AKP ឧត្តរមានជ័យ ថ្ងៃទី​០៦​ ខែមេសា​ ឆ្នាំ២០២៦​--ឯកឧត្ដម​ មាន​ ចាន់យ៉ាដា​ អភិបាល​ នៃ​គណ:អភិបាល​ខេត្តឧត្តរមានជ័យ​ ចុះពិនិត្យវឌ្ឍនភាពការងារស្ដារប្រឡាយរំដោះទឹក​ ១​ខ្សែក្រុងសំរោង​ ចា​ប់ពីចំណុចសណ្ឋាគារឈឺនប្រាក់កប​ ឆ្ពោះទៅសាលាបឋមសិក្សាដូនកែន-ភ្នៀត​ និងផ្ដល់អនុសាសន៍​​ ដឹកនាំបន្ត​ ដើម្បីសម្រេចស្រប​តាមផែនការកំណត់ កាលពីថ្ងៃទី០​៥​ ខែមេសា​ ឆ្នាំ២០២៦។ 

ឯកឧត្ដម​ មាន​ ចាន់យ៉ាដា​ បានថ្លែងថា​ ការស្តារឡើងវិញ​ នូវប្រឡាយរំដោះទឹកចេញពីទីប្រជុំជនក្រុង ១ខ្សែនេះ​ គឺជាកិច្ចការអភិវឌ្ឍន៍ហេដ្ឋារចនាសម្ព័ន្ធដ៏សំខាន់បំផុតមួយ ដើម្បីធានានូវចីរភាព និងសណ្តាប់ធ្នាប់ទីក្រុង​ ការរំដោះទឹកភ្លៀងចេញពីផ្លូវ និងលំនៅឋានឲ្យបានទាន់ពេលវេលា។ 

ឯកឧត្ដមបន្តថា នៅពេលមានប្រឡាយខ្វាត់ខ្វែង និងមានប្រសិទ្ធភាព វាជួយកាត់បន្ថយការកកស្ទះទឹកនៅលើដងផ្លូវ មិនបង្កការលំបាកដល់ការធ្វើដំណើរ​ និងការខូចខាតដោយសារទឹកជំនន់នារដូវវស្សាទៀតនោះទេ។

ការកាយប្រឡាយរំដោះទឹក មិនត្រឹមតែជាការដោះស្រាយបញ្ហាទឹកជំនន់ប៉ុណ្ណោះទេ ប៉ុន្តែវាគឺជាការវិនិយោគលើ សុខភាពសាធារណៈ សេដ្ឋកិច្ច និងភាពស្រស់បំព្រង នៃទីក្រុងទាំងមូលផងដែរ ៕

ដោយ ៖ទិត ស្រ៊