AKP ភ្នំពេញ ថ្ងៃទី៣០ ខែមីនា ឆ្នាំ២០២៦--

លោកជំទាវ Armida Salsiah Alisjahbana អគ្គលេខា ធិការរងអង្គការសហប្រជាជាតិ និងជាប្រធាន គណៈកម្មការសេដ្ឋកិច្ច និងសង្គមប្រចាំតំបន់អាស៊ីនិងប៉ាស៊ីហ្វិករបស់អង្គការសហប្រជាជាតិ (UN-ESCAP) បានសម្រេចយកកម្ពុជា ធ្វើជាដៃគូ សម្រាប់ប្រទេសមានការអភិវឌ្ឍន៍តិចតួច នៃតំបន់អាស៊ី និងប៉ាស៊ីហ្វិក ។

លោកជំទាវបានបញ្ជាក់បែបនេះ ខណៈពេលលោកជំទាវចូលជួប ពិភាក្សាការងារ ជាមួយ ឯកឧត្តមទេសរដ្ឋមន្ត្រី លី ធុជ ប្រធានគណៈ កម្មាធិការជាតិអេស្កាប់ និងជាអនុប្រធានទី១ អាជ្ញាធរមីន នារសៀលថ្ងៃទី៣០ ខែមីនា ឆ្នាំ២០២៦ នៅស្នាក់ការអាជ្ញាធរមីន ។ 
     
លោកជំទាវ Armida Salsiah Alisjahbana អញ្ជើញមកកាន់ព្រះរាជាណាចក្រកម្ពុជា ដើម្បីចូលរួម «កិច្ចប្រជុំត្រួតពិនិត្យពាក់កណ្តាលអាណត្តិកម្មវិធីសកម្មភាពដូហាសម្រាប់ប្រទេស មានការអភិវឌ្ឍន៍តិចតួច នៃតំបន់អាស៊ី និងប៉ាស៊ីហ្វិក » ដែលសហការរៀបចំដោយគណៈកម្មាធិការជាតិអេស្កាប់នៃរាជរដ្ឋាភិបាលកម្ពុជា ជាមួយ UN-ESCAP និងការិយាល័យតំណាងជាន់ខ្ពស់របស់អង្គការសហប្រ ជាជាតិសម្រាប់ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ដែលគ្មានដែនសមុទ្រ និងរដ្ឋកំពុងអភិវឌ្ឍន៍កោះតូចៗ (UN-OHRLLS)។

     
ឯកឧត្តមទេសរដ្ឋមន្ត្រី បានអរគុណចំពោះលោកជំទាវ Armida Salsiah Alisjahbana ព្រមទាំងUN-ESCAP ដែលបានជ្រើសរើសកម្ពុជាជាដៃគូសហការរៀបចំកិច្ចប្រជុំត្រួតពិនិត្យពាក់កណ្តាលអាណត្តិ កម្មវិធីសកម្មភាពដូហា សម្រាប់ប្រទេសមានការអភិវឌ្ឍន៍តិចតួចនៃតំបន់អាស៊ីនិងប៉ាស៊ីហ្វិក ដែលនេះបង្ហាញពីការផ្តល់ទំនុកចិត្តរបស់អង្គការ សហប្រជាជាតិ មកលើរាជរដ្ឋាភិបាលកម្ពុជា។

ឯកឧត្តម ក៏បានអរគុណចំពោះតួនាទីដ៏សំខាន់របស់ UN-ESCAP ក្នុងការជំរុញកិច្ចសហប្រតិបត្តិការតំបន់ ការអភិវឌ្ឍន៍ប្រកបដោយចីរភាព និងកំណើនប្រកបដោយបរិយបន្ន នៅក្នុងតំបន់អាស៊ីប៉ាស៊ីហ្វិក ក៏ដូចជាការគាំទ្រដល់កម្ពុជា ដើម្បីឱ្យធានាបានការចាកចេញពីឋានៈប្រទេសមានការអភិវឌ្ឍតិចតួចដោយរលូន និងប្រកបដោយចីរភាព។

ឯកឧត្តមទេសរដ្ឋមន្ត្រី លី ធុជ បានមានប្រសាសន៍បន្តទៀតថា ខ្ញុំសូមគាំទ្រទាំងស្រុងចំពោះអង្គការ UN-ESCAP ដែលបានផ្តល់ការគាំទ្រក្នុងការរៀបចំសេចក្តីព្រាងគោលនយោបាយជាតិស្តីពីសកម្មភាពមីន ឆ្នាំ២០២៦- ២០៣៥ ដែលនឹងត្រូវអនុម័តដោយរាជរដ្ឋាភិបាលកម្ពុជានាពេលខាងមុខ។ 

ឯកឧត្តមបានគូសបញ្ជាក់ថា គោលនយោបាយនេះ នឹងក្លាយជាផែនទីបង្ហាញផ្លូវរយៈពេល១០ឆ្នាំរបស់កម្ពុជា ដើម្បីឱ្យកម្ពុជាសម្រេចបានការរំដោះផ្ទៃដីមីន និងសំណល់ជាតិផ្ទុះពីសង្គ្រាមទាំងស្រុង និងត្រៀមខ្លួនជាស្រេចក្នុងដំណាក់កាលគ្រប់គ្រងសំណល់យុទ្ធភណ្ឌគ្រឿងផ្ទុះដែលនៅសេសសល់ឱ្យបានជោគជ័យ។  ការគាំទ្ររបស់UN-ESCAP ក្នុងការរៀបចំគោលនយោបាយសកម្មភាពមីន គឺបានសបញ្ជាប់ពីសារៈសំខាន់នៃវិស័យសកម្មភាពមីន ចំពោះការសម្រេចបានគោលដៅអភិវឌ្ឍប្រកបដោយចីរភាព និងប្រកបដោយបរិយាបន្ន។ ក្នុងន័យនេះផងដែរ តាមរយៈលោកជំទាវ Armida Salsiah Alisjahbana ឯកឧត្តមទេសរដ្ឋមន្ត្រី បានស្នើឱ្យ UN-ESCAP ពិចារណាផ្តល់កិច្ចសហប្រតិបត្តិការ និងការគាំទ្របន្ថែមចំពោះវិស័យសកម្មភាពមីនមនុស្សធម៌នៅកម្ពុជា ជាពិសេសក្នុងកិច្ចសង្គ្រោះជនរងគ្រោះរួមទាំងការធ្វើបរិយាបន្នសេដ្ឋកិច្ចសង្គមសម្រាប់ជនរងគ្រោះ និងការចែករំលែកចំណេះដឹងនិងជំនាញរបស់កម្ពុជាទៅកាន់ប្រទេសនានាក្នុងតំបន់អាស៊ីនិងប៉ាស៊ីហ្វិក ៕

 ដោយ សួស សំរិត