AKP កណ្តាល ថ្ងៃទី០៧ ខែមេសា ឆ្នាំ២០២៥-- អង្គការ WWT ប្រចាំកម្ពុជា បានទទួលស្វាគមន៍អ្នកស្រាវជ្រាវមកពីអង្គការ WWT ចក្រភពអង់គ្លេសគឺលោក Kane Brides និងលោក Dan Gornall រួមជាមួយលោកស្រី Cao Lei មកពី Chinese Academy of Sciences ក្នុងបេសកកម្មផ្តោតលើការការពារតំបន់ដីសើម និងការអភិរក្សសត្វក្រៀល ដែលជាប្រភេទសត្វមានសារៈសំខាន់ផ្នែកវប្បធម៌ និងកំពុងស្ថិតក្នុងបញ្ជីក្រហមជាប្រភេទកំពុងទទួលរងការគំរាមកំហែងជាសកល (Vulnerable)។ នេះបើតាមប្រភពពី អង្គការ WWT នៅថ្ងៃទី០៦ ខែមេសា ឆ្នាំ២០២៦។

ក្រុមការងារបានចុះទៅដល់ទីតាំងសំខាន់ៗដែលសត្វក្រៀលរកចំណី នៅរដូវមិនបន្តពូជ រួមមាន៖ តំបន់ការពារទេសភាព អាងត្រពាំងថ្ម តំបន់ការពារទេសភាព បឹងព្រែកល្ពៅ និងតំបន់ការពារទេសភាព អន្លង់ព្រីង ដែលទីតាំងទាំងនេះបានបង្ហាញយ៉ាងច្បាស់ពីតួនាទីដ៏សំខាន់នៃតំបន់ដីសើមសម្រាប់សត្វក្រៀល ក៏ដូចជាសហគមន៍ដែលអាស្រ័យផលពីតំបន់ទាំងនោះ។

អង្គការ WWT ប្រចាំកម្ពុជា នៅតែបន្តប្តេជ្ញាចិត្តខ្ពស់ក្នុងការសហការជាមួយដៃគូពាក់ពាន់ អាជ្ញាធរមូលដ្ឋាន និងសហគមន៍ក្នុងនិងជុំវិញតំបន់ ដើម្បីកសាងតំបន់ដីសើមនៅតំបន់ដីសណ្ដទន្លេមេគង្គឱ្យមានជីវៈចម្រុះសម្បូរបែប និងមានភាពធន់នឹងការប្រែប្រួលអាកាសធាតុ ដែលតំបន់ដីសើម មនុស្ស និងសត្វព្រៃអាចរស់នៅ និងអាស្រ័យផលរួមគ្នា។

ជាមួយនឹងចំនួន សត្វក្រៀល ដែលនៅសេសសល់ប្រមាណត្រឹមតែ ២០០ក្បាល ក្នុងប្រទេសកម្ពុជា ការចាត់វិធានការបន្ទាន់គឺជារឿងចាំបាច់បំផុត។ ទស្សនកិច្ចនេះត្រូវបានរៀបចំឡើងដើម្បីពង្រឹងមូលដ្ឋានគ្រឹះវិទ្យាសាស្ត្រ និងប្រតិបត្តិការ សម្រាប់គម្រោងបំពាក់ឧបករណ៍ (GPS) នាពេលអនាគត តាមរយៈការចូលរួមពីភាគីពាក់ព័ន្ធ ការពិគ្រោះយោបល់ផ្នែកបច្ចេកទេស និងការចុះវាយតម្លៃផ្ទាល់នៅតាមទីតាំងជាក់ស្តែង។

អង្គការ WWT យើងសូមថ្លែងអំណរគុណយ៉ាងជ្រាលជ្រៅចំពោះដៃគូសហការរបស់យើង រួមមាន ក្រសួងបរិស្ថាន មន្ទីរបរិស្ថានខេត្តតាកែវ និង ខេត្តកំពត អង្គការជីវិតធម្មជាតិនៅកម្ពុជា (NatureLife Cambodia) អង្គការសមាគមអភិរក្សសត្វព្រៃ (WCS) និងមជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) សម្រាប់ការកិច្ចសហការ គាំទ្រ និងការចែករំលែកចំណេះដឹងដ៏មានតម្លៃ៕

ដោយ ណយ នឿន (ប្រភព៖ WWT)