AKP កំពង់ធំ ថ្ងៃ០៧ ខែមេសា ឆ្នាំ២០២៦--ល្បែងប្រជាប្រិយខ្មែរដែលមានតាំងពីបុរាណកាលសូមបងប្អូនប្រជាពលរដ្ឋចូលរួមថែរក្សា និងនាំគ្នាលេងនៅតាមទីវត្តអារាមក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ ជៀសវាងការបាត់បង់នាំឱ្យក្មេងជំនាន់ក្រោយមិនស្គាល់។ នេះជាការលើកឡើងរបស់លោក អ៊ុន បុត្ត អភិបាលរងខេត្តកំពង់ធំ ក្នុងឱកាសអញ្ជើញជាគណៈអធិបតីក្នុងពិធីកាត់ខ្សែបូឆ្លងក្លោងទ្វារវត្ត និងផ្លូវក្រាលគ្រួសក្រហមនៅវត្តពោធិរុក្ខារាមស្ថិតនៅក្នុងភូមិក្លែងឃុំក្លែងស្រុកសណ្ដាន់ ខេត្តកំពង់ធំ កាលពីថ្ងៃទី០៦ ខែមេសា ឆ្នាំ២០២៦។

លោក អ៊ុន បុត្ត បានបញ្ជាក់ថា នាឱកាសបុណ្យចូលឆ្នាំប្រពៃណីជាតិខ្មែរនាពេលខាងមុខនេះនៅតាមទីវត្តអារាមនានានៅក្នុងប្រទេសកម្ពុជា គួរតែរៀបចំកម្មវិធីលេងល្បែងប្រជាប្រិយដូចជាទាញព្រ័ត្រ បោះអង្គុញ លាក់កន្សែង ដណ្ដើមស្លឹកឈើ វាយក្អម ចោលឈូង ចាប់កូនខ្លែង លោតបាវ និងល្បែងប្រជាប្រិយខ្មែរជាច្រើនទៀត ហើយត្រូវជៀសវាងនាំគ្នាលេងល្បែងដែលមិនមែនជាប្រពៃណីខ្មែរ ដូចជាប៉ាតម្សៅ បាញ់ទឹក ឬគប់ទឹកថង់ដាក់គ្នា និងល្បែងស៊ីសងគ្រប់ប្រភេទនៅក្នុងទីវត្តអារាម។ ដូច្នេះ ក្នុងនាមបងប្អូនជាប្រជាពលរដ្ឋខ្មែរ ព្រះសង្ឃ អាចារ្យ គណៈកម្មការវត្ត គួរតែគិតគូរអំពីការបង្កើត និងរក្សាការលេងល្បែងប្រជាប្រិយឱ្យបានត្រឹមត្រូវទៅតាមទំនៀមទម្លាប់របស់ដូនតាយើងដែលបានបន្សល់ទុក្ខកុំឱ្យបាត់បង់។

ទន្ទឹមនឹងនេះ លោកអភិបាលរងខេត្តបានលើកឡើងពីបញ្ហាព្រំដែនកម្ពុជា-ថៃ សូមឱ្យបងប្អូនប្រជាពលរដ្ឋត្រូវតែជឿជាក់ទៅលើការដឹកនាំរបស់រាជរដ្ឋាភិបាល កុំនាំគ្នាឆាប់ជឿទៅលើព័ត៌មានមិនពិតដែលបានឃើញនៅលើបណ្ដាញសង្គម ពីព្រោះនេះគឺជាសង្គ្រាមផ្លូវចិត្តរបស់ថៃដែលតែងតែធ្វើឱ្យបងប្អូនប្រជាពលរដ្ឋខ្មែរមានការព្រួយបារម្ភ។ មានតែខ្មែរយើងខ្លាំង ខ្មែររួបរួមសាមគ្គី ទើបខ្មែរឈ្នះហើយយើងត្រូវតែមានស្មារតីជាតិនិយម ដោយចូលរួមនាំគ្នាពហិកាបន្តមិនប្រើប្រាស់ផលិតផលរបស់ប្រទេសថៃជាដាច់ខាត។

លោក អ៊ុន បុត្ត អភិបាលរងខេត្តកំពង់ធំបានមានប្រសាសន៍សង្កត់ធ្ងន់ថា ដើម្បីឱ្យសេដ្ឋកិច្ចរបស់ខ្មែរយើងរឹងមាំ ហើយខ្មែរយើងខ្លាំង សូមបងប្អូនជាឪពុកម្ដាយត្រូវតែខិតខំរកស៊ីចិញ្ចឹមជីវិតបង្កើនសេដ្ឋកិច្ចក្នុងគ្រួសារ ហើយប្អូនៗដែលជាទំពាំងស្នងឬស្សីត្រូវតែខិតខំរៀនសូត្រស្វែងយល់ពីបច្ចេកវិទ្យាទំនើប ពីព្រោះថាមានតែចំណេះវិជ្ជាទេ ទើបធ្វើឱ្យខ្មែរយើងខ្លាំងអាចការពារទឹកដីបាន និងរួចចាកផុតពីការប្រមាថមើលងាយពីប្រទេសជិតខាង។

សូមបញ្ជាក់ថា សមិទ្ធផលដែលបានសម្ពោធដាក់ប្រើប្រាស់នាពេលនេះ រួមទាំងខ្លោងទ្វារធំ និងផ្លូវក្រាលគ្រួសក្រហម ០១ខ្សែប្រវែង ២៧០ម៉ែត្រ ដោយចំណាយថវិកាសរុបចំនួន១២៧.២៧៤.៥០០រៀល ដែលកើតចេញពីការរួបរួមសហការគ្នារបស់ព្រះគ្រូចៅអធិការវត្តជាមួយអាជ្ញាធរភូមិឃុំ លោកអាចារ្យ គណៈកម្មការ និងពុទ្ធបរិស័ទ ដែលមានសទ្ធាជ្រះថ្លា ដោយគិតចាប់ពីឆ្នាំ២០២០ រហូតដល់បច្ចុប្បន្ន៕

ដោយ៖ ស៊ុម វណ្ណា