AKP ភ្នំពេញ ថ្ងៃទី៣១ ខែមីនា ឆ្នាំ ២០២៦ --
កិច្ចការពារព័ត៌មាន ពិតជាការការពារទេសចរណ៍ក្នុងសម័យបច្ចុប្បន្ន មុនពេលដែលភ្ញៀវទេសចរណ៍មកដល់ពួកគេធ្វើដំណើរតាមព័ត៌មាន ហើយប្រសិនបើព័ត៌មានមិនពិត ត្រូវគេវាយប្រហារ វាអាចបំផ្លាញការសម្រេចចិត្តរបស់ពួកគេ ។ ប៉ុន្តែ បើយើងបានផ្សព្វផ្សាយការពិតអំពីភាពស្រស់ស្អាត អំពីវប្បធម៌ និងសុវត្តិភាពរបស់កម្ពុជា នោះវានឹងក្លាយជាកម្លាំងទាក់ទាញដ៏ខ្លាំងមួយសម្រាប់វិស័យទេសចរណ៍របស់យើង។ នេះគឺជាការថ្លែងបញ្ជាក់របស់ ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន ក្នុងពិធីផ្សព្វផ្សាយ “ស្ថានភាពទេសចរណ៍កម្ពុជា នៅក្នុងបរិបទតំបន់ និងពិភពលោក ដែលមានភាពមិនប្រាកដប្រជា ប្រែប្រួលឆាប់រហ័ស និងព័ត៌មានក្លែងក្លាយ” ដោយមានការអញ្ជើញចូលរួមពីឯកឧត្ដម ហួត ហាក់ រដ្ឋមន្រ្ដីក្រសួងទេសចរណ៍ នារសៀលថ្ងៃទី៣១ ខែមីនា ឆ្នាំ២០២៦ នៅទីស្ដីការក្រសួងព័ត៌មាន។

 ឯកឧត្តម នេត្រ ភក្រ្តា បានបញ្ជាក់ថា ប្រជាពលរដ្ឋជាទូតព័ត៌មានរបស់ជាតិ ហើយក្នុងសម័យបណ្តាញសង្គមហ្វេសប៊ុក ប្រជាពលរដ្ឋម្នាក់ៗមិនត្រឹមតែជាអ្នកព័ត៌មានម្នាក់ទេ ប៉ុន្តែក៏ជាអ្នកផ្សព្វផ្សាយព័ត៌មាន ដែលរាល់ការចែកចាយព័ត៌មាន គឺជាការបង្ហាញរូបភាពប្រទេសយើងទៅកាន់ពិភពលោកដូច្នេះដែរ។ ឯកឧត្ដម រដ្ឋមន្រ្តីក្រសួងព័ត៌មានមានប្រសាសន៍ថា ក្នុងសតវត្សរ៍ទី២១នេះ សង្រ្គាមមិនត្រឹមតែប្រើប្រាស់អាវុធទេ តែពេលខ្លះក៏ត្រូវប្រើប្រាស់ព័ត៌មានជាឧបករណ៍។ ក្រៅពីនេះ ការប្រកួតប្រជែងរវាងប្រទេស និងប្រទេសមិនមែនត្រឹមតែប្រើប្រាស់     វិស័យសេដ្ឋកិច្ច ឬក៏យោធាទេ តែវាក៏កើតឡើងតាមរយៈលំហព័ត៌មានផងដែរ។ ឯកឧត្ដមរដ្ឋមន្រ្ដីអះអាងថា៖ «ប្រទេសដែលអាចការពារ ការពិតរបស់ខ្លួនបាន ជាប្រទេសដែលអាចការពារកិត្តិយស និង ផលប្រយោជន៍របស់ខ្លួនបាន។ ព័ត៌មានក្លែងក្លាយមិនមែនត្រឹមតែព័ត៌មានដែលមិនត្រឹមត្រូវទេ ប៉ុន្តែវាក៏ជាបញ្ហាប្រឈមនឹងសន្តិសុខជាតិដែលអាប៉ះពាល់ទៅដល់សេដ្ឋកិច្ច សង្គម អាចប៉ះពាល់ទៅដល់រូបភាពជាតិរបស់យើង។ ព័ត៌មានក្លែងក្លាយអាចបំផ្លាញទំនុកចិត្ត បំផ្លាញសេដ្ឋកិច្ច និង មុខមាត់ប្រទេសមួយបានដោយមិនចាំបាច់មានការបាញ់កាំភ្លើងមួយគ្រាប់នោះទេ។ ទាំងនេះហើយទើបយុទ្ធនាការប្រឆាំងព័ត៌មានក្លែងក្លាយរបស់ក្រសួងព័ត៌មានមិនត្រឹមតែជាយុទ្ធនាការផ្នែកព័ត៌មានប៉ុណ្ណោះទេ ប៉ុន្តែក៏ជាផ្នែកមួយនៃការការពារអធិបតេយ្យភាពជាតិរបស់យើង ការពារសន្តិសុខជាតិ និងការពារជាយុទ្ធសាស្រ្តរបស់កម្ពុជា។»

ជាមួយគ្នានេះ ឯកឧត្តម នេត្រ ភក្រ្តា បានបញ្ជាក់បន្ថែមថា ការប្រយុទ្ធប្រឆាំងព័ត៌មានក្លែងក្លាយមិនមែនជាការងាររបស់ក្រសួងព័ត៌មានតែមួយប៉ុណ្ណោះទេ តែជាការចូលរួមពីស្ថាប័នរដ្ឋផ្សេងទៀត ពីអ្នកសារព័ត៌មាន វិស័យឯកជន អ្នកបង្កើតមាតិកា ជាដើម ខណៈនេះជាការការពារជាតិដែលត្រូវចូលរួមជាលក្ខណៈចលនាជាតិតែ    ម្តង។ ឯកឧត្ដម រដ្ឋមន្រ្តីក្រសួងព័ត៌មានបានសង្កត់ធ្ងន់ផងដែរថា៖ «ព័ត៌មានជាអំណាចទុនរបស់ជាតិ ការការពារបរិយាកាសព័ត៌មាន ជាកិច្ចការពារស្ថិរភាពជាតិ។ ចំណុចនេះ ព្រោះថាព័ត៌មានក្លែងក្លាយអាចបង្កភាពភ័យខ្លាច បង្កនូវការភាន់ច្រឡំ និងបង្កការប៉ះពាល់ដល់ស្មារតីសង្គម ។ ដូច្នេះ ការការពារបរិយាកាសឱ្យមានភាពស្អាតស្អំគឺជាការពារសន្តិភាព ដែលយើងបានខិតខំរកបានដោយលំបាកនាកន្លងមក»។
ក្នុងឱកាសនោះ ឯកឧត្តម រដ្ឋមន្រ្តីក៏លើកឡើងដែរថា ក្រៅពីនេះ ព័ត៌មានពិតជាគ្រឹះនៃទំនុកចិត្តអន្តរជាតិ បានសេចក្តីថានៅពេលពិភពលោកឃើញព័ត៌មានពិតពីកម្ពុជា ពួកគេនឹងឃើញប្រទេសមួយដែលមានសន្តិភាព មានស្ថិរភាព និងមានឱកាស ដែលនេះក៏ជាមូលដ្ឋានសម្រាប់ទាក់ទាញវិនិយោគទុន និងទេសចរណ៍។ ទន្ទឹមនេះ ឯកឧត្ដមរដ្ឋមន្រ្តីក្រសួងព័ត៌មានក៏បានថ្លែងឱ្យដឹងទៀតថា ទី១ បងប្អូនប្រជាពលរដ្ឋមុននឹងចែករំលែកគឺត្រូវគិតជាមុន ទី២ គឺផ្ទៀងផ្ទាត់មុន មុននឹងជឿលើព័ត៌មាននោះ ទី៣ គឺផ្សព្វផ្សាយការពិត មិនផ្សព្វផ្សាយសន្មត់ទុកជាមុន ទី៤ ត្រូវមានទំនួលខុសត្រូវ មុនចែករំលែក និងទី៥ ត្រូវចូលរួមផ្សព្វផ្សាយការពិតអំពីកម្ពុជា។

ឯកឧត្តម នេត្រ ភក្រ្តា បានសង្កត់ធ្ងន់ផងដែរថា៖ «នៅពេលប្រជាពលរដ្ឋផ្សព្វផ្សាយព័ត៌មានពិតនោះប្រជាជាតិយើងនឹងមានរបងការពារដ៏រឹងមាំមួយ និងបំប្លែងការប្រយុទ្ធព័ត៌មានក្លែងក្លាយ ទៅជាយុទ្ធនាការផ្សព្វផ្សាយកម្ពុជា ពោលគឺយើងត្រូវប្រែក្លាយបន្តពីការប្រយុទ្ធប្រឆាំងព័ត៌មានក្លែងក្លាយទៅជាការកសាង ស្លាកយីហោកម្ពុជា។ យើងមិនអាចបញ្ឈប់ការបដិសេធព័ត៌មានមិនពិតប៉ុណ្ណោះទេ ប៉ុន្តែ យើងក៏ត្រូវធ្វើលើសពីនេះគឺត្រូវកសាងសម្រាប់មុខមាត់កម្ពុជា និងពង្រីកនូវការផ្សព្វផ្សាយនូវព័ត៌មានពិត យើងត្រូវប្រាប់ពិភពលោកថា កម្ពុជា ជាប្រទេសមានសន្តិភាព និងមានស្ថេរភាពយូរអង្វែង។» 
បន្ថែមពីនេះទៀត ឯកឧត្ដមរដ្ឋមន្រ្ដីបានបញ្ជាក់ឱ្យដឹងទៀតថា តាមរយៈការផ្សព្វផ្សាយ យើងក៏ត្រូវប្រាប់ពិភពលោកថា កម្ពុជា ជាប្រទេសមួយដែលមានមនុស្សរួសរាយរាក់ទាក់ ហើយកម្ពុជាជាប្រទេសដែលមានវប្បធម៌ដ៏អស្ចារ្យ មានធម្មជាតិដ៏ស្រស់ស្អាត និងក៏ជាគោលដៅទេសចរណ៍ដែលមានសុវត្តិភាព៕

ដោយ៖ មករា, រូបថត៖ ខឹម សុវណ្ណារ៉ា