AKP ខេត្តព្រះសីហនុថ្ងៃទី០៦  ខែមេសា ឆ្នាំ២០២៦--ព្រឹកថ្ងៃទី៦ ខែមេសា ឆ្នាំ២០២៦ គណ:ប្រតិភូខេត្តកាម៉ាវ (ប្រទេសវៀតណាម) ដឹកនាំដោយលោក ងូ វូ ថាំង អនុប្រធានគណៈកម្មាធិការប្រជាជនខេត្តកាម៉ាវ អញ្ជើញជូនពរថ្នាក់ដឹកនាំខេត្តព្រះសីហនុ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរនឹងឈានចូលមកដល់នាពេលខាងមុខ នៅសណ្ឋាគារឆ្នេរថ្មី ស្ថិតនៅសង្កាត់​លេខ៣ ក្រុងព្រះសីហនុ ។ 
 លោក ឯម ភាព អភិបាលរងខេត្តព្រះសីហនុ តាងនាមជំនួសឪ្យឯកឧត្តម ម៉ាង ស៊ីណេត អភិបាល នៃគណៈអភិ​បាលខេត្តព្រះសីហនុ សូមស្វាគមន៍ចំពោះវត្តមានគណៈប្រតិភូខេត្តកាម៉ាវ ប្រទេសវៀតណាម ដែលបានមកទស្សនកិច្ច​សួរសុខទុក្ខ និងជូន​ពរថ្នាក់ដឹកនាំខេត្ត និងប្រជាជនខេត្តព្រះសីហនុ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំមមី អដ្ឋស័ក ព.ស.២៥៧៩ គ.ស.២០២៦។ 

ខេត្តព្រះសីហនុ និងខេត្តកាម៉ាវ មានទំនាក់ទំនងសម្ព័ន្ធមេត្រីភាពយ៉ាងជិតស្និទ្ធ និងរឹងមាំយូរមកហើយ ក្នុងនោះប្រតិភូខេត្តទាំងពីរតែងតែបានផ្លាស់ប្តូរទស្សនកិច្ច និងជូនពរថ្នាក់ដឹកនាំទៅវិញទៅមកនេះ មិនត្រឹមតែបង្កើនការយល់ដឹង និងការគាំទ្រគ្នាប៉ុណ្ណោះទេ ប៉ុន្តែថែមទាំងជួយបង្កើតនូវភាពស្និទ្ធស្នាលផងដែរ។  
លោក អភិបាលរងខេត្តព្រះសីហនុ បានបញ្ជាក់ថា ខេត្តព្រះសីហនុ គឺជាខេត្តមួយដែលមានសក្តានុពលខ្ពស់ ស្ថិតនៅផ្នែកនិរតី នៃប្រទេសកម្ពុជា មានផ្ទៃដីសរុប ២.៦៥៨,៩០គីឡូម៉ែត្រក្រឡា ប្រជាជនប្រមាណ ៣១០.០០០នាក់។ ក្នុងឆ្នាំ២០២៤ ខេត្តមានអត្រាកំណើនសេដ្ឋកិច្ច ៥,៤% មានចំណូលប្រចាំឆ្នាំសរុបប្រមាណ ១ ៣២០លានដុល្លារអាមេរិក និងចំណូលជាមធ្យមសម្រាប់មនុស្សម្នាក់ (GDP) ក្នុងមួយឆ្នាំមានចំនួន ៤ ២៥៦ដុល្លារអាមេរិក។

លោកបន្តថា ខេត្តព្រះសីហនុ មានសក្តានុពលខ្ពស់ក្នុងវិស័យឧស្សាហកម្ម ទេសចរណ៍ ពាណិជ្ជកម្ម និងភស្តុភារកម្ម មានកំពង់​ផែសមុទ្រទឹកជ្រៅ អាកាសយាន្តដ្ឋានអន្តរជាតិ ផ្លូវល្បឿនលឿន ផ្លូវដែក និងតំបន់សេដ្ឋកិច្ចពិសេសជាច្រើន។ ក្នុងរយៈពេលប៉ុន្មានឆ្នាំចុងក្រោយនេះ ខេត្តបានទទួលការវិនិយោគយ៉ាងសកម្មនាំឱ្យមានការកើនឡើងនៃរោងចក្រ សហគ្រាស និងឱកាសការងារជាច្រើនសម្រាប់ប្រជាពលរដ្ឋ។ តាមរយៈការគិតគូរយ៉ាងជាក់លាក់ គ្រប់ជ្រុងជ្រោយ និងស្មារតីទទួលខុសត្រូវរបស់រាជរដ្ឋាភិបាលនីតិកាលទី៧ នៃរដ្ឋសភា ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណា ចក្រកម្ពុជា កាលពីថ្ងៃទី៣១ ខែមករា ឆ្នាំ ២០២៤ សម្តេចបវរធិបតីបានអញ្ជើញជាអធិបតីក្នុងពិធីប្រកាសដាក់ឱ្យអនុវត្តជាផ្លូវការនូវ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ក្នុងគោលបំណង ដើម្បីដាក់ចេញនូវវិធានការ និងយន្តការដែលមានលក្ខណៈជាកញ្ចប់ ប្រទាក់ក្រឡា មុតស្រួច និងសាមញ្ញ ហើយកម្មវិធីពិសេសនេះ រាជរដ្ឋាភិបាលសម្រេចបន្តអនុវត្តរហូតដំណាច់ឆ្នាំ២០២៧ ដើម្បីជំរុញការអភិវឌ្ឍខេត្តព្រះសីហនុ ឆ្លើយតបនឹងគោលបំណងរបស់រាជរដ្ឋាភិបាល។ ការប្រកាសដាក់ចេញនូវ “កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤” ជាលទ្ធផលក្រុមការងារពិសេសជំរុញការវិនិយោគទទួលបានសំណើសុំលើកទឹកចិត្ត ក្នុងនោះគម្រោងដែលទទួលបានលិខិតអនុញ្ញាតជាគោលការណ៍ចំនួន ៤៦៧គម្រោង មានទុនវិនិយោគសរុបប្រមាណ ៨,១៨លានដុល្លារអាមេរិក និងប៉ាន់ស្មានអាចបង្កើតឱកាសការងារចំនួន ៥៥ ១២៤កន្លែងផងដែរ។ 

លោក ងូ វូ ថាំង អនុប្រធានគណៈកម្មាធិ ការប្រជាជនខេត្តកាម៉ាវ បានថ្លែងអំណរ គុណថ្នាក់ដឹកនាំខេត្តព្រះសីហនុ​ ដែលបានទទួលស្វាគមន៍ប្រតិភូខេត្តកាម៉ាវ​នាពេលនេះ ហើយខេត្តកាម៉ាវ និងខេត្តព្រះសីហនុជាខេត្តសម្ព័ន្ធមេត្រីភាពតាំងពីឆ្នាំ២០១៤ រហូតមកដល់ពេលនេះមានជាង១០ឆ្នាំមកហើយ ដើម្បីរឹតចំណងមិត្តភាព សាមគ្គីភាព និងកិច្ចសហប្រតិបត្តិការកាន់តែជិតស្និតថែមទៀត។ ជារៀងរាល់ឆ្នាំខេត្តទាំងពីរតែងតែបានបញ្ជូនគណៈប្រតិភូទៅសួសុខទុក និងជូនពរគ្នាទៅវិញទៅមក ព្រមទាំងបានធ្វើការផ្លាស់ប្តូរបទពិសោធន៍ពីគ្នា ព្រមជាមួយកិច្ចសហប្រតិបត្តិការបានល្អផងដែរ ។

 ឆ្នាំ២០២៥ រដ្ឋាភិបាលវៀតណាម បានរៀបចំហេដ្ឋារចនាសម្ព័ន្ធ ពីមជ្ឈឹមមកដល់មូលដ្ឋាន ដែលបានបញ្ចូលគ្នារវាងខេត្តបាក់លីវ ជាមួយខេត្តកាម៉ាវថ្មីមួយដើម្បីសម្របខ្លួនទៅនិងការវិវឌ្ឍរីកចម្រើននាពេលបច្ចុប្បន្ន ខេត្តកាម៉ាវ ក៏មានការអភិវឌ្ឍរីកចម្រើនធ្វើឪ្យកំណើនសេដ្ឋកិច្ចមាន៨ភាគរយ លោកសង្ឃឹមថា​ ខេត្ត​កាម៉ាវ និងខេត្តព្រះសីហនុ នឹងរៀបចំធ្វើសន្និបាតបូកសរុបលទ្ធផលការងារនៅពេលខាងមុខ៕

 ដោយ៖ ងូ សុមុនី