AKP កំពង់ធំ ថ្ងៃទី០៧ ខែមេសា ឆ្នាំ២០២៦-- ដោយអនុវត្តតាមការណែនាំរបស់លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ កាលពីរសៀលថ្ងៃទី០៦ ខែមេសា ឆ្នាំ២០២៦ លោកវរសេនីយ៍ឯក ម៉ង់ វិទូ ស្នងការរងទទួលផែនការងារនគរបាលសណ្ដាប់ធ្នាប់ បានដឹកនាំកិច្ចប្រជុំផ្សព្វផ្សាយផែនការការពារ បុណ្យចូលឆ្នាំថ្មីប្រពៃណីជាតិខ្មែរដល់កងកម្លាំងចំណុះឱ្យផែនការងារ នគរបាលសណ្ដាប់ធ្នាប់ចំនួន៨៤នាក់នៅសាលប្រជុំស្នងការដ្ឋាននគរបាលខេត្ត។

លោកវរសេនីយ៍ឯក ម៉ង់ វិទូ ស្នងការរង បានថ្លែងបញ្ជាក់ថា ដោយទទួលបានការអនុញ្ញាត និងណែនាំពីលោកឧត្តមសេនីយ៍ទោ ហេង សុផល ស្នងការនគរបាលខេត្តថ្ងៃនេះលោកបានដឹកនាំកងកម្លាំងប្រជុំបូកសរុបលទ្ធផលការងារដែលអនុវត្តបាននាពេលកន្លងមក និងលើកទិសដៅសម្រាប់អនុវត្តបន្ត។ លោកវរសេនីយ៍ឯក ម៉ង់ វិទូ បានពាំនាំនូវប្រសាសន៍ផ្តាំផ្ញើសាកសួរសុខទុក្ខ និងថ្លែងអំណរគុណពីសំណាក់លោកឧត្តមសេនីយ៍ទោ ហេង សុផល ស្នងការនគរបាលខេត្ត ជូនចំពោះបងប្អូនកងកម្លាំង ដែលមានស្នាដៃ គុណបំណាច់លើការអនុវត្ត តួនាទី ភារកិច្ច ការពារ រក្សាសន្តិសុខ សណ្តាប់ធ្នាប់សាធារណៈធានាថែរក្សាបានសុខសុវត្ថិភាពល្អជូនប្រជាពលរដ្ឋ និងសង្គមជាតិ។

លោកវរសេនីយ៍ឯក ម៉ង់ វិទូ ស្នងការរងបានផ្ដាំផ្ញើដល់កងកម្លាំងអនុវត្តឱ្យទទួលបានប្រសិទ្ធភាពនូវការងារមួយចំនួនជាពិសេសក្នុងឱកាសបុណ្យចូលឆ្នាំថ្មី ប្រពៃណីជាតិ ដែលកាន់តែខិតជិតចូលមកដល់នាថ្ងៃខាងមុខនេះគឺ៖ ១. បន្តយកចិត្តទុកដាក់ខ្ពស់ក្នុងការពង្រឹងវិន័យនិងការគោរពក្រមសីលធម៌ វិជ្ជាជីវៈ កងកម្លាំងនគរបាលជាតិឱ្យកាន់តែល្អប្រសើរថែមទៀត។ ២. ត្រូវបន្តពង្រឹងការគ្រប់គ្រងកងកម្លាំងឱ្យបានហ្មត់ចត់ តាមបែបបទការងាររដ្ឋបាល បញ្ជីវត្តមានកងកម្លាំងបំពេញភារកិច្ច ជាប្រចាំថ្ងៃ ប្រជុំជួរត្រួតពិនិត្យវត្តមានជាក់ស្ដែង ពិនិត្យការគ្រងឯកសណ្ឋាន និងពាក់សញ្ញាសម្គាល់នគរបាលជាតិឱ្យបានត្រឹមត្រូវ តាមការកំណត់ក្នុងបទវិន័យនគរបាលជាតិ និងបទប្បញ្ញត្តិពាក់ព័ន្ធ ត្រៀមលក្ខណៈជាស្រេច សម្រាប់កិច្ចអន្តរាគមន៍ ដល់ប្រជាពលរដ្ឋ នាគ្រាជួបហេតុការណ៍ ណាមួយ ដែលអាចកើតមានឡើងជាចៃដន្យ។ ៣. បង្កើនការអប់រំផ្សព្វផ្សាយ អំពីច្បាប់ចរាចរណ៍ផ្លូវគោក តាមគោលដៅងាយរងគ្រោះ ដើម្បីបញ្ជ្រាបការយល់ដឹង និងចូលរួមប្រុងប្រយ័ត្ន កាត់បន្ថយគ្រោះថ្នាក់ចរាចរណ៍ឱ្យមានកម្រិតទាប សំដៅថែរក្សាអាយុជីវិត ទ្រព្យសម្បត្តិប្រជាពលរដ្ឋ។ ៤. បញ្ចុះកម្លាំងប្រចាំការ ល្បាតតាមគោលដៅងាយរងគ្រោះ។ រៀបចំសណ្តាប់ធ្នាប់ តាមទីប្រជុំជនមណ្ឌលទេសចរណ៍ រមណីយដ្ឋាន ប្រាង្គប្រាសាទដើម្បីធានាបាននូវសន្តិសុខសុវត្តិភាព ជូនភ្ញៀវជាតិ-អន្តរជាតិ ព្រមទាំងការពារសម្បត្តិបេតិកភណ្ឌជាតិ។ ៥. ទន្ទឹមនឹងការអនុវត្តតួនាទី ភារកិច្ច មន្ត្រីជំនាញ នៃអធិការដ្ឋាននគរបាលក្រុង-ស្រុក ត្រូវសិក្សាបញ្ហាប្រឈម តាមគោលដៅងាយរងគ្រោះធ្វើរបាយការណ៍ជូនគណៈបញ្ជាការឯកភាពរដ្ឋបាលក្រុង-ស្រុក ដើម្បីមានមូលដ្ឋានក្នុងការដោះស្រាយបានទាន់ពេលវេលា និងមានប្រសិទ្ធិភាពខ្ពស់ និង៦. ការិយាល័យជំនាញនីមួយៗ ត្រូវធ្វើផែនការ ជាក់លាក់សម្រាប់បំពេញភារកិច្ចជាប្រចាំថ្ងៃដើម្បីសម្រេចបានជោគជ័យថ្មីៗបន្ថែមទៀត៕

ដោយ ស៊ុម វណ្ណា