AKP បន្ទាយមានជ័យ ថ្ងៃទី០៧ ខែមេសា ឆ្នាំ២០២៦--ក្នុងបរិយាកាសពោរពេញដោយសេចក្តីជ្រះថ្លា និងដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលខិតជិតចូលមកដល់នាពេលខាងមុខនេះ កាលពីរសៀលថ្ងៃចន្ទ ៦រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៦ ខែមេសា ឆ្នាំ២០២៦ នេះរដ្ឋបាលខេត្តបន្ទាយមានជ័យ បានរៀបចំពិធីសូត្រមន្តលើករាសី និងបួងសួងសុំសិរីសួស្ដីជ័យមង្គល។

ពិធីនេះបានប្រព្រឹត្តទៅក្រោមអធិបតីភាព ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ព្រមទាំងលោកជំទាវ ជ័យ ណារី អ៊ុំ រាត្រី ដោយមានការអញ្ជើញចូលរួមពីសំណាក់អភិបាលរងខេត្ត មន្ត្រីរាជការ កងកម្លាំងប្រដាប់អាវុធ និងបុគ្គលិកសាលាខេត្តយ៉ាងច្រើនកុះករ នៅសាលប្រជុំសាលាខេត្តបន្ទាយមានជ័យ។

កិច្ចបុណ្យតាមគន្លងប្រពៃណី និងសាសនានៅក្នុងពិធីដ៏ទក្ខិណានុប្បទាននេះ ថ្នាក់ដឹកនាំខេត្ត និងមន្ត្រីរាជការ បាននិមន្តព្រះសង្ឃសូត្រមន្តចម្រើនព្រះបរិត្ត ដើម្បីបណ្តេញនូវឧបទ្រពចង្រៃទាំងឡាយក្នុងឆ្នាំចាស់ និងបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិក្នុងលោក ជាពិសេសទេវតាឆ្នាំថ្មី ព្រះនាម មណ្ឌាទេវី (បុត្រីទី៤ នៃកបិលមហាព្រហ្ម) សូមជួយបីបាច់ថែរក្សា និងប្រោះព្រំសព្ទសាធុការពរជ័យដល់ថ្នាក់ដឹកនាំ មន្ត្រីរាជការ និងប្រជាពលរដ្ឋទូទាំងខេត្តបន្ទាយមានជ័យ ឱ្យជួបតែសេចក្តីសុខ សេចក្តីចម្រើន និងទទួលបានជោគជ័យគ្រប់ភារកិច្ច។

មានប្រសាសន៍ក្នុងឱកាសនោះ ឯកឧត្តម អ៊ុំ រាត្រីបានលើកឡើងថា ការរៀបចំពិធីសូត្រមន្តនេះ មិនត្រឹមតែជាការថែរក្សាទំនៀមទម្លាប់ប្រពៃណីជាតិដ៏ល្អបរិសុទ្ធប៉ុណ្ណោះទេ ប៉ុន្តែវាក៏ជាឱកាសក្នុងការបង្កើនសាមគ្គីភាពផ្ទៃក្នុងរវាងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ផងដែរ។ ឯកឧត្តមអភិបាលខេត្ត ក៏បានឆ្លៀតឱកាសនេះ ថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីរាជការ និងកងកម្លាំងទាំងអស់ ដែលបានលះបង់កម្លាំងកាយចិត្តក្នុងការបម្រើជាតិ និងប្រជាជនក្នុងឆ្នាំចាស់កន្លងទៅ។ ឯកឧត្តមបានសង្កត់ធ្ងន់ថា «សិរីសួស្ដី និងជ័យមង្គលពិតប្រាកដ គឺកើតចេញពីការរួមរួមកម្លាំងគ្នា ដើម្បីអភិវឌ្ឍន៍ខេត្ត និងការផ្តល់សេវាសាធារណៈជូនបងប្អូនប្រជាពលរដ្ឋឱ្យបានទាន់ពេលវេលា និងប្រកបដោយតម្លាភាព»។

ជាមួយគ្នានេះដែរ ឯកឧត្តមអភិបាលខេត្ត ក៏បានណែនាំដល់មន្ត្រីពាក់ព័ន្ធ និងកងកម្លាំងមានសមត្ថកិច្ច ត្រូវយកចិត្តទុកដាក់ខ្ពស់លើបញ្ហាសន្តិសុខ សណ្តាប់ធ្នាប់សាធារណៈ និងសុវត្ថិភាពចរាចរណ៍ ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋ ក៏ដូចជាភ្ញៀវទេសចរដែលមកកម្សាន្តក្នុងខេត្តបន្ទាយមានជ័យក្នុងឱកាសបុណ្យចូលឆ្នាំថ្មី ឆ្នាំមមី អដ្ឋស័ក ខាងមុខនេះ ឱ្យទទួលបាននូវភាពសប្បាយរីករាយ និងសុវត្ថិភាពខ្ពស់បំផុត។

ពិធីសូត្រមន្តបានបញ្ចប់ទៅក្នុងបរិយាកាសស្និទ្ធស្នាល និងពោរពេញដោយភាពជឿជាក់ ត្រៀមខ្លួនឈានចូលឆ្នាំថ្មី ជាមួយនឹងស្មារតីទទួលខុសត្រូវខ្ពស់ ដើម្បីបន្តដឹកនាំ និងកសាងខេត្តបន្ទាយមានជ័យឱ្យកាន់តែមានការអភិវឌ្ឍលើគ្រប់វិស័យបន្ថែមទៀត៕

ដោយ៖ ឈុន សារ៉ាត