AKP ភ្នំពេញ ថ្ងៃទី០១ ខែមេសា ឆ្នាំ២០២៦--រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវ បណ្ឌិតសភាចារ្យ ភឿង សកុណា បានចុះពិនិត្យរមណីយដ្ឋានប្រាសាទគុកយាយហម ស្ថិតនៅខេត្តកំពង់ចាម។ ក្រសួងវប្បធម៌បានឱ្យដឹងថា ក្នុងដំណើរចុះពិនិត្យនៅថ្ងៃទី៣១ ខែមីនា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ដែលអមដំណើរដោយថ្នាក់ដឹកនាំក្រសួង និងមន្រ្តីជំនាញនៃមន្ទីរវប្បធម៌ និងវិចិត្រសិល្បៈខេត្តកំពង់ចាម បានចុះពិនិត្យទីតាំងប្រាសាទគុកយាយហម ដែលស្ថិតនៅក្នុងភូមិជ្រេស ឃុំព្រៃឈរ ខេត្តកំពង់ចាម។ ថ្លែងក្នុងពិធីនោះ រដ្ឋមន្រ្តីក្រសួងវប្បធម៌ បានធ្វើការណែនាំដល់មន្រ្តីជំនាញឱ្យបន្តយកចិត្តទុកដាក់ជួសជុល ថែរក្សារូបបដិមា សំណង់ប្រាសាទ បរិស្ថានជុំវិញ និងត្រូវរៀបចំកែច្នៃរមណីយដ្ឋានប្រាសាទគុកយាយហមនេះឱ្យមានសោភ័ណ្ឌភាពដើម្បីឆ្លើយតបដល់កិច្ចការអភិរក្ស និងអភិវឌ្ឍន៍បេតិកភណ្ឌវប្បធម៌ផង និងដើម្បីសម្រាប់បម្រើឱ្យវិស័យទេសចរណ៍ផង។

គួរបញ្ជាក់ថា ប្រាសាទគុកយាយហម ជាប្រាសាទបុរាណដ៏ចំណាស់មួយស្ថិតដែលមានចម្ងាយប្រមាណ ៩០គីឡូម៉ែត្រពីរាជធានីភ្នំពេញ។ តួប្រាង្គប្រាសាទនេះធ្វើអំពីថ្មភក់សុទ្ធសាធ មានទ្វារចូលបែររកទិសទាំងបួន៕

ដោយ៖ មករា