AKP ភ្នំពេញ ថ្ងៃទី៣១ ខែមីនា ឆ្នាំ២០២៦–ឯកឧត្តម នាយឧត្តមសេនីយ៍ សាស្រ្តាចារ្យ សេង ផល្លី អគ្គនាយក នៃអគ្គនាយកដ្ឋានធនធានមនុស្ស ថ្ងៃ ទី៣១ ខែមីនា ឆ្នាំ២០២៦ បានដឹកនាំកិច្ចប្រជុំស្ដីពីការសុំច្បាប់ និងអនុញ្ញាតច្បាប់ឈប់គ្រប់ប្រភេទ សម្រាប់មន្រ្ដីនគរបាលជាតិតាមប្រព័ន្ធបច្ចេកវិទ្យាឌីជីថល (VATTMEAN APP) ក្នុងគោលបំណងជំរុញឱ្យអនុវត្ដការសុំច្បាប់ឈប់សម្រាកតាមប្រព័ន្ធឌីជីថលទាំងក្នុងប្រទេស និងក្រៅប្រទេសមានលក្ខណៈងាយស្រួល ឆាប់រហ័ស និងកាត់បន្ថយនីតិវិធី ដែលពីមុនមានរយៈពេលយូរក្នុងការចេញលិខិតអនុញ្ញាតច្បាប់ស្របតាមលិខិតបទដ្ឋានដែលបានកំណត់។ 

ក្នុងកិច្ចប្រជុំនេះ នាយឧត្តមសេនីយ៍ សាស្រ្តាចារ្យ អគ្គនាយកបានគូសបញ្ជាក់ថា កម្មវិធីវត្តមាន(VATTMEAN) គឺជាប្រព័ន្ធបច្ចេកវិទ្យាឌីជីថលប្រើសម្រាប់គ្រប់គ្រងវត្តមានមន្រ្តីនគរបាលជាតិ សុំច្បាប់ឈប់សម្រាកគ្រប់ប្រភេទ និងសុំច្បាប់ឈប់ដើម្បីចេញទៅក្រៅប្រទេស បង្កើតឡើងតាមគំនិតផ្តួចផ្តើមដ៏ខ្ពង់ខ្ពស់របស់ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ណែនាំដល់អគ្គនាយកដ្ឋានធនធានមនុស្សឱ្យសិក្សាបង្កើតកម្មវិធីវត្តមានមហាផ្ទៃ ដោយមានកិច្ចសហការល្អជាមួយអគ្គនាយដ្ឋានបច្ចេកវិទ្យាឌីជីថល និងអង្គភាពពាក់ព័ន្ធ ហើយបានដាក់ឱ្យដំណើរការកម្មវិធីនេះរួចរាល់ព្រមទាំងបានសហការជាមួយអង្គភាពពាក់ព័ន្ធ ចុះបង្ហាត់បង្រៀនដល់មន្រ្តីទទួលបន្ទុកការងារបុគ្គលិក និងអ្នកពាក់ព័ន្ធបានបញ្ចប់នៅថ្នាក់ក្រសួងរួចហើយ និងបន្តសហការចុះបង្ហាត់បង្រៀនមន្រ្តីទទួលបន្ទុកការងារបុគ្គលិក និងអ្នកពាក់ព័ន្ធនៅតាមស្នងការដ្ឋាននគរបាលរាជធានី ខេត្ត ជាបន្តបន្ទាប់ទៀត។

នាឱកាសនេះ ឯកឧត្តម នាយឧត្តមសេនីយ៍ សាស្រ្តាចារ្យ សេង ផល្លី បានផ្ដាំផ្ញើដល់អង្គប្រជុំ៖ ១. ស្នើតំណាងអង្គភាពពាក់ព័ន្ធទាំងអស់ជំរុញដល់មន្រ្ដីក្រោមឱវាទប្រើប្រាស់កម្មវិធីវត្តមាន (VATTMEAN) ក្នុងការស្នើសុំអនុញ្ញាតច្បាប់គ្រប់ប្រភេទសម្រាប់មន្រ្តីនគរបាលជាតិថ្នាក់ក្រសួងមហាផ្ទៃ ដោយពុំចាំបាច់ប្រើប្រាស់លិខិតសុំអនុញ្ញាតច្បាប់ជាលាយលក្ខណ៍អក្សរនោះទេ។ ២. ដោយឡែកចំពោះស្នងការដ្ឋាននគរបាលរាជធានី-ខេត្ត នៅបន្តប្រើប្រាស់ទម្រង់លិខិតតាមបែបបទរដ្ឋបាលជាបណ្ដោះអាសន្ន ដោយរង់ចាំមន្រ្តីជំនាញរៀបចំកម្មវិធី និងបណ្តុះបណ្តាលការប្រើប្រាស់កម្មវិធីវត្តមាន (VATTMEAN)  សម្រាប់ស្នងការដ្ឋាននគរបាលរាជធានី-ខេត្ត ដោយតម្រូវឱ្យបញ្ជូនហត្ថលេខាគំរូ ត្រាអង្គភាពបើមាន និងឈ្មោះអ្នកមានសិទ្ធិអនុញ្ញាតច្បាប់ និង ៣. ស្នើជំរុញដល់មន្រ្ដីក្រោមឱវាទប្រើប្រាស់គំរូពាក្យសុំអនុញ្ញាតច្បាប់ តាមគំរូដែលអគ្គនាយកដ្ឋានធនធានមនុស្សបានផ្ដល់ជូន សម្រាប់ស្នងការដ្ឋាននគរបាលរាជធានី-ខេត្ត។

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)