AKP ភ្នំពេញ ថ្ងៃទី០១ ខែមេសា ឆ្នាំ២០២៦--ទិវាវប្បធម៌ជាតិ ៣មីនា គឺជាព្រឹត្តិការណ៍ជាតិដ៏មានសារៈសំខាន់ ដើម្បីរំលឹកនូវគុណណូបការៈរបស់បុព្វបុរសខ្មែរគ្រប់ជំនាន់ ដែលបានលះបង់ទាំងកម្លាំងកាយ ចិត្ត ប្រាជ្ញាស្មារតី និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបាន។ នេះជាការបញ្ជាក់របស់លោកជំទាវ ឈី វ៉ា អភិបាល អភិបាល នៃគណៈអភិបាលខេត្តកោះកុង ក្នុងទិវាវប្បធម៌ជាតិ ៣មីនា លើកទី២៨ ឆ្នាំ២០២៦ ក្រោមប្រធានបទ "យុវជនដើម្បីវប្បធម៌ជាតិ" ដែលបានប្រារព្ធធ្វើឡើងនាថ្ងៃទី៣១ ខែមីនា ឆ្នាំ២០២៦។

ក្នុងឱកាសនោះ លោកជំទាវ ឈី វ៉ា បានវាយតម្លៃខ្ពស់ចំពោះលទ្ធផលវិជ្ជមាន ដែលបានកើតចេញពីដំណើរការអភិរក្ស និងអភិវឌ្ឍវប្បធម៌ប្រកបដោយចីរភាព ការថែរក្សា ការពារ បណ្តុះបណ្តាល ផ្សព្វ ផ្សាយ ផ្ទេរចំណេះជំនាញ បច្ចេកទេស ទេពកោសល្យ ជំនាញវិជ្ជាជីវៈដូនតាឱ្យដល់អ្នកជំនាន់ក្រោយ ពិសេសស្រទាប់យុជន ដែលជាទំពាំងស្នងឫស្សី ដែលពោរពេញដោយសក្តានុពលក្នុងសកម្មភាពអភិរក្សទំនើបកម្ម និងការបង្កើតថ្មី។

លោកជំទាវអភិបាលខេត្តបានបន្តថា ទិវាប្បធម៌ជាតិ ៣មីនា ដែលប្រារព្ធឡើងជារៀងរាល់ឆ្នាំ ធ្វើឡើងក្នុងបំណង៖ ១. លើកកម្ពស់មនសិការស្នេហាជាតិ ភាពជាម្ចាស់នៃកេរដំណែលវប្បធម៌ និងភាពជាពលរដ្ឋ ក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាប័ន្ន សំដៅធានាបាននូវសុខដុមរមនាសង្គម សេចក្តីថ្លៃថ្នូរ និងកិត្យានុភាពជាតិ ដើម្បីចូលរួមកសាងកម្ពុជាជាអរិយប្រទេស។ ២. បំផុសប្រជាពលរដ្ឋកម្ពុជាគ្រប់រូប ជាពិសេសយុវជនចូលរួមជាកម្លាំងចលករក្នុងកិច្ចអភិរក្ស លើកស្ទួយ និងអភិវឌ្ឍវប្បធម៌ជាតិ រួមទាំងវប្បធម៌ចម្រុះរបស់សហគមន៍ជនជាតិដើមភាគតិចនៅកម្ពុជាឱ្យបានស្ថិតស្ថេរគង់វង្ស និងរីកចម្រើន ដោយមិនប្រកាន់និន្នាការនយោបាយ ជំនឿសាសនា ពណ៌សម្បុរ និងជាតិសាសន៍។ ៣. បង្កើនការយល់ដឹងអំពីតម្លៃដ៏មហាសាលនៃសម្បត្តិវប្បធម៌ជាតិដ៏សម្បូរបែប ដែលជាប្រភពមិនចេះរីងស្ងួតសម្រាប់ការអភិវឌ្ឍសេដ្ឋកិច្ចសង្គមប្រកបដោយចីរភាព តាមរយៈការបង្កើតសេវា និងផលិតផលវប្បធម៌ថ្មីៗប្រកបដោយភាពច្នៃប្រឌិតក្នុងគោលដៅពាណិជ្ជកម្ម និងទេសចរណ៍។ ៤. លើកកម្ពស់ឧស្សាហកម្មវប្បធម៌ និងច្នៃប្រឌិត និងសហគ្រាសធុនមីក្រូ តូច និងមធ្យមក្នុងវិស័យសិល្បៈវប្បធម៌ ដើម្បីរួមចំណែកការបង្កើតការងារឱ្យកាន់តែច្រើន សំដៅជំរុញការអភិវឌ្ឍសេដ្ឋកិច្ចសង្គមឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០។ ៥. បំផុសគំនិតផ្តួចផ្តើមថ្មីៗ ដែលមានលក្ខណៈច្នៃប្រឌិត និងនវានុវត្តន៍ រួមទាំងកាប្រើប្រាស់បច្ចេកវិទ្យាឌីជីថល ដើម្បីបង្កើនភាពទាក់ទាញ និងផ្តល់ភាពងាយស្រួលដល់ការចូលរួមក្នុងសកម្មភាពវប្បធម៌សម្រាប់សាធារណជនទូទៅ ជាពិសេស កុមារ យុវជន ស្ត្រី មនុស្សចាស់ និងជនមានពិការភាព ក្រោមទិសស្លោក សិល្បៈវប្បធម៌សម្រាប់យើងទាំងអស់គ្នា និង៦. លើកស្ទួយកិច្ចសហប្រតិបត្តិការ វប្បធម៌ និងទំនាក់ទំនងប្រជាជន និងប្រជាជន សំដៅលើកកម្ពស់ការយល់ដឹង និងការគោរពគ្នាទៅវិញទៅមកនៅក្នុងសហគមន៍ និងរវាងប្រជាជាតិមួយទៅប្រជាជាតិមួយ ដែលនាំមកនូវសាមគ្គីភាព មិត្តភាព សុខដុមរមនា និងសន្តិភាព។

ដោយ៖ ចាន់ សុភឿន (ប្រភព៖ រដ្ឋបាលខេត្តកោះកុង)