AKP កំពង់ធំ ថ្ងៃទី០៧ ខែមេសា ឆ្នាំ២០២៦--ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០ ដែលនឹងឈានមកដល់នៅពេលដ៏ខ្លីខាងមុខនេះនៅទីបញ្ជាការតំបន់ប្រតិបត្តិការសឹកករងកំពង់ធំ យោធភូមិភាគទី ៤ កាលពីថ្ងៃទី០៦ ខែមេសា ឆ្នាំ២០២៦ បានប្រារព្ធពិធីគោរពវិញ្ញាណក្ខន្ធ រាប់បាត្រ បង្សុកូលឧទ្ទិសកុសលផលបុណ្យជូនដល់ដួងវិញ្ញាណក្ខន្ធវីរយុទ្ធជនដែលបានពលីជីវិតក្នុងបុព្វហេតុការពារបូរណភាពទឹកដី ទប់ស្កាត់ពីការឈ្លានពានដ៏ឃោរឃៅព្រៃផ្សៃពីពួកយោធាថៃនៅតាមខ្សែបន្ទាប់ព្រំដែនកម្ពុជា-ថៃ កាលពីពេលថ្មីៗកន្លងទៅនេះ ក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងលោកជំទាវ នួន វិធាវី ព្រមទាំងមានការចូលរួមពីថ្នាក់ដឹកនាំ នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំនិងក្រុមគ្រួសារយ៉ាងច្រើនកុះករ។

ឧត្តមសេនីយ៍ទោ សោម ស៊ុន បានថ្លែងថា ជានិច្ចកាលប្រជាជនកម្ពុជាគ្រប់រូប  ព្រមទាំងនាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំនិងក្រុមគ្រួសារ ពិតជាគោរពដឹងគុណជានិច្ចមិនអាចបំភ្លេចបានឡើយនូវគុណូបការៈដ៏ថ្លៃថ្លារបស់វីរយុទ្ធជនដែលបានពលីជីវិតយ៉ាងអង់អាចក្លាហានដើម្បីបុព្វហេតុការពារជាតិ ការពារបូរណភាពទឹកដី និងការពារអាយុជីវិត ទ្រព្យសម្បត្តិរបស់ប្រជាជនកម្ពុជា ដែលទទួលរងនូវការឈ្លានពានដ៏អយុត្តិធម៌ពីពួកទាហានថៃ។

ឧត្តមសេនីយ៍ទោ សោម ស៊ុន និងលោកជំទាវ ព្រមទាំងថ្នាក់ដឹកនាំ នាយទាហាន នាយទាហានរងនិងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងក្រុមគ្រួសារបានគោរពវិញ្ញាណក្ខន្ធ រាប់បាត្រ បង្សុកូល ឧទ្ទិសកុសលនៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះនិងសូមបួងសួងដល់ដួងវិញ្ញាណក្ខន្ធរបស់វីរយុទ្ធជនយើងបានទៅកាន់សុខគតិភពហើយបងប្អូនវីរយុទ្ធជនដែលកំពុងរងរបួស ពិការ ឬមានជំងឺ សូមឱ្យបានឆាប់ជាសះស្បើយនិងមានសុខភាពល្អ៕

ដោយ ស៊ុម វណ្ណា