AKP ភ្នំពេញ ថ្ងៃទី០៧ ខែ មេសា ឆ្នាំ ២០២៦ --

អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការក្នុងការផ្តល់សេវាប្រៃសណីយ័ រវាងប្រៃសណីយ៍កម្ពុជា និងអគ្គនាយកដ្ឋានពន្ធនាគារ ត្រូវបានចុះហត្ថលេខានាព្រឹកថ្ងៃទី០៧ ខែមេសា ឆ្នាំ២០២៦ នេះ នៅទីស្ដីការក្រសួងមហាផ្ទៃ ដោយឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ នៃក្រសួងមហាផ្ទៃ និងឯកឧត្ដម ថេន សំវិសុទ្ធ អគ្គនាយកប្រៃសណីយ៍កម្ពុជា។

ការចុះអនុស្សរណៈនៃការយោគយល់គ្នានាពេលនេះ ធ្វើឡើងក្នុងគោលបំណងរៀបចំនីតិវិធីសម្រាប់កិច្ចសហប្រតិបត្តិការក្នុងការផ្តល់សេវាប្រៃសណីយ៍ (សេវាចែកបញ្ញើដល់គោលដៅចុងក្រោយ) នូវលិខិតរដ្ឋបាល និងឯកសារគតិយុត្តផ្សេងៗពីអគ្គនាយកដ្ឋានពន្ធនាគារឱ្យដល់គោលដៅ។

សូមជម្រាបជូនថា ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជា ដែលជំរុញការផ្តល់សេវាសាធារណៈឱ្យកាន់តែល្អប្រសើរ ទាន់ពេលវាលា និងជួយសម្រាលបន្ទុកចំណាយរបស់អគ្គនាយកដ្ឋានពន្ធនាគារ ភាគីទាំងពីរ គឺអគ្គនាយកដ្ឋានពន្ធនាគារ និងអគ្គនាយកប្រៃសណីយ៍កម្ពុជា បានព្រមព្រៀងបង្កើតអនុស្សរណៈនៃការយោគយល់គ្នា សម្រាប់ធ្វើកិច្ចសហការក្នុងការបញ្ជូនលិខិតផ្សេងៗ ដែលមានតម្រូវការក្នុងការប្រើប្រាស់សេវាបញ្ញើរបស់ប្រៃសណីយ៍កម្ពុជា (សេវាចែកបញ្ញើដល់គោលដៅចុងក្រោយ) ជូនដល់អគ្គនាយកដ្ឋានពន្ធនាគារ៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)