AKP ភ្នំពេញ ថ្ងៃទី០៦ ខែមេសា ឆ្នាំ២០២៦--ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រកាសជូនដំណឹងស្តីពីការរៀបចំព្រឹត្តិការណ៍ប្រកួតកីឡាវាយសីជ្រើសរើសជើងឯកនគរបាលអាស៊ីអាគ្នេយ៍ (Southeast Asia Police Badminton Championship 2025) ពានរង្វាន់ ឯកឧត្តមអភិសន្តិបណ្ឌិត ស សុខា លើកទី២ ឆ្នាំ២០២៥ ពីថ្ងៃទី២៦-៣០ ខែឧសភា ឆ្នាំ២០២៦ នៅរាជធានីភ្នំពេញ។

សេចក្តីជូនដំណឹងរបស់ឯកឧត្តមអភិសន្តិបណ្ឌិត ស សុខា បានឱ្យដឹងថា ក្រសួងមហាផ្ទៃសូមជម្រាបជូនដំណឹងដល់ឯកឧត្តម លោកជំទាវ ជាអគ្គស្នងការ អគ្គលេខាធិការ អគ្គនាយក អគ្គាធិការ និងអង្គភាពថ្នាក់ប្រហាក់ប្រហែលទាំងអស់ជ្រាបថា៖ ដើម្បីចូលរួមលើកកម្ពស់វិស័យកីឡា រឹតចំណងមិត្តភាព សាមគ្គីភាព និងកិច្ចសហប្រតិបត្តិការ ក្នុងក្របខ័ណ្ឌមន្ត្រីរាជការស៊ីវិល មន្ត្រីនគរបាលជាតិ មន្ត្រីពន្ធនាគារ ក្រសួងមហាផ្ទៃនឹងរៀបចំឡើងវិញនូវព្រឹត្តិការណ៍ប្រកួត កីឡាវាយសីជ្រើសរើសជើងឯក នគរបាលអាស៊ីអាគ្នេយ៍ (Southeast Asia Police Badminton Championship 2025) ពានរង្វាន់ឯកឧត្តមអភិសន្តិបណ្ឌិត ស សុខា លើកទី២ ឆ្នាំ២០២៥ ជាពិសេសបានអញ្ជើញបណ្តាក្លឹបកីឡាវាយសីយុវជន ជានគរបាលមកពីប្រទេសក្នុងតំបន់អាស៊ីអាគ្នេយ៍មកចូលរួមប្រកួត។

ព្រឹត្តិការណ៍នេះត្រូវបានធ្វើឡើងក្នុងគោលបំណងពង្រីកកិច្ចសហប្រតិបត្តិការលើវិស័យកីឡាជាមួយក្លឹបកីឡាវាយសី មកពីប្រទេសនានាក្នុងតំបន់ ដែលកម្មវិធីនឹងប្រព្រឹត្តទៅរយៈពេល ៥ថ្ងៃ ចាប់ពីថ្ងៃទី២៦ ដល់ថ្ងៃទី៣០ ខែឧសភា ឆ្នាំ២០២៦ នៅរាជធានីភ្នំពេញ។ សេចក្តីជូនដំណឹងនេះបានប្រកាសដល់ឯកឧត្តម លោកជំទាវ រៀបចំក្លឹបកីឡាវាយសីនៅតាមសាមីអង្គភាពរបស់ខ្លួនចុះឈ្មោះចូលរួមប្រកួតនៅអគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃ ចាប់ពីថ្ងៃជូន ដំណឹងនេះ រហូតដល់ថ្ងៃទី១៥ ខែឧសភា ឆ្នាំ២០២៦ ឱ្យបានច្រើនកុះករ៕

ដោយ ហេង ណាលីន