AKP ភ្នំពេញ ថ្ងៃទី១៣ ខែមីនា ឆ្នាំ២០២៦--នៅក្នុងទិវាអន្តរជាតិអាហារូបត្ថម្ភ​តាមសាលាររៀន អង្គការទស្សនៈពិភពអន្តរជាតិ​ប្រចាំកម្ពុជា World Vision កំពុងតែបន្តគាំទ្រកុមារឱ្យទទួលបានអាហារូបត្ថម្ភគ្រប់គ្រាន់ នៅក្នុងបរិបទសាលារៀនមានសុវត្ថិភាព ដើម្បីឱ្យកុមារអាចផ្តោតអារម្មណ៍សិក្សាបានល្អ ចូលរួមក្នុងថ្នាក់រៀនបានកាន់តែប្រសើរ និងលូតលាស់ប្រកបដោយសុខភាពល្អ។

មន្ត្រីអង្គការ World Vision បានឱ្យដឹងនៅថ្ងៃទី១២ ខែមីនា ឆ្នាំ២០២៦ថា ចាប់តាំងពីឆ្នាំ ២០១៧ មកទល់បច្ចប្បន្ននេះ អង្គការទស្សនៈពិភពលោកអន្តរជាតិ World Vision បានធ្វើការយ៉ាងជិតស្និទ្ធជាមួយកម្មវិធីស្បៀងអាហារពិភពលោក និងក្រសួងអប់រំ យុវជន និងកីឡា ដើម្បីផ្តល់អាហារូបត្ថម្ភប្រចាំថ្ងៃដល់កុមារនៅតាមសាលាបឋមសិក្សាចំនួន ៣១៦ សាលា ក្នុងខេត្តកំពង់ធំ និងខេត្តកំពង់ឆ្នាំង ដល់សិស្សចំនួន ១០០ ៦៤០ នាក់ ក្នុងនោះមានកុមារីចំនួន ៥៤ ៦០៦ នាក់។ 

អាហារូបត្ថម្ភ​តាមសាលារៀន ជាផ្នែកមួយ​ជួយ​បង្កើន​លទ្ធភាព​ចូលរៀន​នៅ​សាលារបស់កុមារ ពង្រឹង​ការរៀនសូត្រ និង​គាំទ្រ​ដល់​សេដ្ឋកិច្ច​ក្នុងស្រុក។ អាហារូបត្ថម្ភ​​ទាំងនោះ​មិនមែន​គ្រាន់តែ​ជា​អាហារ​នោះទេ ប៉ុន្តែ​វា​គឺជា​ការវិនិយោគ​​លើ​ធនធានមនុស្ស​ កិច្ចគាំពារសង្គម និង​ការអភិវឌ្ឍ​ប្រកបដោយ​ចីរភាព ៕

ដោយ៖ ណយ នឿន (ប្រភព៖World Vision)