AKP កំពង់ធំ ថ្ងៃទី០៦ខែមេសាឆ្នាំ២០២៦--លោក សាយ គឹមឡម អភិបាលស្រុកនិងជាប្រធានគណៈបញ្ជាការឯកភាពរដ្ឋបាលស្រុកស្ទោងលើកទឹកចិត្តដល់កងកម្លាំងត្រូវរក្សាសន្តិសុខសណ្តាប់ធ្នាប់ជូនពលរដ្ឋខ្មែរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរប្រកបដោយសុខសុវត្ថិភាពក្នុងឱកាសដែល លោកនិងសហការីអញ្ជើញជួបសំណេះសំណាលសួរសុខទុក្ខនិងលើកទឹកចិត្តកងកម្លាំងនៃអធិការដ្ឋាននគរបាលស្រុកស្ទោង និងប្រជាការពារនាព្រឹកថ្ងៃទី០៦ ខែមេសាឆ្នាំ២០២៦នៅអធិការដ្ឋាននគរបាលស្រុកស្ទោង ខេត្តកំពង់ធំ។

លោកសាយ គឹមឡមបានសង្កត់ធ្ងន់ថាដើម្បីឱ្យពុកម៉ែបងប្អូនប្រជាពលរដ្ឋកម្សា ន្តសប្បាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរប្រកបដោយភាពរីករាយនិងជួបជុំក្រុមគ្រួសារ ញាតិមិត្តជិតឆ្ងាយ។កងកម្លាំងនៃអធិការរដ្ឋាននគរបាលស្រុកស្ទោង និងប៉ុស្តិ៍នគរបាលរដ្ឋបាលព្រមទាំងបងប្អូនប្រជាការពារត្រូវខិតខំអនុវត្តតួនាទី/ភារកិច្ច ជាពិសេសធ្វើការបែងចែកវេន កងកម្លាំងនិងពេលវេលាឱ្យបានសមស្រប តាមតំបន់ទេសចរណ៍ទីកម្សាន្តនានា គ្រប់បណ្ដាវត្តអារាមក្នុងស្រុកស្ទោងក្នុងការទប់ស្កាត់អំពើអាណាធិបតេយ្យនានា ក្មេងទំនើង ចោរកម្ម គ្រឿងញៀន ឱ្យខានតែបាន។

លោក សាយ គឹមឡម ពិអភិបាលស្រុកស្ទោង បានលើកទឹកចិត្តដល់កងកម្លាំងទាំងអស់ នៃអធិការដ្ឋាននគរបាលស្រុកស្ទោង ត្រួតពិនិត្យបច្ចេកទេស និងប្រព័ន្ធសុវត្ថិភាពនៃរថយន្តពន្លត់អគ្គីភ័យដើម្បីធានាការជួយសង្គ្រោះឧបរហេតុអគ្គីភ័យបានទាន់ពេលវេលា ហើយបងប្អូនប្រជាការពារធ្វើខ្លួនជាមនុស្សគំរូ ក្រុមគ្រួសារគំរូ មានឥរិយាបថសមរម្យ និងមានសេចក្តីថ្លៃថ្នូរ អប់រំណែនាំប្រៀនប្រដៅកូនចៅប្រកបដោយព្រហ្មវិហារធម៌ គន្លងធម៌ ប្រាសចាកពីក្មេងទំនើង គ្រឿងញៀន និងអំពើអាណាធិបតេយ្យផ្សេងៗ ។

លោកបានថ្លែងអំណរគុណយ៉ាងជ្រាលជ្រៅបំផុតដល់កងកម្លាំង និងបងប្អូនប្រជាការពារដែលបានខិតខំលះបង់សព្វបែបយ៉ាងក្នុងការរក្សាសន្តិសុខសុវត្ថិភាពជូនពលរដ្ឋក្នុងមូលដ្ឋានមិនថាយប់ថ្ងៃឬក្នុងស្ថានភាពបែបណាក៏ដោយ។

ក្នុងនាមប្រធានគណបញ្ជាការឯកភាពរដ្ឋបាលស្រុកស្ទោង លោក សាយ គឹមឡម តែងឧបត្ថម្ភគាំពារជារឿយៗដល់កងកម្លាំង នៃអធិការរដ្ឋាននគរបាលស្រុកស្ទោង និងបងប្អូនប្រជាការពារកន្លងមកហើយក្នុងឱកាសនេះលោកបានឧបត្ថម្ភដល់ប្រជាការពារ ១៨០នាក់ក្នុងម្នាក់១ម៉ឺនរៀល និងកងកម្លាំងនគរបាលស្ត្រី០៥នាក់ក្នុងម្នាក់២ម៉ឺនរៀល៕

ដោយ៖ ស៊ុម វណ្ណា