្តីអាណិតស្រឡាញ់ ឯកឧត្តម អ៊ុំ រាត្រី បានបញ្ជាក់យ៉ាងច្បាស់ថា ទោះបីជាបទឈប់បាញ់បានចូលជាធរមានតាំងពីចុងឆ្នាំ២០២៥ ក៏ដោយ ប៉ុន្តែការរំលោភបំពានពីភាគីថៃមកលើដីធ្លីពលរដ្ឋខ្មែរ នៅតែជាឧបសគ្គដែលរាជរដ្ឋាភិបាលត្រូវដោះស្រាយយ៉ាងហ្មត់ចត់។ «រាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត តែងខ្វល់ខ្វាយពីសុខទុក្ខបងប្អូនគ្រប់វិនាទី។ យើងមិនទុកឱ្យបងប្អូនណាម្នាក់រស់នៅដោយឯកោក្នុងស្ថានភាពលំបាកនេះឡើយ»។ នេះជាប្រសាសន៍សង្កត់ធ្ងន់របស់ឯកឧត្តមអភិបាលខេត្ត។

ដើម្បីធានាបាននូវការរស់នៅបណ្តោះអាសន្នប្រកបដោយសេចក្តីថ្លៃថ្នូរ រាជរដ្ឋាភិបាលបានសម្រេចប្រើប្រាស់ផ្ទះអតីតយុទ្ធជនក្នុងគម្រោងដ៏ធំមួយចំនួនផ្ទះផ្តល់ជូន៣,០០០ខ្នង ដែលបានកែសម្រួលរួចជាស្រេច លើផ្ទៃដីសរុប៤០០ហិកតាស្ថិតនៅ ភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។ ការរៀបចំមណ្ឌលស្លក្រាមនេះ គឺជាកិច្ចអន្តរាគមន៍បន្ទាន់ ខណៈដែលរាជរដ្ឋាភិបាលកំពុងបន្តដោះស្រាយតាមផ្លូវការទូត និងផ្លូវច្បាប់ ដើម្បីទាមទារសិទ្ធិលើដីធ្លី និងអធិបតេយ្យភាពជូនពលរដ្ឋវិញ។

ក្រោយការចាប់ឆ្នោតដោយតម្លាភាព ពលរដ្ឋភៀសសឹកដែលទទួលបានសិទ្ធិស្នាក់នៅ បានសម្តែងនូវក្តីរំភើបរីករាយស្ទើរហូរទឹកភ្នែក។ ពលរដ្ឋភៀសសឹកដែលបានចាប់ឆ្នោតរួច បានលើកឡើងថា កន្លងមកពួកខ្ញុំបារម្ភណាស់ មិនដឹងថាត្រូវនាំក្រុមគ្រួសារជ្រកកោននៅឯណាឱ្យពិតប្រាកដទេ ព្រោះដីស្រែចំការយើងត្រូវបានគេរារាំងមិនឱ្យចូល។ ថ្ងៃនេះបានឃើញឯកឧត្តមអភិបាលខេត្តចុះមកផ្ទាល់ និងផ្តល់ផ្ទះឱ្យស្នាក់នៅបណ្តោះអាសន្នបែបនេះ ធ្វើឱ្យគ្រួសារខ្ញុំកក់ក្តៅណាស់។ យើងមានទំនុកចិត្តលើរាជរដ្ឋាភិបាលដែលមិនបោះបង់យើងចោលក្នុងគ្រាក្រ»។

សកម្មភាពនាថ្ងៃនេះ មិនត្រឹមតែជាការផ្តល់ជម្រកស្នាក់នៅប៉ុណ្ណោះទេ ប៉ុន្តែគឺជាការបង្ហាញឱ្យឃើញនូវការរួបរួមគ្នាជាធ្លុងមួយរវាងថ្នាក់ដឹកនាំ និងប្រជាជន។ ក្នុងកាលៈទេសៈនៃវិបត្តិ និងការគំរាមកំហែងដល់អធិបតេយ្យភាព មន្ត្រីរាជការគ្រប់ជាន់ថ្នាក់របស់កម្ពុជា បាននិងកំពុងឈរជើងយ៉ាងរឹងមាំនៅសមរភូមិក្រោយ ដើម្បីធានាថាជីវភាព និងស្នាមញញឹមរបស់ពលរដ្ឋត្រូវបានគាំពារជានិច្ច៕

ដោយ ឈុន សារ៉ាត