AKP កំពង់ធំ ថ្ងៃទី៧ ខែមេសា ឆ្នាំ២០២៦--ក្នុងស្មារតីរួមគ្នាដើម្បីបរិស្ថាន និងសហគមន៍បៃតង ក្រុមហ៊ុន ខេមប្រ៊ូវ (កាសស៊្បែរ ខេមប៊ូឌា) ដែលមានប្រតិបត្តិការលើរោងចក្រផលិតស្រាបៀរដំបូងគេបង្អស់នៅកម្ពុជា និងជាអ្នកផលិតស្រាបៀរអង្គរ ដែលជាពាណិជ្ជសញ្ញាជាតិដ៏ល្បីល្បាញនៅ កម្ពុជា បានសហការជាមួយរដ្ឋបាលខេត្តកំពង់ធំ កាលពីចុងសប្ដាហ៍កន្លងទៅនេះ បានរៀបចំពិធីដាំដើមឈើក្រោមគំនិតផ្តួចផ្តើម «សហគមន៍បៃតង» នៅក្រុងស្ទឹងសែន ខេត្តកំពង់ធំ ដើម្បីលើកកម្ពស់ការថែរក្សាបរិស្ថាន និងការអភិវឌ្ឍប្រកបដោយចីរភាព។

ពិធីនេះ បានប្រព្រឹត្តទៅដោយមានការអញ្ជើញចូលរួមពី ឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ និង លោក Michiel Oerlemans អគ្គនាយកគ្រប់គ្រងក្រុមហ៊ុន ខេមប្រ៊ូវ ព្រមទាំងមានការចូលរួមពីមន្ទីរជំនាញខេត្ត អាជ្ញាធរមូលដ្ឋាន ប្រជាពលរដ្ឋ និងបុគ្គលិកខេមប្រ៊ូវ ក្នុងស្មារតីរួមគ្នា ដើម្បីសហគមន៍បៃតង កម្ពុជាបៃតង។

គំនិតផ្តួចផ្តើមនេះ ក៏មានគោលដៅបន្តបញ្ជាក់ពីការប្តេជ្ញាចិត្តរបស់ក្រុមហ៊ុនក្នុងការយកចិត្តទុកដាក់ចំពោះសហគមន៍ និងប្រជាជនកម្ពុជា ដែលក្រុមហ៊ុនបានផ្តោតអស់រយៈពេលជាង ៦០ឆ្នាំកន្លងមកនេះ។ ព្រឹត្តិការណ៍ដាំដើមឈើនេះ ក៏បានធ្វើឡើងស្របពេលនឹងការដាក់ដំណើរការនូវក្របខ័ណ្ឌចីរភាពសកលថ្មីរបស់ក្រុមហ៊ុនកាសស៊្បែរ គ្រុប (Carlsberg Group) ដែលជាក្រុមហ៊ុនមេរបស់ ខេមប្រ៊ូវ ក្រោមគោលដៅចីរភាព «ការអភិវឌ្ឍដើម្បីអនាគតកាន់តែប្រសើរ (Brewing Tomorrow)»  ដែលផ្តោតលើការការពារធម្មជាតិ ការអភិវឌ្ឍធនធានមនុស្ស និងការអនុវត្តអាជីវកម្មដោយទំនួលខុសត្រូវខ្ពស់។

លោក Michiel Oerlemans បានគូសបញ្ជាក់ថា ការអនុវត្តអាជីវកម្មដោយការទទួលខុសត្រូវចំពោះសង្គម គឺជាផ្នែកមួយនៃអត្តសញ្ញាណ និងរបៀបនៃការធ្វើប្រតិបត្តិការនៅក្រុមហ៊ុនខេមប្រ៊ូវ ហើយលោកបានលើកឡើងថា «កម្ពុជា គឺជាផ្ទះរបស់យើង ហើយរាល់តំណក់ភេសជ្ជៈដែលយើងផលិត គឺកើតចេញពីគោលបំណងជាក់លាក់របស់យើងចាប់តាំងពីការបង្កើតក្រុមហ៊ុនលើកដំបូងគឺ ការអភិវឌ្ឍឱ្យកាន់តែប្រសើរទាំងថ្ងៃនេះ និងថ្ងៃស្អែក (Brewing For A Better Today and Tomorrow)»។ លោកអគ្គនាយកបានបន្ដថា តួនាទីរបស់ខេមប្រ៊ូវ ឬកាសស៊្បែរ នៅកម្ពុជា មិនបានកំណត់ត្រឹមតែការផលិតភេសជ្ជៈដ៏មានគុណភាពសម្រាប់អតិថិជនប៉ុណ្ណោះទេ ប៉ុន្តែយើងក៏ចង់ឃើញសហគមន៍របស់យើងមានការអភិវឌ្ឍរីកចម្រើនប្រកបដោយនិរន្តរភាព ដូចដែលថា គ្មានសហគមន៍ គ្មានអាជីវកម្ម ពួកយើងត្រូវរីកចម្រើនជាមួយគ្នា។

ជាមួយគ្នានេះ ក្រៅពីផ្តល់អត្ថប្រយោជន៍ផ្នែកអាកាសធាតុ ដូចជាការស្រូបយកឧស្ម័នកាបូន និងការជួយបង្កើនភាពធន់ចំពោះបម្រែ បម្រួលអាកាសធាតុ គំនិតផ្តួចផ្តើមនេះ ក៏នឹងបង្កើតជាកេរដំណែលដ៏មានអត្ថន័យសម្រាប់មនុស្សជំនាន់ក្រោយ។ លោក Michiel Oerlemans បានបន្ថែមថា៖ «ដើមឈើមួយដើម គឺជាក្តីសង្ឃឹមមួយ។ ការដាំនៅថ្ងៃនេះ គឺយើងកំពុងដាំក្តីសង្ឃឹមសម្រាប់កូនចៅជំនាន់ក្រោយ។ ពួកគាត់នឹងមានម្លប់ជ្រក និងមានខ្យល់ដកដង្ហើមដ៏បរិសុទ្ធ»។

ក្នុងឱកាសនោះ ឯកឧត្តម នួន ផារ័ត្ន បានមានប្រសាសន៍កោតសរសើរចំពោះកិច្ចសហការនេះ ដោយលើកឡើងពីតួនាទីសំខាន់របស់វិស័យសាធារណៈ និងឯកជន ក្នុងការអភិវឌ្ឍខេត្ត ក៏ដូចជាប្រទេសកម្ពុជាទាំងមូល។ ឯកឧត្តមអភិបាលខេត្ដបានថ្លែងបញ្ជាក់ថា៖ «ការការពារបរិស្ថាន និងការអភិវឌ្ឍប្រកបដោយចីរភាព មិនមែនជាភារកិច្ចផ្តាច់មុខរបស់បុគ្គលណាម្នាក់ឡើយ ប៉ុន្តែទាមទារឱ្យមានការរួមដៃគ្នាពីគ្រប់ភាគីពាក់ព័ន្ធ។ សកម្មភាពដាំដើមឈើបែបនេះ បង្ហាញយ៉ាងច្បាស់ពីរបៀបដែលរាជរដ្ឋាភិបាល សហគមន៍ និងវិស័យឯកជន អាចធ្វើការរួមគ្នា ដើម្បីការពារធនធានធម្មជាតិ និងគាំទ្រសុខុមាលភាពរយៈពេលវែងសម្រាប់អ្នកជំនាន់ក្រោយ»។ 

ឯកឧត្ដមអភិបាលខេត្ដបានអះអាងផងដែរថា សកម្មភាពថ្ងៃនេះ ខេមប្រ៊ូវ បានបង្ហាញឱ្យឃើញពីគំរូភាពនៃវិស័យឯកជន ដែលមិនត្រឹមតែធ្វើធុរកិច្ច ប៉ុន្តែថែមទាំងមានការយកចិត្តទុកដាក់ក្នុងការជួយជ្រោមជ្រែងសង្គម និងបរិស្ថាន ស្របតាមគោលនយោបាយអភិវឌ្ឍន៍របស់រាជរដ្ឋាភិបាល។

បើតាមក្រុមហ៊ុនខេមប្រ៊ូវបានឱ្យដឹងថា «សហគមន៍បៃតង» គឺជាគំនិតផ្តួចផ្តើមមួយនៃក្របខ័ណ្ឌចីរភាពសកលថ្មីរបស់ក្រុមហ៊ុន កាសស៊្បែរ «ការអភិវឌ្ឍដើម្បីអនាគតកាន់តែប្រសើរ (Brewing Tomorrow)» ដែលប្តេជ្ញាអនុវត្តន៍អាជីវកម្មដោយការទទួលខុសត្រូវដោយ មានសសរស្តម្ភចំនួន ៤ រួមមាន៖ ការកាត់បន្ថយការបំភាយកាបូន ការការពារធម្មជាតិ ការផ្តល់ជម្រើសអតិថិជនប្រកបដោយការទទួលខុសត្រូវ និងការអភិវឌ្ឍធនធានមនុស្ស។ ការដាំដើមឈើ គឺជាសកម្មភាបជាក់ស្តែង និងអាចមើលឃើញបានច្បាស់ ក្នុងការបំលែងការប្តេជ្ញានេះ ទៅជាសកម្មភាពជាក់ស្តែងនៅកម្រិតមូលដ្ឋាន។

លោក Michiel Oerlemans អគ្គនាយកគ្រប់គ្រងក្រុមហ៊ុន ខេមប្រ៊ូវបានឱ្យដឹងបន្ថែមថា ក្នុងនាមជាដៃគូសេដ្ឋកិច្ច និងសង្គមដ៏រឹងមាំ និងយូរអង្វែង ក្រុមហ៊ុន ខេមប្រ៊ូវ តាមរយៈផលិតផលភេសជ្ជៈរបស់ខ្លួន ដូចជាស្រាបៀរ អង្គរ ស្ទីង ប៉ិបស៊ី ទឹកសាអង្គរពូរ៉ូ និងភេសជ្ជៈផ្សេងទៀតរបស់ខ្លួន  បានបន្តប្តេជ្ញាតួនាទីរបស់ខ្លួនក្រៅពីការបង្កើតការងារ ការគាំទ្រដៃគូអាជីវកម្មក្នុងស្រុក និងការរួមចំណែកចំពោះចំណូលជាតិ ក្រុមហ៊ុនប្តេជ្ញាបង្កើនសកម្មភាពទំនួលខុសត្រូវសង្គម ដើម្បីគោលដៅរីកចម្រើនរួមគ្នា ទាំងសេដ្ឋកិច្ច សង្គម និងអាជីវកម្ម។

សូមបញ្ជាក់ផងដែរថា ចាប់តាំងពីឆ្នាំ២០២៣ មក ក្រុមហ៊ុន ខេមប្រ៊ូវ បានដាំដើមឈើសរុបជាង ១ ០០០ ដើម នៅទូទាំងប្រទេស តាមរយៈកិច្ចសហការជាមួយអាជ្ញាធរ អង្គការសង្គមស៊ីវិល វិស័យឯកជន យុវជន និងដៃគូពាក់ព័ន្ធនានា ដែលបង្ហាញពីការប្តេជ្ញាចិត្តយូរអង្វែងរបស់ក្រុមហ៊ុន ក្នុងការការពារបរិស្ថាន និងការអភិវឌ្ឍសហគមន៍ប្រកបដោយចីរភាព៕

ដោយ៖ រិទ្ធី