AKP ភ្នំពេញ ថ្ងៃទី២០ ខែមីនា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់គណៈកម្មាធិការជាតិអូឡាំពិកកម្ពុជាក្នុងកិច្ចសហការជាមួយក្រសួងអប់រំ យុវជន និងកីឡា សហព័ន្ធកីឡាជាតិ និងភាគីពាក់ព័ន្ធទាំងអស់បានធ្វើឱ្យកីឡាជាតិ និងកិត្យានុភាពជាតិលេចត្រដែតលើឆាកអន្តរជាតិ ជាពិសេសព្រឹត្តិការណ៍ប្រកួតស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដែលទទួលបានជោគជ័យដ៏ត្រចេះត្រចង់ និងអស្ចារ្យមិនធ្លាប់មានក្នុងកំណត់ត្រាប្រវត្តិសាស្រ្តវិស័យកីឡាកម្ពុជា ដែលយើងទន្ទឹងរង់ចាំអស់រយៈពេល៦៤ឆ្នាំមកហើយ ទើបតែសម័យកាលតេជោសែនអាចសម្រេចបានតាមពាក្យស្លោក «កីឡារស់ក្នុងសន្តិភាព»។

ការកោតសរសើរ និងវាយតម្លៃខ្ពស់របស់ឯកឧត្តមឧបនាយករដ្ឋមន្ត្រីបានធ្វើឡើង នៅក្នុងមហាសន្និបាតបញ្ចប់អាណត្តិទី៨ ឆ្នាំ២០២២-២០២៦ និងបន្តអាណត្តិទី៩ ឆ្នាំ២០២៦-២០៣០ របស់គណៈកម្មាធិការជាតិអូឡាំពិកកម្ពុជា (NOCC) កាលពីល្ងាចថ្ងៃទី១៩ ខែមីនា ឆ្នាំ២០២៦ ដោយមានការអញ្ជើញចូលរួមពីឯកឧត្តមបណ្ឌិតទេសរដ្ឋមន្រ្តី ថោង ខុន ប្រធានគណៈកម្មាធិការជាតិអូឡាំពិកកម្ពុជា គណៈកម្មាធិការប្រតិបត្តិគណៈកម្មាធិការជាតិអូឡាំពិកកម្ពុជា និងតំណាងសហព័ន្ធកីឡាជាតិ អង្គភាពកីឡាក្រសួង-សា្ថប័ន ទីប្រឹក្សា ភ្ញៀវកិត្តិយស វិស័យឯកជន។

ឯកឧត្តមបណ្ឌិតសភាចារ្យ ហង់ជួន ណារ៉ុន បានគូសបញ្ជាក់ថា ចំពោះការលើកកម្ពស់សុខុមាលភាពសិស្ស និស្សិត មហាជន ក្រសួងបានរៀបចំកំណែទម្រង់ ដោយពង្រឹងគុណភាពវិស័យអប់រំកាយ និងកីឡា ក្នុងគ្រឹះស្ថានសិក្សា ពិសេសក្នុងការវាយតម្លៃស្ដង់ដាសាលាគំរូ ក៏មានសមាសធាតុនៃការវាយតម្លៃលើការអនុវត្តកម្មវិធីអប់រំកាយនិងកីឡាក្នុងម៉ោងសិក្សា និងក្រៅម៉ោងសិក្សា ដើម្បីជំរុញប្រសិទ្ធភាពកម្មវិធីអប់រំកាយនិងកីឡា។ រីឯយុទ្ធនាការជំរុញចលនា «យុវជនម្នាក់លេងកីឡាមួយប្រភេទប្រចាំជីវិត» គឺជាគោលនយោបាយមួយនៃគោលនយោបាយជាតិ និងត្រូវបានជំរុញតាមគ្រប់មជ្ឈដ្ឋានក្នុងសង្គមផងដែរ។

ជាមួយគ្នានេះ ឯកឧត្តមបណ្ឌិតសភាចារ្យឧបនាយករដ្ឋមន្ត្រីក៏បានផ្តល់អនុសាសន៍សំខាន់ៗមួយចំនួន ដើម្បីបន្តអភិវឌ្ឍន៍វិស័យកីឡានៅកម្ពុជា ដោយមានខ្លឹមសារ ដូចជា៖ សូមអង្គមហាសន្និបាតទាំងមូល និងភាគីពាក់ព័ន្ធកីឡាទាំងអស់បន្តជឿជាក់ និងផ្តល់សេចក្តីទុកចិត្តដល់រាជរដ្ឋាភិបាល ពិសេសចូលរួមជាមួយរាជរដ្ឋាភិបាល និងក្រសួងអប់រំ យុវជន និងកីឡា ប្តេជ្ញាចិត្តរួមគ្នាក្នុងការគោរព និងអនុវត្តតាមយុទ្ធសាស្ត្របញ្ចកោណ ដំណាក់កាលទី១ គោលនយោបាយកីឡាជាតិ គោលការណ៍គន្លឹះនានាក្នុងការធ្វើកំណែទម្រង់លើវិស័យកីឡាជាប្រចាំ។

សូមពង្រឹងស្មារតីសាមគី្គភាព និងធ្វើសុខដុមនីយកម្មការងារកីឡាជាតិ ទើបមិនរាំងស្ទះដល់ការអភិវឌ្ឍកីឡាជាតិ។ ត្រូវគោរពតួនាទី ភារកិច្ចរៀងៗខ្លួន និងពិភាក្សាពិគ្រោះយោបល់គ្នាជាប្រចាំក្នុងពេលធ្វើការកីឡាជាមួយគ្នា ជៀសវាងបង្កទំនាស់វិវាទគ្នាដោយហេតុផលផ្សេងៗ ពិសេសទំនាស់ផលប្រយោជន៍ក្នុងកីឡា ត្រូវចៀសវាងដាច់ខាត។ សូមពង្រឹងសមត្ថភាពគ្រប់គ្រងដឹកនាំអង្គការកីឡារបស់ខ្លួន តាមរយៈការគ្រប់គ្រងតាមប្រព័ន្ធអភិបាលកិច្ចល្អ គឺតម្លាភាព គណនេយ្យភាព សុចរិតភាព សក្តិសិទ្ធិភាព និងមានភាពជាអ្នកដឹកនាំទៅលើវិស័យកីឡា។  សូមពង្រឹង និងពង្រីកចំណេះដឹង ឯកទេសកីឡា ដោយធ្វើទំនើបកម្មតាមនិន្នាការរីកចម្រើនរបស់វិទ្យាសាស្រ្តកីឡាជាប្រចាំ ពិសេសអភិវឌ្ឍមូលធនមនុស្សជំនាញឯកទេសកីឡា ដើម្បីផ្តោតការយកចិត្តទុកដាក់ជាអាទិភាពក្នុងការថែទាំ ឧបត្ថម្ភគាំទ្រដល់កីឡាករ កីឡាការិនី ដែលមានគុណផលកម្រិតខ្ពស់ឱ្យបានទៀងទាត់។

ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងបន្ថែមថា សូមលើកកម្ពស់កីឡាស្អាតស្អំ តាមរយៈការសិក្សាស្រាវជ្រាវ និងការត្រៀមអនុវត្តក្រមរបស់ទីភ្នាក់ងារប្រឆាំងសារធាតុញៀនពិភពឯកឧត្តម (WADA) ឆ្នាំ២០២៧ ដើម្បីប្រយុទ្ធប្រឆាំងការប្រើប្រាស់សារធាតុហាមឃាត់ក្នុងវិស័យកីឡា។ លើកទឹកចិត្តឱ្យខិតខំសិក្សារៀនសូត្រ និងប្រើប្រាស់បច្ចេកវិទ្យា និងបញ្ញាសិប្បនិម្មិត (AI) ក្នុងការជួយដល់ការគ្រប់គ្រងកីឡា និងការអភិវឌ្ឍបច្ចេកទេសកីឡា។ ជាថ្មីម្ដងទៀត ក្នុងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សូមអបអរសាទរចំពោះសមិទ្ធផលអាណត្តិចាស់របស់គណៈកម្មាធិការជាតិអូឡាំពិកកម្ពុជា និងសូមគាំទ្រដល់ការរៀបចំបោះឆ្នោតជ្រើសរើសថ្នាក់ដឹកនាំអាណត្តិថ្មី ប្រចាំឆ្នាំ២០២៦-២០៣០ តាមនីតិវិធី និងអនុលោមភាពតាមធម្មនុញ្ញអូឡាំពិក និងលក្ខន្តិកៈរបស់គណៈកម្មាធិការជាតិអូឡាំពិកកម្ពុជា ដោយក្រសួងអប់រំ យុវជន និងកីឡា សង្ឃឹមលើកិច្ចសហការជិតស្និទ្ធរបស់អង្គការកីឡាជាតិទាំងអស់ ដើម្បីអភិវឌ្ឍវិស័យកីឡាជាតិ ប្រកបដោយចីរភាព និងបរិយាបន្ន៕

ដោយ ហេង ណាលីន (រូបភាព៖ NOCC)