AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៦-- ក្រសួងធម្មការ និងសាសនា បានរៀបចំសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ រយៈពេលពីរថ្ងៃ ចាប់ពីថ្ងៃទី២៥ ដល់ថ្ងៃទី២៦ ខែកុម្ភៈ ឆ្នាំ២០២៦ នៅសាលសន្និសីទចតុម្មុខ។

ថ្លែងក្នុងពិធីបើកសន្និបាត នាព្រឹកថ្ងៃទី២៥ ខែកុម្ភៈ ឆ្នាំ២០២៦ ឯកឧត្ដមបណ្ឌិត ចាយ បូរិន រដ្ឋមន្រ្តីក្រសួងធម្មការ និងសាសនា បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងធម្មការ និងសាសនា ដែលបានខិតខំបំពេញភារកិច្ចការងារយ៉ាងសកម្ម ក្នុងស្មារតីទទួលខុសត្រូវខ្ពស់ ព្រមទាំងសម្រេចបានសមិទ្ធផលសំខាន់ៗគួរជាទីមោទនៈជូនក្រសួងធម្មការ និងសាសនា និងរាជរដ្ឋាភិបាលក្នុងឆ្នាំ២០២៥កន្លងទៅនេះ។

ឯកឧត្ដមរដ្ឋមន្ត្រីបានបន្តថា នៅក្នុងនីតិកាលទី៧នេះដែរ ក្រសួងធម្មការ និងសាសនា ក្នុងនាមជាសេនាធិការរបស់រាជរដ្ឋាភិបាលបានបន្តអនុវត្តគោលនយោបាយ “លើកកម្ពស់សាសនារបស់រដ្ឋ តម្លៃសីលធម៌សង្គម និងសុខដុមនីយកម្មសាសនា” ស្ថិតនៅបញ្ចកោណទី១ មុំទី៥៖ ការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ហើយដើម្បីឆ្លើយតបទៅនឹងគោលនយោបាយខាងលើ ក្រសួងបានកំណត់ដាក់ចេញនូវផែនការយុទ្ធសាស្រ្តចំនួន៥ សម្រាប់អនុវត្តរយៈពេល៥ ឆ្នាំ២០២៤-២០២៨ រួមមាន ១.ការលើកកម្ពស់សាសនារបស់រដ្ឋ ២.ការលើកកម្ពស់សីលធម៌សង្គម ៣.ការរក្សាសុខដុមនីយកម្មសាសនា ៤.ការពង្រឹងគុណភាពអប់រំពុទ្ធិកសិក្សាគ្រប់កម្រិត និង៥. ការអភិវឌ្ឍសមត្ថភាពស្ថាប័ន និងធនធានមនុស្ស។

ឯកឧត្តមរដ្ឋមន្រ្តីបានបញ្ជាក់បន្ថែមថា តាមរយៈការអនុវត្តផែនការសកម្មភាពការងារក្នុងឆ្នាំ២០២៥ កន្លងមកនេះ ថ្នាក់ដឹកនាំ និងមន្ត្រីរាជការទាំងអស់បានចូលរួមយ៉ាងសកម្ម ក្នុងការបំពេញការងារប្រចាំថ្ងៃឆ្លើយតបទៅនឹងផែនការដែលបានដាក់ចេញ ដោយសម្រេចបានលទ្ធផលការងារតាមផែនការគ្រោងទុក។ ជាក់ស្តែង ដោយមានការអនុញ្ញាតដ៏ខ្ពង់ខ្ពស់ពីរាជរដ្ឋាភិបាលកម្ពុជា ក្រសួងធម្មការ និងសាសនា រួមជាមួយគណៈសង្ឃនាយកទាំងពីរគណៈ បានរៀបចំពិធីបុណ្យខួប៥៦ឆ្នាំ នៃការបកប្រែគម្ពីរព្រះត្រៃបិដកខ្មែរ សូធ្យព្រះត្រៃបិដក និងរំលឹកគុណក្រុមជំនុំព្រះត្រៃបិដក ដែលបានប្រព្រឹត្តទៅចាប់ពីថ្ងៃទី៩-១០ ខែកុម្ភៈ ឆ្នាំ២០២៦ នៅពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា (ភ្នំអដ្ឋរស្ស) ស្ថិតក្នុងភូមិភ្នំ ឃុំផ្សារដែក ស្រុកពញាឮ ខេត្តកណ្តាល។

ក្នុងឱកាសនេះ ឯកឧត្ដមបណ្ឌិត ចាយ បូរិន បានផ្តល់អនុសាសន៍បន្ថែម ដើម្បីតម្រង់ទិសដល់អង្គសន្និបាត រួមមាន ១.ត្រូវធ្វើការពិភាក្សា និងរកឱ្យឃើញនូវចំណុចខ្លាំង ចំណុចខ្សោយ ឱកាស និងបញ្ហាប្រឈម ដើម្បីធ្វើយ៉ាងណា រៀបចំនូវទិសដៅបន្ត សម្រាប់អនុវត្តក្នុងឆ្នាំ២០២៦ ឱ្យមានប្រសិទ្ធភាពខ្ពស់ ឆ្លើយតបនឹងគោលនយោបាយរបស់រាជរដ្ឋាភិបាល។ ២.សូមឱ្យព្រះសមាជិក សមាជិក សមាជិកា នៃអង្គសន្និបាតទាំងមូលចូលរួមជាព្រះមតិយោបល់ និងយោបល់ឱ្យបានផុលផុស ស្វែងរកធាតុចូលថ្មីៗ បន្ថែមទៀត ដើម្បីជាវិភាគទានចូលរួមអនុវត្តផែនការយុទ្ធសាស្ត្រទាំង៥ របស់ក្រសួងរយៈពេល៥ឆ្នាំ ២០២៤-២០២៨ ឱ្យទទួលបានប្រសិទ្ធភាព និងប្រសិទ្ធផលខ្ពស់។ ៣.សូមនិមន្ត និងអញ្ជើញចូលរួមឱ្យបានពេញលេញ ប្រកបដោយព្រះស្មារតី ស្មារតីបុរេសកម្ម សកម្ម និងអន្តរសកម្ម ក្នុងការពិភាក្សា រក្សា សាមគ្គីភាពផ្ទៃក្នុង និងភាពស្មោះត្រង់ ក្នុងគ្រួសារធម្មការ និងសាសនាតែមួយ ដើម្បីរួមគ្នាគិត រួមគ្នាអនុវត្តប្រកបដោយការទទួលខុសត្រូវ និងរួមគ្នាទទួលបានលទ្ធផលល្អប្រសើរ និង ៤.សូមឱ្យកិច្ចពិភាក្សាក្នុងអង្គសន្និបាតនាថ្ងៃនេះទទួលបានផ្លែផ្កាជាវិជ្ជមាន ដើម្បីចូលរួមអភិវឌ្ឍវិស័យធម្មការ និងសាសនាឱ្យមានការរីកចម្រើន និងរុងរឿង៕

ដោយ៖ ចាន់ សុភឿន រូបថត៖ សួស សាវី