AKP បន្ទាយមានជ័យ ថ្ងៃទី០៧ ខែមេសា ឆ្នាំ២០២៦-- ដើម្បីធានាបាននូវសិទ្ធិ និងអត្ថប្រយោជន៍ស្របច្បាប់ក្នុងការប្រើប្រាស់សេវាផ្សេងៗ លោកឧត្ដមសេនីយ៍ត្រី សឿម សារិទ្ធ ស្នងការនៃស្នងការដ្ឋាននគរបាលខេត្ដបន្ទាយមានជ័យ បានចេញសេចក្តីអំពាវនាវយ៉ាងទទូចដល់ប្រជាពលរដ្ឋដែលមិនទាន់មាន ឬអត្តសញ្ញាណប័ណ្ណអស់សុពលភាព ឱ្យរួសរាន់មកបំពេញបែបបទតាមការកំណត់។

យោងតាមប្រសាសន៍ដឹកនាំដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកស្នងការខេត្តបន្ទាយមានជ័យ បានណែនាំដល់កម្លាំងជំនាញផែនការងារអត្តសញ្ញាណកម្ម ឱ្យបង្កើនសកម្មភាពបម្រើសេវាជូនពលរដ្ឋឱ្យបានទាន់ពេលវេលា។ ការអំពាវនាវនេះផ្តោតសំខាន់លើមុខសញ្ញាប្រជាពលរដ្ឋទាំងពីរភេទ រស់នៅក្នុងភូមិសាស្ត្រខេត្តបន្ទាយមានជ័យ រួមមាន កុមារដែលមានអាយុចាប់ពី ១៥ឆ្នាំឡើងដែលមិនទាន់បានធ្វើអត្តសញ្ញាណប័ណ្ណសញ្ជាតិខ្មែរ។ ប្រជាពលរដ្ឋដែលមានអត្តសញ្ញាណប័ណ្ណ ផុតសុពលភាព។ ប្រជាពលរដ្ឋដែលមានអត្តសញ្ញាណប័ណ្ណជិតផុតសុពលភាព (អាចធ្វើបានមុនរយៈពេល ១៨០ថ្ងៃឬ ០៦ខែ)។

ចាប់ពីថ្ងៃទី០៦ ខែមេសា ឆ្នាំ២០២៦ តទៅ កម្លាំងជំនាញផ្នែកអត្តសញ្ញាណកម្មនៃស្នងការដ្ឋាននគរបាលខេត្ត សហការជាមួយអធិការដ្ឋាននគរបាលក្រុង-ស្រុកទាំង០៩ បាន និងកំពុងបន្តយុទ្ធនាការ “ចុះចល័ត” ដល់តាមមូលដ្ឋាន ដើម្បីបង្កលក្ខណៈងាយស្រួល កាត់បន្ថយការចំណាយ និងពេលវេលារបស់បងប្អូនប្រជាពលរដ្ឋ។ "ការមានអត្តសញ្ញាណប័ណ្ណត្រឹមត្រូវ គឺជាសោរគ្រាប់ចុចសម្រាប់បងប្អូនក្នុងការទទួលបានសេវាសាធារណៈ ការងាររដ្ឋបាល និងតម្រូវការចាំបាច់ផ្សេងៗក្នុងជីវភាពរស់នៅប្រចាំថ្ងៃ។" នេះជាការបញ្ជាក់បន្ថែមពីស្នងការដ្ឋាននគរបាលខេត្តបន្ទាយមានជ័យ។

ក្រៅពីក្រុមការងារចុះចល័តតាមភូមិ-ឃុំ បងប្អូនប្រជាពលរដ្ឋក៏អាចអញ្ជើញទៅទទួលសេវាដោយផ្ទាល់បាននៅការិយាល័យអត្ដសញ្ញាប័ណ្ណសញ្ជាតិខ្មែរ នៃស្នងការដ្ឋាននគរបាលខេត្ដបន្ទាយមានជ័យ។អធិការដ្ឋាននគរបាលក្រុង/ស្រុកទាំង ០៩ក្នុងខេត្តបន្ទាយមានជ័យ។

អាជ្ញាធរមានសមត្ថកិច្ចបានបញ្ជាក់ថា មន្ត្រីជំនាញនឹងរង់ចាំបម្រើសេវាជូនបងប្អូនរៀងរាល់ម៉ោងធ្វើការ ដោយស្មារតីទទួលខុសត្រូវខ្ពស់ និងតម្លាភាព ដើម្បីធានាថាពលរដ្ឋគ្រប់រូបដែលមានលក្ខខណ្ឌគ្រប់គ្រាន់ នឹងមានអត្តសញ្ញាណប័ណ្ណប្រើប្រាស់គ្រប់ៗគ្នា៕

ដោយ ឈុន សារ៉ាត