AKP ភ្នំពេញ ថ្ងៃទី០៧ ខែមេសា ឆ្នាំ២០២៦--ឯកអគ្គរាជទូតកម្ពុជាប្រចាំនៅសាធា រណរដ្ឋកូរ៉េបានលើកទឹកចិត្តប្រធាន ក្រុមប្រឹក្សាភិបាលនៃក្រុមហ៊ុន Saemyeong Energy Techនៅកូរ៉េរៀបចំរោងចក្រឬ កន្លែងស្រាវជ្រាវធ្វើជីសិរីរាង្គនៅប្រទេសកម្ពុជា។

នៅព្រឹកថ្ងៃទី ៧ ខែមេសា ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានទទួលជួបសម្តែងការគួរសម និងពិភាក្សាការងារជាមួយលោក Park Hee Soo ប្រធានក្រុមប្រឹក្សាភិបាលនៃក្រុមហ៊ុន Saemyeong Energy Tech នៅស្ថានទូតកម្ពុជាក្នុងទីក្រុងសេអ៊ូល។ 

លោក Park បានជម្រាបជូនឯកឧត្តមឯកអគ្គរាជទូតថា លោកមានគម្រោងនាំយកបច្ចេកវិទ្យាផលិតជីសិរីរាង្គឈាន មុខគេរបស់កូរ៉េ​ ទៅចែករំលែកជូនដល់ប្រជាកសិករកម្ពុជាដែលកំពុងប្រកបរបរដាំដុះដំណាំស្រូវ ពោត សណ្តែក និងដំណាំបន្លែ ផ្លែឈើផ្សេងៗ។  

លោក​ Park ចង់ឃើញផលិតផលកសិកម្មរបស់កម្ពុជាក្លាយជាកសិផលសិរីរាង្គលំដាប់ថ្នាក់អន្តរជាតិ ដើម្បីជួយបង្កើនជីវភាពរស់នៅរបស់ប្រជាជន ពិសេសប្រជាកសិករកម្ពុជា ។ 

ឯកឧត្តមឯកអគ្គរាជទូត បានសម្តែងនូវការស្វាគមន៍ចំពោះគំនិតផ្តួចផ្តើមរបស់លោក Park និងបានថ្លែងអំណរគុណចំពោះទឹកចិត្តរបស់លោកក្នុងបំណងលេីកស្ទួយជីវភាពរបស់ប្រជាពលករកម្ពុជា ព្រោះ វិស័យកសិកម្មជាវិស័យសំខាន់ និងបានចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា។

ឯកឧត្តមឯកអគ្គរាជទូត​ ក៏បានលើកទឹកចិត្តលោក Park ឱ្យចាប់ផ្តើមរៀបចំរោងចក្ររឺ កន្លែងស្រាវជ្រាវធ្វើជីសិរីរាង្គនៅប្រទេសកម្ពុជា និងអញ្ជើញ លោកទៅទស្សនកិច្ចនៅកម្ពុជា​ ដើម្បីភ្ជាប់ទំនាក់ទំនងជាមួយអ្នកវិស័យឯកជនផ្នែកកសិកម្ម​ និងក្រសួង-ស្ថាប័នពាក់ព័ន្ធ។

បន្ថែមពីនេះ ឯកឧត្តមឯកអគ្គរាជទូត​ ក៏បានសំណូមពរក្រុមហ៊ុនឱ្យជ្រើសរើសនិស្សិត រឺពលករខ្មែរដែលកំពុងសិក្សា និងបំរើការងារនៅកូរ៉េនេះ ដើម្បីផ្តល់ឱកាសឲ្យពួកគេទទួលបាននូវបទពិសោ ធន៍​ និងជំនាញបច្ចេកទេសក្នុងការផលិ តជីសិរីរាង្គនេះ​ ដូច្នេះក្រោយពេលពួកគេត្រលប់ទៅកម្ពុជាវិញ​ ពួកគេនឹងមានជំនាញក្នុងការផលិតជីសិរីរាង្គ និងអាចជួយដល់ការអភិវឌ្ឍវិស័យកសិកម្មនៅកម្ពុជា៕

ដោយ៖ ប៊ុនរិទ្ធ