AKP ភ្នំពេញ ថ្ងៃទី៣០ ខែមីនា ឆ្នាំ២០២៦--

លោកជំទាវ ប៉ែន សុបភា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានប្រតិបត្តិនៃក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជាបានដឹកនាំក្រុមការងារនៃអង្គភាពប្រតិបត្តិនៃមូលនិធិគន្ធបុប្ផាកម្ពុជាទទួលជួបសំណេះសំណាល និងទទួលថវិកាបរិច្ចាគប្រចាំត្រីមាសទី១ ឆ្នាំ២០២៦ ចំនួន ២៧៥ ៧៥៥ ០០០ រៀល ពី ឯកឧត្តមនាយឧត្តមសេនីយ៍ វង្ស វាសនា អគ្គមេបញ្ជាការរង នៃកងយោធពលខេមរភូមិន្ទតំណាង ឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងប្រតិភូអម។ពិធីប្រគល់ និងទទួលថវិកានេះបានប្រព្រឹត្តទៅនៅទីស្តីការក្រសួងសេដ្ឋកិច្ច និងហិរញ្ញវត្ថុ នាព្រឹកថ្ងៃទី៣០ ខែមីនា ឆ្នាំ២០២៦។

មូលនិធិគន្ធបុប្ផាកម្ពុជាបានថ្លែងអំណរគុណចំពោះឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ចំពោះការបន្តគិតគូរ និងកៀរគរថវិកាបរិច្ចាគជាប្រចាំត្រីមាសនៃឆ្នាំនីមួយៗ ពីនាយទាហាន និងពលទាហាននៃអគ្គបញ្ជាការដ្ឋាននៃកងយោធពលខេមរភូមិន្ទ ជូនមូលនិធិគន្ធបុប្ផាកម្ពុជា ដើម្បីចូលរួមគាំទ្រកិច្ចដំណើរការរបស់មន្ទីរពេទ្យគន្ធបុប្ផាឱ្យអាចបន្តបេសកកម្មក្នុងការផ្ដល់សេវាពិនិត្យ និងព្យាបាលទារក និងកុមារ ដោយឥតគិតថ្លៃ ប្រកបដោយគុណភាព មិនមានការរើសអើង និងប្រកបដោយប្រសិទ្ធភាព។ 

ក្រៅពីការបំពេញតួនាទីការពារទឹកដី និងប្រជាជន, អគ្គបញ្ជាការដ្ឋាននៃកងយោធពលខេមរភូមិន្ទ ក្រោមការដឹកនាំរបស់ ឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានចូលរួមបរិច្ចាគដោយស្ម័គ្រចិត្តជូនមូលនិធិគន្ធបុប្ផាកម្ពុជា ចាប់តាំងពីឆ្នាំ២០២០ រហូតមកដល់បច្ចុប្បន្ន ដោយបានចូលរួមជាប្រចាំត្រីមាសក្នុង១ឆ្នាំៗ។

សូមជម្រាបជូនផងដែរថា ក្នុងអំឡុងការឈ្លានពានយ៉ាងកំរោលរបស់យោធាថៃ លើដែនអធិបតេយ្យកម្ពុជា, មានទារក, កុមារ និងស្រ្តីមានផ្ទៃពោះ មកពីគ្រួសារវីរកងកម្លាំងកម្ពុជា និងក្រុមគ្រួសារភៀសសឹក ទទួលបានការយកចិត្តទុកដាក់ ពីសំណាក់ក្រុមគ្រូពេទ្យនៃមន្ទីរពេទ្យគន្ធបុប្ផា ក្នុងការពិនិត្យ និងព្យាបាល ក៏ដូចជាសេវាសម្ភព ដោយឥតគិតថ្លៃ និងប្រកបដោយគុណភាព៕

ដោយ វាសនា ( ប្រភព៖ មូលនិធិគន្ធបុប្ផាកម្ពុជា)