AKP កំពង់ធំ ថ្ងៃទី០១ ខែមេសា ឆ្នាំ២០២៦--លោក ហាន កុសល អភិបាលរងខេត្តកំពង់ធំ បានជំរុញឱ្យមន្ទីរពាក់ព័ន្ធត្រូវតែអនុវត្តនូវគោលការណ៍៧ចំណុចដើម្បីឱ្យអង្គភាពទទួលបានភាពជោគជ័យប្រកបដោយគុណភាព និងប្រសិទ្ធភាពក្នុងការអនុវត្តការងារឱ្យបានល្អប្រសើរក្នុងឱកាសជួបសំណេះសំណាលជាមួយថ្នាក់ដឹកនាំ មន្ត្រីរាជការ ក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី១ ឆ្នាំ២០២៦ កាលពីរសៀលថ្ងៃទី៣១ ខែមីនា ឆ្នាំ២០២៦ នៅសាលប្រជុំប្រាសាតោនៃរដ្ឋបាលខេត្តកំពង់ធំ។

លោក ហាន កុសល បានដាក់ចេញនូវគោលការណ៍៧ចំណុច ដើម្បីឱ្យមន្ទីរអង្គភាពទទួលបានជោគជ័យរួមមាន៖ ១. ភាពជាអ្នកដឹកនាំ មានសមត្ថភាពក្នុងការដឹកនាំ បញ្ជូនទិសដៅ និងបំផុសគំនិតឱ្យមនុស្សផ្សេងៗ ធ្វើការជាមួយគ្នាដើម្បីសម្រេចគោលដៅមួយដូចជា ក្នុងសាលា កន្លែងការងារ ឬសង្គមជាតិ។ ២.ការគ្រប់គ្រងស្ថាប័ន ជាដំណើរការនៃការរៀបចំ ដឹកនាំ និងត្រួតពិនិត្យធនធាន មនុស្ស ថវិកា ព័ត៌មាន និងបច្ចេកវិទ្យា ដើម្បីឱ្យស្ថាប័នសម្រេចគោលដៅបានឱ្យមានប្រសិទ្ធភាព។ ៣.ការផ្ដល់សេវា ជាដំណើរការដែលស្ថាប័ន ឬអង្គការ ផ្តល់សេវាដល់អតិថិជន ឬប្រជាជន ដើម្បីបំពេញតម្រូវការ និងបង្កើតការពេញចិត្តដើម្បីសម្រេចកិច្ចការនៅក្នុងអង្គភាព។ ៤.សមត្ថភាពនៃការបង្កើតថ្មី នៅតែមានសមត្ថភាពក្នុងការបង្កើតគំនិតថ្មីៗ ឬធ្វើអ្វីៗឱ្យកាន់តែប្រសើរឡើង ដើម្បីដោះស្រាយបញ្ហា ឬបំពេញតម្រូវការថ្មីៗ។ ៥.ការអភិវឌ្ឍសមត្ថភាពខ្លួនឯង បង្កើនឱ្យមានចំណេះដឹង ជំនាញ អាកប្បកិរិយា និងទំនួលខុសត្រូវរបស់ខ្លួន ដើម្បីឱ្យក្លាយជាមនុស្សល្អប្រសើរឡើង និងសម្រេចគោលដៅជីវិត។ ៦.កិច្ចការងារដែលត្រូវធ្វើបន្ត គឺមន្ទីរពាក់ព័ន្ធទាំងអស់ត្រូវតែរៀបចំប្រជុំប្រចាំត្រីមាស អង្គភាពពាក់ព័ន្ធត្រូវតែនាំសិស្ស-និស្សិត ទៅទស្សនកិច្ចនៅរមណីយដ្ឋានប្រាសាទសំបូរគុក និងតំបន់ទេសចរណ៍ផ្សេងៗនៅក្នុងខេត្តកំពង់ធំ។ មន្ទីរអប់រំ និងមន្ទីរធម្មការ.ត្រូវមានផែនការឱ្យព្រះសង្ឃផ្សព្វផ្សាយពីព្រះធម៌នៅតាមសាលារៀនមួយសប្តាហ៍ម្ដង និង៧.កម្មវិធីលើកកម្ពស់សុខភាពតាមរយៈការបង្កើតឱ្យមានការប្រកួតបាល់ទាត់មួយសប្តាហ៍ម្ដង យ៉ាងតិចឱ្យបាន៣ក្រុម ដើម្បីឱ្យមន្ត្រីរាជការមានសុខភាពល្អ។

លោក ហាន កុសល អភិបាលរងខេត្តកំពង់ធំបានផ្ដាំផ្ញើដល់មន្ទីរពាក់ព័ន្ធ និងមន្ត្រីរាជការដែលបានចូលរួមនៅក្នុងឱកាសនេះត្រូវយកចិត្តទុកដាក់អនុវត្តការងារទៅតាមតួនាទី/ភារកិច្ចរបស់ខ្លួន ដើម្បីសម្រេចបានក្នុងផែនការប្រចាំត្រីមាស ឆមាស និងប្រចាំឆ្នាំ។

ក្នុងកិច្ចប្រជុំនេះលោក លោកស្រីប្រធានមន្ទីរពាក់ព័ន្ធបានឡើងធ្វើបទបង្ហាញអំពីសមិទ្ធផលសំខាន់ៗ បញ្ហាប្រឈម ដំណោះស្រាយ និងសំណូមពរ៕

ដោយ ស៊ុម វណ្ណា