AKP បន្ទាយមានជ័យថ្ងៃទី៣១ខែមីនាឆ្នាំ២០២៦---ដើម្បីធានាឱ្យបាននូវភាពសុខសាន្តជូនប្រជាពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលខិតជិតមកដល់ លោកឧត្ដមសេនីយ៍ត្រី សឿម សារិទ្ធស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាយ៉ាងម៉ឺងម៉ាត់ដល់កងកម្លាំងនគរបាលទូទាំងខេត្ត ឱ្យបង្កើនការយកចិត្តទុកដាក់ខ្ពស់លើការងារសន្តិសុខ និងសណ្តាប់ធ្នាប់សាធារណៈ។     
ការជំរុញបែបនេះ បានធ្វើឡើងក្នុងឱកាសដែលលោកស្នងការដឹកនាំក្រុមការងារ ចុះសំណេះសំណាល និងសួរសុខទុក្ខកងកម្លាំងនៃអធិការដ្ឋាននគរបាលស្រុកមង្គលបូរី កាលពីព្រឹកថ្ងៃទី៣១ ខែមីនា ឆ្នាំ២០២៦ ដោយមានការចូលរួមពីថ្នាក់ដឹកនាំស្នងការរង អធិការ នាយប៉ុស្តិ៍ទាំង១៣ឃុំ និងមន្ត្រីនគរបាលជាច្រើនរូបទៀត។      
អនុវត្តតាមបទបញ្ជាផ្ទាល់ពី ឯកឧត្តម នាយឧត្ដមសេនីយ៍ ស ថេតអគ្គស្នងការនគរបាលជាតិ លោកឧត្តមសេនីយ៍ត្រី សឿម សារិទ្ធ បានដាក់ចេញនូវទិសដៅការងារសំខាន់ៗ ត្រូវក្តាប់ឱ្យជាប់នូវរាល់សភាពការណ៍ និងសកម្មភាពដែលអាចបង្កអសន្តិសុខក្នុងសង្គម ជាពិសេសតាមដានរាល់សកម្មភាពភេរវកម្ម ឬក្រុមអមិត្តដែលមានបំណងប៉ុនប៉ងផ្តួលរំលំរាជរដ្ឋាភិបាលស្របច្បាប់។ ត្រូវពង្រឹងការបង្ក្រាបក្មេងទំនើង ការជួញដូរគ្រឿងញៀន និងការជួញដូរមនុស្សគ្រប់ទម្រង់ រួមទាំងបទល្មើសឆ្លងដែនខុសច្បាប់ឱ្យមានប្រសិទ្ធភាពខ្ពស់។

ប៉ុស្តិ៍នគរបាលរដ្ឋបាលត្រូវផ្សារភ្ជាប់ជាមួយសហគមន៍ ផ្តល់សេវាជូនពលរដ្ឋឱ្យបានលឿន រហ័ស និងគ្រប់គ្រងមុខសញ្ញាចាស់-ថ្មីឱ្យបានហ្មត់ចត់។ បន្តរឹតបន្តឹងការអនុវត្តច្បាប់ចរាចរណ៍ផ្លូវគោក (អនុក្រឹត្យលេខ៣៩) តាមរយៈការអប់រំ និងផ្សព្វផ្សាយ ដើម្បីកាត់បន្ថយគ្រោះថ្នាក់ឱ្យមកនៅកម្រិតទាបបំផុត ក្នុងអំឡុងពេលដែលមានចរាចរណ៍មមាញឹក។

ត្រូវរៀបចំកម្លាំងយាមល្បាត និងត្រៀមមធ្យោបាយសម្ភារៈ ដើម្បីជួយសង្គ្រោះប្រជាពលរដ្ឋទាន់ពេលវេលា ក្នុងករណីមានគ្រោះធម្មជាតិ ឬអគ្គីភ័យកើតឡើងជាយថាហេតុនោះ។       
 ក្រៅពីកិច្ចការជំនាញ លោកស្នងការខេត្តក៏បានសង្កត់ធ្ងន់លើការលើកទឹកចិត្តដល់កងកម្លាំងដែលមានស្នាដៃល្អក្នុងការបំពេញបេសកកម្ម។ 

លោកបានដាស់តឿនដល់មន្ត្រីទាំងអស់ ត្រូវរក្សាសាមគ្គីភាពផ្ទៃក្នុងឱ្យបានល្អ រួមជាមួយការបង្កើនកិច្ចសហការជាមួយស្ថាប័នពាក់ព័ន្ធ ដើម្បីធានាថា "ភូមិ-ឃុំ-សង្កាត់ មានសុវត្ថិភាព" ត្រូវបានអនុវត្តយ៉ាងទូលំទូលាយនៅតាមសាលារៀន និងសហគមន៍។

តាមរយៈវិធានការណ៍ដ៏តឹងរឹងនេះ លោកស្នងការរំពឹងថា ប្រជាពលរដ្ឋនៅក្នុងខេត្តបន្ទាយមានជ័យ ក៏ដូចជាអ្នកទេសចរដែលមកកម្សាន្ត នឹងអាចសប្បាយរីករាយក្នុងពិធីបុណ្យចូលឆ្នាំថ្មីប្រពៃណីជាតិ ក្នុងបរិយាកាសប្រកបដោយសុវត្ថិភាព និងស្នាមញញឹម៕

ដោយ៖ ឈុន សារ៉ាត់