AKP ភ្នំពេញ ថ្ងៃទី៣១ ខែមីនា ឆ្នាំ២០២៦--អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បានរៀបចំវគ្គបំពាក់បំប៉នតម្រង់ទិសលើការងារ សំខាន់ៗសម្រាប់ថ្នាក់ដឹកនាំ និងមន្រ្តី នៃអគ្គនាយកដ្ឋានអត្តសញ្ញាណកម្ម រយៈពេល១ថ្ងៃកាលពីថ្ងៃទី៣០ ខែមីនា ឆ្នាំ២០២៦ ដោយមានសមាសភាពចូលរួមសុរបជិត ៦០០រូប។

វគ្គបំពាក់បំប៉ននេះរៀបចំឡើងក្នុងគោលបំណងលើកកម្ពស់ប្រសិទ្ធភាពការងារ ការយល់ដឹងអំពីតួនាទីភារកិច្ចរបស់មន្ត្រី របៀបរបបការងារ បទវិន័យ និងក្រមសីលធម៌វិជ្ជាជីវៈ ដើម្បីពង្រឹងតួនាទីក្នុងនាមជា មន្ត្រីល្អសម្រាប់អង្គភាព និងសម្រាប់ប្រជាពលរដ្ឋទូទៅ។

ក្នុងពិធីបិទវគ្គបំប៉ននេះ ឯកឧត្តម ប៉ាវ ហម ផាន រដ្ឋលេខាធិការក្រសួងមហាផ្ទៃ ទទួលបន្ទុកអគ្គនាយកដ្ឋានអត្តសញ្ញាណកម្មបានវាយតម្លៃខ្ពស់ចំពោះអគ្គនាយកដ្ឋានអត្តសញ្ញាណកម្ម ដែលបានផ្តួចផ្តើមរៀបចំវគ្គបំប៉នដ៏មានសារសំខាន់នេះឡើង ដើម្បីពង្រឹងសមត្ថភាពស្ថាប័នឱ្យកាន់តែមានប្រសិទ្ធភាព ស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ព្រមទាំងផែនការយុទ្ធសាស្ត្ររបស់ក្រសួងមហាផ្ទៃ។

ឯកឧត្តមបានជំរុញសិក្ខាកាមទាំងអស់ឱ្យបន្តពង្រឹងសមត្ថភាព និងខិតខំប្រឹងប្រែងអនុវត្តការងារជូនអង្គភាពឱ្យកាន់តែមានប្រសិទ្ធភាព  និងលើកកម្ពស់គុណភាពនៃការផ្តល់សេវាជូនប្រជាពលរដ្ឋឱ្យកាន់តែល្អប្រសើរ ប្រកបដោយវិជ្ជាជីវៈ និងមានទំនួលខុសត្រូវខ្ពស់៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)