AKP បន្ទាយមានជ័យ ថ្ងៃទី៣០ ខែមីនា ឆ្នាំ២០២៦--រដ្ឋបាលស្រុកព្រះនេត្រព្រះបានរៀបចំកិច្ចប្រជុំសាមញ្ញលើកទី២២ អាណត្តិទី៤ របស់ក្រុមប្រឹក្សាស្រុកកាលពីព្រឹកថ្ងៃចន្ទ ទី១៦ ខែមីនា ឆ្នាំ២០២៦ ក្រោម វត្តមានលោក កែវ ប៊ុនយឿន ប្រធានក្រុមប្រឹក្សាស្រុក និងលោក ហឿន វីរៈ អភិបាលនៃគណៈអភិបាលស្រុកព្រះនេត្រព្រះខេត្តបន្ទាយមានជ័យ ដើម្បីពិនិត្យលើវឌ្ឍនភាពការងារ និងដាក់ចេញទិសដៅសំខាន់ៗសម្រាប់បម្រើផលប្រយោជន៍ប្រជាពលរដ្ឋក្នុងមូលដ្ឋាន។
កិច្ចប្រជុំនេះមានការអញ្ជើញចូលរួមពីសំណាក់ សមាជិក-សមាជិកាក្រុមប្រឹក្សាស្រុក, គណៈអភិបាលស្រុក, នាយករដ្ឋបាល, ប្រធានការិយាល័យជំនាញ, កងកម្លាំងប្រដាប់អាវុធទាំង៣ប្រភេទ, មេឃុំទាំង០៩ និងមន្ត្រីរាជការសាលាស្រុកជាច្រើនរូបទៀត។

ក្នុងឱកាសនោះ លោក កែវ ប៊ុនយឿន ប្រធានក្រុមប្រឹក្សាស្រុក បានលើកឡើងនូវការកោតសរសើរចំពោះកិច្ចខិតខំប្រឹងប្រែងរបស់រដ្ឋបាលស្រុកនាពេលកន្លងមក។ លោកបានសង្កត់ធ្ងន់ថា មន្ត្រីរាជការ និងអាជ្ញាធរគ្រប់ជាន់ថ្នាក់ ត្រូវបន្តពង្រឹងស្មារតីទទួលខុសត្រូវខ្ពស់ក្នុងការបំពេញការងារ ជាពិសេសគឺការផ្តល់សេវាសាធារណៈជូនប្រជាពលរដ្ឋឱ្យបានកាន់តែល្អប្រសើរ រហ័សទាន់ចិត្ត និងប្រកបដោយតម្លាភាព ដើម្បីឆ្លើយតបទៅនឹងតម្រូវការជាក់ស្តែងរបស់ម្ចាស់ឆ្នោត។

ស្របពេលដែលពិធីបុណ្យចូលឆ្នាំថ្មីប្រពៃណីជាតិខ្មែរជិតឈានចូលមកដល់ លោក ហឿន វីរៈ អភិបាលស្រុកព្រះនេត្រព្រះ បានដាក់ចេញនូវបទបញ្ជាយ៉ាងម៉ឺងម៉ាត់ដល់កងកម្លាំងសមត្ថកិច្ច និងអាជ្ញាធរឃុំទាំង០៩ ត្រូវបង្កើនការយកចិត្តទុកដាក់ខ្ពស់លើការងារសន្តិសុខ។ លោកអភិបាលបានបញ្ជាក់ថា អាជ្ញាធរ និងកងកម្លាំងត្រូវសហការគ្នាឱ្យបានស្អិតរមួត ក្នុងការការពារសុវត្ថិភាពជូនបងប្អូនប្រជាពលរដ្ឋ នៅតាមតំបន់កម្សាន្តនានា វត្តអារាម និងរមណីយដ្ឋាននានាដែលមានក្នុងស្រុក។ យើងត្រូវធានាថា ក្នុងឱកាសបុណ្យចូលឆ្នាំខាងមុខនេះ ប្រជាពលរដ្ឋនឹងអាចដើរលេងកម្សាន្តដោយក្តីសប្បាយរីករាយ និងមានសុវត្ថិភាពបំផុត»។      
លើសពីនេះ លោកអភិបាលក៏បានរំលឹកដល់អាជ្ញាធរមូលដ្ឋានឱ្យបន្តផ្សព្វផ្សាយ និងទប់ស្កាត់រាល់សកម្មភាពដែលបង្កអសន្តិសុខក្នុងសង្គម និងរៀបចំសណ្តាប់ធ្នាប់ចរាចរណ៍ឱ្យបានរៀបរយ ដើម្បីកាត់បន្ថយគ្រោះថ្នាក់ផ្សេងៗដែលអាចកើតមានឡើងជាយថាហេតុ។
    
កិច្ចប្រជុំសាមញ្ញលើកទី២២នេះ ទទួលបានលទ្ធផលជាផ្លែផ្កា ដោយសមាជិកអង្គប្រជុំទាំងអស់បានប្តេជ្ញាចិត្តរួមគ្នាអនុវត្តរាល់ទិសដៅដែលបានដាក់ចេញ ដើម្បីអភិវឌ្ឍស្រុកព្រះនេត្រព្រះ ឱ្យកាន់តែមានការរីកចម្រើនលើគ្រប់វិស័យ៕

ដោយ ឈុន  សារ៉ាត