AKP ភ្នំពេញ ថ្ងៃទី០៣ ខែមេសា ឆ្នាំ២០២៦ -- រដ្ឋមន្ត្រីការបរទេសចិនលោក វ៉ាង យី (Wang Yi) កាលពីថ្ងៃព្រហស្បតិ៍ បានជំរុញឱ្យក្រុមប្រឹក្សាសន្តិសុខអង្គការសហប្រជាជាតិ (UNSC) កុំគាំទ្រប្រតិបត្តិការយោធាដែលគ្មានការអនុញ្ញាតនៅមជ្ឈិមបូព៌ា ដោយបានព្រមានថា ជម្លោះដែលបន្តអាចនាំឱ្យមានបញ្ហាគ្មានទីបញ្ចប់។

លោក វ៉ាង បានធ្វើការកត់សម្គាល់នេះក្នុងអំឡុងពេលនៃការសន្ទនាតាមទូរស័ព្ទមួយជាមួយរដ្ឋមន្ត្រីការបរទេសអារ៉ាប៊ីសាអូឌីត លោក ហ្វៃសាលប៊ីន ហ្វាហាន អាល់ សូដ (Faisal bin Farhan Al Saud)។ លោកបានគូសបញ្ជាក់ថា ច្រកសមុទ្រហ័រមុសនៅតែមិនស្ថិតស្ថេរ ប្រសិនបើសង្គ្រាមមិនបញ្ចប់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មានស៊ីនហួរ។

លោក វ៉ាង បាននិយាយថា «អាទិភាពចម្បង គឺផ្តោតទៅលើការបញ្ឈប់អរិភាព។ សកម្មភាពរបស់ក្រុមប្រឹក្សាសន្តិសុខអង្គការសហប្រជាជាតិ គួរតែជៀសវាងការប្រឈមមុខដាក់គ្នាកាន់តែខ្លាំងឡើង ហើយមិនគួរធ្វើឱ្យប្រតិបត្តិការយោធាដែលគ្មានការអនុញ្ញាតស្របច្បាប់នោះទេ។ បើមិនដូច្នោះទេ វានឹងនាំឱ្យមានបញ្ហាគ្មានទីបញ្ចប់ដោយប្រទេសតូចៗ និងមធ្យមជាអ្នកដំបូងគេដែលទទួលរងនូវផលវិបាកធ្ងន់ធ្ងរ»។

មុននេះបន្តិច លោក វ៉ាង បានធ្វើការអំពាវនាវស្រដៀងគ្នានេះក្នុងអំឡុងពេលនៃការសន្ទនាតាមទូរស័ព្ទជាមួយរដ្ឋមន្ត្រីការបរទេសបារ៉ែនលោក អាប់ឌុលឡាទីហ្វ ប៊ីន រ៉ាស៊ីដ អាល់ ហ្សាយ៉ានី (Abdullatif bin Rashid Al Zayani) ដែលស្របពេលជាមួយនឹងសម័យប្រជុំក្រុមប្រឹក្សាសន្តិសុខអង្គការសហប្រជាជាតិ ដែលកំពុងពិភាក្សាអំពីដំណោះស្រាយដែលដាក់ដោយបារ៉ែន។

ការកត់សម្គាល់នេះបានកើតឡើងចំពេលដែលមានភាពតានតឹងកាន់តែខ្លាំងឡើងនៅមជ្ឈិមបូព៌ា ចាប់តាំងពីការវាយលុករួមគ្នារវាងសហរដ្ឋអាមេរិកនិងអ៊ីស្រាអែលប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈ ដែលរហូតមកដល់ពេលនេះបានសម្លាប់មនុស្សជាង ១.៣៤០នាក់ហើយ រួមទាំងមេដឹកនាំកំពូលអ៊ីរ៉ង់ លោក អាលី ខាមេណី (Ali Khamenei) ផងដែរ។

ដោយ៖ យា ចិន្ដាខន្ដី (ប្រភព៖ AA-AKP)