AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៦--ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរង យោធភូមិភាគពិសេស តំណាងដ៏ខ្ពង់ខ្ពស់ ឯកឧត្ដម ឧត្ដមសេនីយ៍ឯក ពូ សាប៊ុតឌី មេបញ្ជាការរង កងទ័ពជើងគោក មេបញ្ជាការយោធភូមិភាគពិសេស អញ្ជើញជាអធិបតីក្នុងពិធីបូកសរុបលទ្ធផលការងារយោធា ឆ្នាំ២០២៥ និងផ្សព្វផ្សាយផែនការ ការងារយោធា ឆ្នាំ២០២៦ របស់កងការពារព្រំដែនលេខ៦០១ ក្នុងនោះក៏មានការអញ្ជើញចូលរួមពីសំណាក់ ឯកឧត្ដម នាយសេនាធិការរង យោភូមិភាគពិសេស នាយការិយាល័យជំនាញដែលពាក់ព័ន្ធ ចំណុះយោធភូមិភាគពិសេសនាថ្ងៃទី២៥ ខែកុម្ភៈ ឆ្នាំ២០២៦ ។

លោកវរសេនីយ៍ឯក លន់ លុច មេបញ្ជាការ កងការពារព្រំដែនលេខ ៦០១ បានថ្លែងស្វាគមន៍ និងរាយការណ៍ដោយសង្ខេបស្ដីពីលទ្ធផលការងារយោធា ឆ្នាំ២០២៥ និងផែនការ ការងារយោធា ឆ្នាំ២០២៦ ជូនដល់គណៈអធិបតី ។ លោកមេបញ្ជាការកងការពារព្រំដែនលេខ ៦០១ បានឱ្យដឹងថា ដើម្បីឆ្លើយតបទៅនឹងការយកចិត្តទុកដាក់របស់ថ្នាក់ដឹកនាំ នាយទាហាន នាយទាហានរងទូទាំងកងការពារព្រំដែនលេខ ៦០១ សូមប្ដេជ្ញា គោរពច្បាប់ គោរពបទបញ្ជា គោរពវិន័យរបស់កងទ័ព និងស្មោះត្រង់ជានិច្ចចំពោះ ជាតិ សាសនា ព្រះមហាក្សត្រ និងគាំទ្ររាល់យុទ្ធសាស្ត្រ គោលនយោបាយនានារបស់រាជរដ្ឋាភិបាល ពិសេសគាំទ្រយ៉ាងពេញទំហឹងរាល់បទបញ្ជាដ៏ខ្ពង់ខ្ពស់ប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត ដែលជាប្រមុខដឹកនាំដ៏ឈ្លៀសវៃ ។

ថ្លែងក្នុងពិធីបូកសរុបលទ្ធផលការងារយោធា ឆ្នាំ២០២៥ ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរង យោធភូមិភាគពិសេស បានមានប្រសាសន៍សំណេះសំណាល បូកសរុប និងវាយតម្លៃខ្ពស់ចំពោះលទ្ធផលការងារយោធារបស់កងការពារព្រំដែនលេខ ៦០១ កន្លងមក ដែលបានសហប្រតិបត្តិការល្អនៅតាមខ្សែបន្ទាត់ព្រំដែន កម្ពុជា- វៀតណាម និងជាមួយអាជ្ញាធរពាក់ព័ន្ធ ខិតខំយកចិត្តទុកដាក់អនុវត្តប្រកបដោយប្រសិទ្ធភាពនូវកម្មវិធីនយោបាយ និងយុទ្ធសាស្រ្តបញ្ចកោណរបស់រាជរដ្ឋាភិបាល ក្រសួងការពារជាតិ អគ្គបញ្ជាការ កងទ័ពជើងគោក ដែលបានដាក់ចេញ ការពង្រឹងខឿនការពារជាតិរឹងមាំ និងលើកទឹកចិត្តដល់នាយទាហាន នាយទាហានរង និងពលទាហានទូទាំងកងការពារព្រំដែនលេខ ៦០១ និងបន្តកិច្ចខិតខំបំពេញភារកិច្ចដ៏ឧត្តុង្គឧត្តមនេះ ឲ្យទទួលបានជោគជ័យថែមទៀត ។

ឯកឧត្ដម បានបន្តថា ត្រូវយកចិត្តទុកដាក់ក្នុងការជួសជុល កសាងជំរុំជម្រកស្នាក់នៅ ការងារបង្កបង្កើនផល ចិញ្ចឹមសត្វ ការងារគ្រប់គ្រងកម្លាំង ការងារហ្វឹកហ្វឺន អប់រំចិត្តសាស្ត្រ និងការងារបច្ចេកទេស (ការគ្រប់គ្រងអាវុធ គ្រាប់ គ្រឿងចក្រ) និងចូលរួមពង្រឹងខឿនការពារជាតិ និងបន្តខិតខំបំពេញភារកិច្ចឲ្យទទួលបានជោគជ័យបន្ថែមទៀត ៕

ដោយ៖សំ សាម៉ន(ប្រភព៖បញ្ជាការដ្ឋានកងទ័ពជើងគោក)